បណ្តឹងយ៉ាងតិចចំនួន៧ ត្រូវបានគណៈកម្មាធិការជាតិរៀបចំការបោះឆ្នោតប្រកាសច្រានចោល ដោយអះអាងថាការដែលដើមបណ្តឹងប្តឹងសុំលុបឈ្មោះជនជាតិវៀតណាម១៨១នាក់ចេញពីបញ្ជីបោះឆ្នោតនោះ ថាមិនមែនជាទម្រង់ច្បាប់សម្រាប់ពិចារណា។
នៅថ្ងៃទី១៦ខែមករានេះ គ.ជ.ប បានបើកសវនាការលើបណ្តឹងទាស់ចំនួន៧របស់គណបក្សសង្គ្រោះជាតិ ក្រោយពីគណបក្សនេះមិនទទួលយកសេចក្តីសម្រេចរបស់ក្រុមប្រឹក្សាឃុំសង្កាត់ ដែលមិនព្រមលុបឈ្មោះអ្នកចុះឈ្មោះបោះឆ្នោតមួយចំនួនដែលគេសង្ស័យថាជាជនជាតិវៀតណាម។
បណ្តឹងដែល គ.ជ.ប លើកយកមកជំនុំជម្រះនៅថ្ងៃដំបូងនេះ មានករណីនៅសង្កាត់ផ្សារថ្មី២និងសង្កាត់មួយចំនួនក្នុងខណ្ឌឬស្សីកែវ រាជធានីភ្នំពេញ ករណីនៅឃុំស្វាយជ្រំ ស្រុករលាផ្អៀខេត្តកំពង់ឆ្នាំង សង្កាត់ប៉ៃលិន ខេត្តប៉ៃលិន និងសង្កាត់មួយចំនួនក្នុងខេត្តព្រះសីហនុ។
ក្នុងសវនាការ មេធាវីការពារឲ្យដើមបណ្តឹង លោក សំ សុគង់ ពន្យល់ដល់ក្រុមប្រឹក្សាជំនុំជម្រះថា ការដែលកូនក្តីលោកហ៊ានអះអាងថាអ្នកទាំងនោះជាជនជាតិវៀតណាម លោកសំអាងថាអ្នកទាំងនោះនិយាយភាសាខ្មែរមិនច្បាស់ ហើយប្រើភាសាវៀតណាមជាប្រចាំក្នុងការទំនាក់ទំនងក្នុងគ្រួសារនិងប្រើប្រាស់អត្តសញ្ញាណប័ណ្ណសញ្ជាតិខ្មែរទៅចុះឈ្មោះដោយមិនបានបំពេញលក្ខខណ្ខនៃការចូលសញ្ជាតិ។
លោក សំ សុគង់ ស្នើឲ្យ គ.ជ.ប លុបឈ្មោះអ្នកដែលមានក្នុងពាក្យបណ្តឹងនោះចេញពីបញ្ជីបោះឆ្នោតនិងបើកការស៊ើបអង្កេតរកមូលហេតុដែលជនសង្ស័យទាំងនោះមានអត្តសញ្ញាណប័ណ្ណសញ្ជាតិខ្មែរប្រើប្រាស់ដោយមិនឆ្លងកាត់ច្បាប់សញ្ជាតិ។
ក្រោយពីបើកសវនាការសួដេញដោលពេញមួយព្រឹកទៅលើដើមបណ្តឹងនិងចុងចម្លើយរួចមក គ.ជ.ប បានប្រើពេលពិភាក្សាក្នុងបន្ទប់បិទជិតប្រមាណជា៤ម៉ោង។
ក្រោយមកសមាជិក គ.ជ.ប និងជាក្រុមប្រឹក្សាជំនុំជម្រះទាំង៩រូប បានបង្ហាញវត្តមាននៅក្នុងអង្គសវនាការវិញនៅម៉ោង៧យប់។
ប្រធានក្រុមប្រឹក្សាជំនុំជម្រះនិងជាប្រធាន គ.ជ.ប លោក ស៊ិក ប៊ុនហុក បានប្រកាសថាការស្នើសុំរបស់ដើមបណ្តឹងតំណាងឲ្យគណបក្សសង្គ្រោះជាតិ លោកថា គ.ជ.ប មិនអាចពិចារណាបានទេ ដោយថាការស្នើនោះមិនមានគតិយុត្តិផ្លូវច្បាប់សម្រាប់ឲ្យក្រុមប្រឹក្សាជំនុំជម្រះពិចារណាជឿបាន។
