រដ្ឋមន្ត្រីក្រសួងមហាផ្ទៃជំរុញឲ្យក្រសួងសាធារណៈការ ពង្រឹងបច្ចេកទេស ក្នុងការកសាងផ្លូវ ដើម្បីរក្សាស្តង់ដារ និង សុវត្ថិភាព ជូនពលរដ្ឋ ខណៈលោកថា កន្លងមកផ្លូវមួយចំនួនកសាងឡើងឆាប់ខូចខាតទៅវិញ។
ទីភ្នាក់ងារព័ត៌មានកម្ពុជាAKPដកស្រង់ប្រសាសន៍របស់រដ្ឋមន្ត្រីក្រសួងមហាផ្ទៃលោក ស ខេង ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៧ របស់ក្រសួងសាធារណការ និងដឹកជញ្ជូនកាលពីថ្ងៃ១៦ មករាម្សិលមិញ ដោយលោក ស ខេង បានលើកឡើងថាកន្លងមក ការសាងសង់ផ្លូវមួយចំនួនអនុវត្ដន៍បានត្រឹមត្រូវ និងមានគុណភាពល្អ តែផ្លូវមួយចំនួនទៀតខ្វះគុណភាព។ លោកបន្តថា ជាក់ស្ដែងផ្លូវជាតិលេខ៨ តភ្ជាប់ពីផ្លូវជាតិលេខ៦អា ទៅកាន់ផ្លូវជាតិលេខ៧ ដែលជាផ្លូវទើបសាងសង់ថ្មី ប៉ុន្ដែរហូតមកដល់ពេលនេះហាក់ដូចជាមានសភាពទ្រុឌទ្រោមជាងផ្លូវចាស់ពីមុនទៅទៀត។
លោកបន្ថែមថា រហូតមកដល់ពេលនេះ ផ្លូវជាតិលេខ៨ ត្រូវបានជួសជុលជាបន្ដបន្ទាប់ ប៉ុន្ដែនៅតែមិនធានាគុណភាព និងការប្រើប្រាស់មិនបានជាប់ល្អនោះទេ។
លោកជំរុញឲ្យក្រសួងសាធារណៈពិនិត្យឡើងវិញឲ្យបានច្បាស់ និងត្រឹមត្រូវតាមលក្ខណៈបច្ចេកទេសផ្លូវ និងស្នើឲ្យកែទម្រង់រចនាសម្ព័ន្ធគណៈកម្មាធិការចម្រុះត្រួតពិនិត្យយានយន្តដឹកជញ្ជូនលើសទម្ងន់ ពង្រឹងការសហប្រតិបត្តិការណ៍ និងពង្រឹងការគ្រប់គ្រងការកែច្នៃយានយន្តដើម្បីរក្សារបៀបរៀបរយ សុវត្ថិភាព និងរក្សាភាពមាំទាំនៃផ្លូវថ្នល់។
អ្នកនាំពាក្យក្រសួងសាធារណៈការលោក វ៉ាស៊ឹម សុរិយា បានទទួលស្គាល់ថាផ្លូវមួយចំនួននៅកម្ពុជានៅមិនទាន់បំពេញគុណភាពនៅឡើយទេ ដោយសារស្ថានភាពដី និងទឹកនៅតំបន់ទាំងនោះ។
លោកថា៖ «យើងពិនិត្យមើលជាទូទៅផ្លូវណាថ្មីចែសហ្មង ងាយនឹងរងការខូចខាតខ្លាំងជាពិសេសនៅតំបន់ណា ដែលមានទឹកឬចំទឹកព្រោះអីពេលខ្លះដាច់ទាំងកង់ៗ តែម្តង។ គ្រាន់តែចង់ជម្រាបអញ្ចេសថា ជាទូទៅអ្នកប្រឹក្សាគាត់សិក្សា ជាពិសេសថាឥឡូវហ្នឹងយើងកំពុងគិតមើលពីទីប្រឹក្សាបច្ចេកទេសពេលខ្លះគាត់បើកមាត់ទឹកតូច យើងអត់មានយោបល់ទេក៏ប៉ុន្តែនៅពេលដែលផ្លូវវាខូច។ អាហ្នឹងយើងត្រូវកែលំអ ហើយគាត់ទៅបាត់ហើយ»។
លោកបន្ថែមថា ក្រសួងបានចាប់ឲ្យក្រុមហ៊ុនទាំងនោះសងចំពោះការខូចខាត និងទទួលខុសត្រូវចំពោះការធ្វេសប្រហែសទាំងនេះ។
បច្ចុប្បន្ននេះ ផ្លូវថ្នល់រួមទាំងផ្លូវជាតិ និងផ្លូវខេត្ដមានប្រវែង សរុប១៦ ២៩២គីឡូម៉ែត្រ ក្នុងនោះចាក់កៅស៊ូ និងបេតុងប្រវែង៨ ៥២៦គីឡូម៉ែត្រ ស្មើនឹងជាង៥២ភាគរយនៃប្រវែងផ្លូវសរុបនៅទូទាំងប្រទេស។
កាលពីអំឡុងខែកក្កដា ឆ្នាំ២០១៧ រដ្ឋមន្ត្រីក្រសួងសាធារណការ និង ដឹកជញ្ជូន លោក ស៊ុន ចាន់ថុល ថ្លែងថា រដ្ឋាភិបាលចំណាយលុយជិត២០០លានដុល្លារក្នុង១ឆ្នាំដើម្បីជួសជុល និង ថែទាំផ្លូវ។