អង្គការសិទ្ធិមនុស្សអន្តរជាតិមួយ បានចាត់ចំណាត់ថ្នាក់ប្រទេសកម្ពុជាថា «គ្មានសេរីភាព» ដោយបានធ្លាក់ចុះបន្ថែមទៀត បន្ទាប់ពីប្រទេសនេះបានបង្ក្រាបទៅលើគណបក្សប្រឆាំង ប្រព័ន្ធផ្សព្វផ្សាយឯករាជ្យ និងអង្គការស៊ីវិលមួយចំនួន កាលពីឆ្នាំកន្លងមកនេះ។
នៅក្នុងរបាយការណ៍សេរីភាពពិភពលោកឆ្នាំ២០១៨ ដែលត្រូវបានដាក់ចំណងជើងថា «ប្រជាធិបតេយ្យស្ថិតក្នុងវិបត្តិ» ចេញកាលពីថ្ងៃម្សិលមិញនោះ អង្គការ Freedom House បានដាក់វាយតម្លៃកម្ពុជាត្រឹមតែ ៣០ពិន្ទុ នៅក្នុងចំណោមពិន្ទុសរុប ១០០ សម្រាប់ឆ្លុះបញ្ចាំងពីកម្រិតសេរីភាពនៅតាមបណ្ដាប្រទេសនានានៅទូទាំងពិភពលោក។
ជាមួយកម្រិតពិន្ទុបែបនេះ ប្រទេសកម្ពុជាត្រូវបានអង្គការនេះ ចាត់ចូលក្នុងចំណោមប្រទេស «គ្មានសេរីភាព»។ មិនត្រឹមតែស្ថិតក្នុងកម្រិត «គ្មានសេរីភាព» នោះទេ ប៉ុន្តែ អង្គការនេះបានវាយតម្លៃថា ស្ថានភាពសេរីភាពនៅក្នុងប្រទេសកម្ពុជា បានធ្លាក់ចុះបន្ថែមទៀត បន្ទាប់ពីការបង្ក្រាបទៅលើគណបក្សប្រឆាំងដ៏ធំនៅក្នុងប្រទេសនេះ។
គណបក្សសង្គ្រោះជាតិ ដែលទទួលបានសំឡេងគាំទ្រពីប្រជាពលរដ្ឋប្រហែល ៣លានសំឡេងនៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ទៅតាមបណ្ដឹងក្រសួងមហាផ្ទៃ ហើយអាសនៈជាប់ឆ្នោតរបស់បក្សនេះ តាំងពីថ្នាក់ជាតិរហូតដល់ថ្នាក់មូលដ្ឋាន ត្រូវបានដកហូត និងបែងចែកទៅឲ្យគណបក្សនយោបាយផ្សេង ដែលមិនទទួលបានអាសនៈនៅក្នុងការបោះឆ្នោតកន្លងមក។
ជាងនេះទៅទៀត មេដឹកនាំបក្សប្រឆាំង លោក កឹម សុខា នៅតែបន្តស្ថិតនៅក្រោមការឃុំខ្លួននៅក្នុងពន្ធនាគាររហូតមកដល់បច្ចុប្បន្ននេះ ចាប់តាំងពីលោកត្រូវបានសមត្ថកិច្ចចាប់ខ្លួនកាលពីដើមខែកញ្ញាឆ្នាំមុន ក្រោមការចោទប្រកាន់ពីរដ្ឋាភិបាលថា «ក្បត់ជាតិ»។
ក្រៅពីចំណាត់ការទៅលើបក្សប្រឆាំង អង្គការដែលមានមូលដ្ឋាននៅរដ្ឋធានីវ៉ាស៊ីងតោនមួយនេះ បាននិយាយក្នុងរបាយការណ៍នោះទៀតថា សេរីភាពនៃការបញ្ចេញមតិនៅក្នុងប្រទេសកម្ពុជា បានរងផលប៉ះពាល់ បន្ទាប់ពីអាជ្ញាធរប្រទេសនេះ បានបិទកាសែតឯករាជ្យ ខេមបូឌា ដេលី ការជំរុញឲ្យស្ថានីយ៍វិទ្យុជាច្រើន បិទការផ្សាយ និងការប្រកាសរបស់រដ្ឋាភិបាលថា ការចែករំលែកមតិរិះគន់នៅលើបណ្ដាញសង្គម គឺជា«បទល្មើស»នោះ។
ទោះជាយ៉ាងណា កម្ពុជាស្ថិតក្នុងចំណោមប្រទេសជាច្រើនទៀតនៅក្នុងតំបន់អាស៊ី ដូចជា ថៃ ភូមា វៀតណាម និងឡាវ និងប្រទេសជាច្រើននៅតំបន់អាហ្វ្រិក ដែលអង្គការ Freedom House ចាត់ថ្នាក់ជាប្រទេស «គ្មានសេរីភាព»៕