លោក ស៊ិក ប៊ុនហុក បន្តថា គ.ជ.ប សម្រេចថាការដែលក្រុមប្រឹក្សាឃុំ-សង្កាត់រក្សាទុកជនសង្ស័យទាំងជាង១០០នាក់នោះនៅក្នុងបញ្ជីបោះឆ្នោត លោកថាជារឿងត្រឹមត្រូវតាមទម្រង់ច្បាប់។
លោកថា៖ «ការលើកឡើងរបស់លោក សំ សុគង់ ដំណាងឲ្យដើមបណ្តឹងដែលអះអាងថា កូនក្តីខ្លួនស្គាល់គ្រួសារអ្នកទាំង៤រស់នៅភូមិផងរបងជាមួយគ្នា ហើយនិយាយភាសារខ្មែរមិនច្បាស់ និងលើកឡើងថាក្រុមប្រឹក្សាប្រជុំសម្រេចឃុំស្វាយជ្រុំ មិនបានពិចារណាពីមាត្រ១៦ និង១៧នៃច្បាប់សញ្ជាតិ ដែលត្រូវបានផ្តល់សញ្ជាតិតាមរយៈព្រះរាជ្យក្រិត្រ និងការស្បត់នៅចំពោះមុខតុលាការកំពូលនោះ។ ការលើកឡើងបែបនេះ មិនមានមូលដ្ឋានភ័ស្តុតាងគតិយុទ្ធ ដែលអាចឲ្យក្រុមប្រឹក្សាជំនុំជម្រះធ្វើការពិចារណាជឿបានឡើយ។ដោយហេតុថាសញ្ជាតិ របស់បុគ្គលម្នាក់ៗគេអាចសំគាល់បានតាមរយៈលិខិតយថាភូមិផ្លូវការ ចេញដោយអាជ្ញាធរមានសមត្ថកិច្ច»។
លោក ស៊ិក ប៊ុនហុក បន្តថាការស្នើសុំឲ្យ គ.ជ.ប ស៊ើបអង្កេតទៅលើជនសង្ស័យដែលមាននៅក្នុងពាក្យបណ្តឹងនោះ លោកថាមិនមែនជាដែនសមត្ថកិច្ចរបស់ គ.ជ.ប ទេ។
ប៉ុន្តែប្រធាន គ.ជ.ប រូបនោះទុកពេលឲ្យដើមបណ្តឹងប្តឹងករណីនេះទៅក្រុមប្រឹក្សាធម្មនុញ្ញ។
មេធាវីលោក សំ សុគង់ ប្រាប់អ្នកសារព័ត៌មានក្រោយបិទសវនាការថា លោកមិនទទួលយកការសម្រេចនេះទេ បើទោះបីលោកថាសវនាការនេះ ក្រុមប្រឹក្សាជំនុំជម្រះបានផ្តល់ឱកាសឲ្យភាគីដើមបណ្តឹងនិងភាគីចុងចម្លើយ បានការពារបណ្តឹងរៀងៗខ្លួនក៏ដោយ ក៏លោកថាជនសង្ស័យមួយចំនួនដែលមានឈ្មោះក្នុងបណ្តឹងមិនត្រូវបានគេអនុញ្ញាតិឲ្យមកបង្ហាញមុខក្នុងសវនាការពេលនេះទេ។
លោកថា៖ «នៅក្រុងប៉ៃលិនមួយមានចុងចម្លើយដល់ទៅ៣៥រូប បែរជាមកចូលរួមនៅថ្ងៃនេះមានតែ៣នាក់។បាត់ដល់ទៅ៣២រូប។ ហើយអ្នកដែលមក៣នេះ ហាក់ដូចមានលក្ខណៈរៀបចំ។ ប៉ុន្តែខ្ញុំមិនហានចោទថា គ.ជ.ប ទេ ប៉ុន្តែអាចមកពីកំហុសក្នុងការបញ្ជូនលិខិតអញ្ជើញឬក៏ជាកំហុសរបស់ក្រុមប្រឹក្សាឃុំ-សង្កាត់ មានចេតនាមួយមិនប្រគល់លិខិតហ្នឹងទៅចុងចម្លើយផ្សេងៗទៀត ដើម្បីចូលរួមសវនាការនៅពេលនេះឬមួយអាចថាអ្នកទាំង៣២រូបហ្នឹងជាជនជាតិបរទេស បានជាមិនហ៊ានឲ្យមកសវនការនៅថ្ងៃនេះ»។
