ក្រុមអតីតតំណាងរាស្ត្រគណបក្សប្រឆំាង បានដាក់លិខិតមួយស្នើទៅតុលាការជាថ្មីទៀត ដោយថាដើម្បីសួរសុខទុក្ខលោក កឹម សុខា នៅពន្ធនាគារត្រពាំងផ្លុង និងរាយការណ៍ពីការវិវត្តនយោបាយនៅកម្ពុជា។
ក្នុងលិខិតរបស់ក្រុមអតីតតំណាងរាស្ត្រគណបក្សសង្គ្រោះជាតិ នៅមណ្ឌលខេត្តកំពង់ចាម ដែលដឹកនាំដោយលោក ម៉ៅ មុនីវណ្ណ ដាក់ទៅសាលាដំបូងរាជធានីភ្នំពេញ កាលពីថ្ងៃទី១៦ខែមករាម្សិលមិញនេះ បានឲ្យដឹងថា អតីតតំណាងរាស្ត្រ៥រូប និងសហការី១០នាក់ផ្សេងទៀត បានស្នើទៅចៅក្រមស៊ើបសួរលោក គី ឬទ្ធី ដើម្បីចូលសួរសុខទុក្ខលោក កឹម សុខា នៅពន្ធនាគារ នាថ្ងៃទី១៩ ខែមករា វេលាម៉ោង៩ព្រឹក ខណៈតុលាការមិនទាន់មានការឆ្លើយតបនៅឡើយ។
អតីតតំណាងរាស្ត្រគណបក្សសង្គ្រោះជាតិលោក ម៉ៅ មុនីវណ្ណ មានប្រសាសន៍បន្ថែមលើខ្លឹមសារលិខិតនោះថា ដើមចមដែលនាំឲ្យក្រុមតំណាងរាស្ត្រ និងសហការីមួយចំនួនទៀត ចង់ទៅសួរសុខទុក្ខលោក កឹម សុខា ដោយសារពួកគេចង់ដឹងពីសុខភាព ស្ថានភាពនៃការរស់នៅក្នុងពន្ធនាគារ និងរាយការណ៍ពីការវិវត្តនយោបាយនៅកម្ពុជាផងដែរ។
លោកមានប្រសាសន៍ថា«ធម្មតាសួរសុខទុក្ខគាត់[លោក កឹម សុខា]តើសុខភាពគាត់យ៉ាងម៉េច ទឹកចិត្តគាត់យ៉ាងម៉េច ជំហរនយោ បាយគាត់យ៉ាងម៉េច ដើម្បីយើងរាយការណ៍ពីស្ថានភាពនយោបាយមួយចំនួនផងទៅជូនគាត់ ដើម្បីឲ្យគាត់ដឹង»។
អ្នកនាំពាក្យសាលាដំបូងរាជធានីភ្នំពេញ លី សុផាណា បានអះអាងតាមសារតេឡេក្រាមនៅថ្ងៃនេះថា តុលាការបានបញ្ជូនលិខិតស្នើសុំរបស់អតីតតំណាងរាស្ត្របក្សប្រឆាំង ទៅចៅក្រមស៊ើបសួរ លោក គី ឬទ្ធី រួចហើយ ប៉ុន្តែលោកថា មិនទាន់មានការឆ្លើយតបថា យល់ព្រម ឬមិនព្រមនៅឡើយ។
អ្នកនាំពាក្យរូបនោះ បានបញ្ជាក់ថា បើតាមនីតិវិធីច្បាប់ នៅក្នុងក្រមនីតិវិធីព្រហ្មទណ្ឌមិនបានកំណត់រយៈពេលប៉ុន្មានថ្ងៃ ដើម្បី ឆ្លើយតបទៅនឹងការស្នើសុំសួរសុខទុក្ខអ្នកជាប់ឃុំនោះទេ ខណៈសំណុំរឿងនេះកំពុងស្ថិតនៅក្នុងដំណាក់ការស៊ើបសួរនៅឡើយ។
