អ្នកកាទូតជាន់ខ្ពស់ជាច្រើនរូបទៀតរបស់កូរ៉េខាងជើង គ្រោងនឹងបោះបង់តំណែងពួកគេនៅអឺរ៉ុប ដើម្បីចុះចូលនឹងកូរ៉េខាងត្បូង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់ព័ត៌មានចុះផ្សាយដោយទីភ្នាក់ងារព័ត៌មានយ៉ុនហាប់របស់កូរ៉េខាងត្បូង។
ទីភ្នាក់ងារព័ត៌មានយ៉ុនហាប់ បានចុះផ្សាយដូច្នេះ ដោយផ្អែកលើការអះអាងរបស់លោក ថេ យ៉ុងហូ អតីតអគ្គរដ្ឋទូតកូរ៉េខាងជើងប្រចាំទីក្រុងឡុងដ៍ ដែលបានបោះបង់តំណែងរបស់ខ្លួនចោល និងចុះចូលនឹងកូរ៉េខាងត្បូងកាលពីខែសីហាឆ្នាំមុន។ ចាប់តាំងពីខែធ្នូឆ្នាំមុនមក អតីតអ្នកកាទូតកូរ៉េខាងជើងរូបនេះ បាននិយាយទៅកាន់ប្រព័ន្ធផ្សព្វផ្សាយក្នុងស្រុកនានា ដោយបានលើកឡើងពីការសម្រេចចិត្តចុះចូលនឹងរដ្ឋាភិបាលក្រុងសេអ៊ូល និងជីវិតរបស់លោកនៅពេលធ្វើជាអ្នកកាទូតរបស់កូរ៉េខាងជើង។
លោក ថេ អាយុ ៥៤ឆ្នាំ បាននិយាយជាសាធារណៈថា ការមិនពេញចិត្តនឹងមេដឹកនាំវ័យក្មេង លោក គីម ជុងអ៊ុន បាននាំឲ្យលោកបោះបង់តំណែងចោល ប៉ុន្តែ លោកក៏មានកូនប្រុសពីរនាក់ កំពុងសិក្សានៅមហាវិទ្យាល័យនៅទីក្រុងឡុងដ៍ និងភរិយារបស់លោក ដែលនឹងត្រូវត្រឡប់ទៅកូរ៉េខាងជើងវិញ។
លោក ថេ គឺជាមន្ត្រីជាន់ខ្ពស់បំផុតដែលបានចុះចូលនឹងកូរ៉េខាងត្បូង គិតចាប់តាំងពីឆ្នាំ១៩៩៧ មក៕