នាយកប្រតិបត្តិអង្គការឃ្លាំមើលការបោះឆ្នោតខុមហ្វ្រែល លោក គល់ បញ្ញា លើកឡើងថា កាដែលអង្គការលោកនៅបន្តឃ្លាំមើលពីចំណាត់ការរបស់ គ.ជ.ប នៅឡើយ។ លោកថា ដូចនេះការវាយតម្លៃថា ការច្រានចោលបណ្តឹងជំទាស់សុំឲ្យលុបឈ្មោះជនបរទសមួយចំនួនចេញពីបញ្ជីបោះឆ្នោតនោះ អាចប៉ះពាល់ដល់គុណភាពបញ្ជីបោះឆ្នោតថ្មីឬក៏យ៉ាងណា មិនទាន់មានតួលេខសម្រាប់វាយតម្លៃនៅឡើយ។
ប៉ុន្តែលោក គល់ បញ្ញា បញ្ជាក់ថា គ.ជ.ប មានភារកិច្ចមួយសំខាន់ធ្វើឲ្យបញ្ជីបោះឆ្នោតថ្មីនេះមានគុណភាពដែលអាចឲ្យពលរដ្ឋទូទៅជឿបាន។
លោកថា៖ «គ.ជ.ប អាចផ្ទៀងផ្ទាត់ទៅនឹងប្រព័ន្ធទិន្ន័យហ្នឹងថា តើពិតជាអត្តសញ្ញាណប័ណ្ណសញ្ជាតិខ្មែរពិតប្រាកដឬក៏អត់ ដែលអ្នកកាន់មកចុះឈ្មោះបោះឆ្នោត ដែលគេសង្ស័យថាអ្នកកាន់មកចុះឈ្មោះបោះឆ្នោតហ្នឹង មិនមែនជាសញ្ជាតិខ្មែរ។ អញ្ចឹងត្រូវការផ្ទៀងផ្ទាត់ពិនិត្យមើលទៀត ដើម្បីឲ្យច្បាស់លាស់ថា គ.ជ.ប ពិតជាបានចុះឈ្មោះឲ្យអ្នកដែលគេសង្ស័យហ្នឹង ប៉ុន្តែពួកគេពិតជាមានអន្តសញ្ញាណប័ណ្ណសញ្ជាតិខ្មែរពិតប្រាកដមែន។ ត្រង់នេះ គ.ជ.ប អាចថារឿងនេះមិនមែនជាបន្ទុករបស់ខ្លួនទៀតទេ ជាបន្ទុករបស់អាជ្ញាធរ របស់រដ្ឋាភិបាល អីអញ្ចឹងទៅ។ ប៉ុន្តែ[គ.ជ.ប]ឲ្យច្បាប់ថាខ្លួនឯងថា បានទៅផ្ទៀងផ្ទាត់ថាពិតជាអត្តសញ្ញាណប័ណ្ណសញ្ជាតិខ្មែរហ្នឹងពិតប្រាកដមែន នេះជាយោបលខ្ញុំ ព្រោះនៅក្នុងច្បាប់ គ.ជ.ប ត្រូវធានាដែរលក្ខខណ្ឌចំពោះអ្នកមានសញ្ជាតិសម្រាប់ចុះឈ្មោះបោះឆ្នោតហ្នឹង»។
បើតាម គ.ជ.ប គិតត្រឹមថ្ងៃទី១៦ ខែមករា គឺមានបណ្តឹង១៤១២បានដល់ដៃ គ.ជ.ប ហើយ ក្នុងនោះបណ្តឹងប្តឹងជំទាស់ឲ្យលុបឈ្មោះដែលគេសង្ស័យថាមានជនជាតិវៀតណាមបន្លំចុះឈ្មោះបោះឆ្នោតនេះ មាន៧៦១បណ្តឹង ហើយ គ.ជ.ប នឹងបន្តសវនាការលើបណ្តឹងទាំងនោះរហូតដល់ថ្ងៃទី១៩ ខែមករា៕