អ្វីដែលគួរឲ្យកត់សំគាល់ ចាប់ពីចាប់ខ្លួនអតីតប្រធានគណបក្សសង្គ្រោះជាតិលោក កឹម សុខា កាលពីដើមខែកញ្ញាឆ្នាំមុន រហូតដល់ថ្ងៃទី១៧ខែមករា ឆ្នាំ២០១៨នេះ ក្រុមអតីតតំណាងរាស្ត្របក្សប្រឆំាងបានដាក់លិខិតទៅតុលាការច្រើនដងមកហើយ ប៉ុន្តែតុលាការមិនអនុញាតឲ្យក្រុមអតីតតំណាងរាស្ត្របក្សប្រឆំាងចូលសួរសុខទុក្ខលោក កឹម សុខា នោះទេ ដោយអនុញាតឲ្យតែមេធាវីការពារក្តីចូលជួបតែប៉ុណ្ណោះ។
លោកមេធាវី សុក សំអឿន បានពន្យល់ថា នៅក្នុងច្បាប់មិនបានកំណត់ មិនឲ្យអ្នកដទៃទៅសួរសុខទុក្ខអ្នកជាប់ឃុំនោះទេ ទោះជាក្នុងដំណាក់កាលចៅក្រមស៊ើបសួរក៏ដោយ។ ប៉ុន្តែលោកថា បើតុលាការហាមមិនឲ្យក្រុមអតីតតំណាងរាស្ត្របក្សប្រឆំាងចូលសួរសុខទុក្ខលោក កឹម សុខា នឹងបង្ហាញពីការរិតត្បិតសិទ្ធិសេរីភាព។
លោកពន្យល់ថា«អត់មានច្បាប់ចែង ហាមក៏មិនហាម ឃាត់ក៏មិនឃាត់ ដ៏អត់មានច្បាប់ចែង តុលាការ ពន្ធនាគារធ្វើចឹងវាទៅជាបិទសិទ្ធិសេរីភាពវិញ វាទៅមើលឃើញរដ្ឋាភិបាលអាក្រក់…អាក្រក់វាអត់មានច្បាប់ អ្នកផ្សេងទៀតគេចូលមើលបាន ចូលជួបបានដ៏មនុស្សម្នាក់[លោក កឹម សុខា]ហ្នឹង ម៉េចក៏រើសអើងម៉្លេះ…បើវាមានច្បាប់ចែងថា អ្នកទោសនយោបាយ អ្នកទោសធ្ងន់ត្រូវអីចឹងទៅ…បានប៉ូលីសពន្ធនាគារ តុលាការធ្វើចឹងទៅវាសម»។
លោក កឹម សុខា ត្រូវបានសមត្ថកិច្ចចាប់ខ្លួនកាលពីដើមខែកញ្ញាឆ្នាំមុន ក្រោមការចោទប្រកាន់ពីរដ្ឋាភិបាលថា «ក្បត់ជាតិ» និង «ឃុបឃិត»ជាមួយបរទេស ដើម្បីផ្ដួលរំលំរដ្ឋាភិបាលស្របច្បាប់ដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន។
ចំណែកគណបក្សសង្គ្រោះជាតិ ដែលទទួលបានសំឡេងគាំទ្រពីពលរដ្ឋប្រហែល៣លានសំឡេង នៅក្នុងការបោះឆ្នោតជាតិឆ្នាំ២០១៣ និងការបោះឆ្នោតថ្នាក់ក្រោមជាតិនៅឆ្នាំ២០១៧កន្លងមកនេះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ខណៈដែលក្បាលម៉ាស៊ីនដឹកនាំ១១៨រូបរបស់បក្សនេះ ក៏ត្រូវបានដាក់ឲ្យស្ថិតក្រោមការហាមឃាត់ធ្វើនយោបាយរយៈពេល ៥ឆ្នាំផងដែរ។
ទោះជាយ៉ាងណា វិធានការទៅលើបក្សប្រឆាំង បានជំរុញឲ្យសហគមន៍អន្តរជាតិ ថ្កោលទោសទៅលើរដ្ឋាភិបាលកម្ពុជាដឹកនាំដោយបក្សកាន់អំណាច ដោយចាត់ទុកជាការដើរឃ្លាតចាកពីគន្លងលទ្ធិប្រជាធិបតេយ្យ និងរំលោភសិទ្ធិមនុស្ស៕