បណ្តាញព្រះសង្ឃឯករាជ្យ អំពាវនាវឲ្យអតីតគណបក្សប្រឆាំង ប្រុងប្រយ័ត្នពីការបែកបាក់ផ្ទៃក្នុង ដោយជំរុញថា មិនត្រូវធ្វើចលនានយោបាយណាមួយ បង្កឲ្យមានការបែកបាក់ផ្ទៃក្នុងនោះទេ។
តុលាការកំពូល បានរំលាយអតីតគណបក្សសង្គ្រោះជាតិ កាលពីថ្ងៃទី១៦វិច្ឆិកាឆ្នាំ២០១៧ ដោយចោទថ្នាក់ដឹកនាំថាបានប្រព្រឹត្តិបទល្មើស«ក្បត់ជាតិ» ហាមមន្ត្រី១១៨រូប មិនឲ្យធ្វើនយោបាយរយៈពេល៥ឆ្នាំ និងចាប់ឃុំខ្លួនលោក កឹម សុខា។
ប៉ុន្តែចំណាត់ការនេះត្រូវសហគមន៍អន្តរជាតិបានថ្កោលទោសនិងគំរាមដាក់ទណ្ឌកម្មសេដ្ឋកិច្ច បើរដ្ឋាភិបាលកម្ពុជាមិនធ្វើឲ្យស្ថានការវិលទៅរកស្ថានភាពដើមវិញនោះ។
សេចក្តីថ្លែងការណ៍ចុះថ្ងៃទី១៧ខែមករា បណ្តាញព្រះសង្ឃលើកឡើងថា ខ្លួនមានការព្រួយបារម្ភចំពោះស្ថានភាពនយោបាយ និងជោគវាសនារបស់ប្រទេសកម្ពុជា។
បណ្តាញព្រះសង្ឃឯករាជ្យបន្តថា«ថ្នាក់ដឹកនាំគណបក្សសង្គ្រោះជាតិត្រូវតែរក្សាជំហរឲ្យបានរឹងមាំ ដើម្បីការពារទឹកចិត្តពលរដ្ឋ និងរឹតចំណងមិត្តភាពជាមួយដៃគូអន្តរជាតិឲ្យកាន់តែរឹងមាំថែមទៀត មិនត្រូវសម្រេចចិត្តធ្វើចលនានយោបាយណាមួយដែលខ្វះផែនការណ៍យុទ្ធសាស្ត្រ ហើយបង្កការបែកបាក់កម្លាំងខ្មែរស្នេហាជាតិនោះទេ»។
ទោះជាយ៉ាងណាបណ្តាញព្រះសង្ឃឯករាជ្យអះអាងថាគណបក្សសង្គ្រោះជាតិពិតជាបានរងគ្រោះដោយតុលាការ និងរដ្ឋាភិបាលក្រុងភ្នំពេញក៏ដោយ តែថាគណបក្សនេះនៅមានព្រះសង្ឃខ្មែរគាំទ្រមានពលរដ្ឋខ្មែរជាងបីលាននាក់បន្តគាំទ្រ ហើយថាមានអន្តរជាតិនៅជាមួយគ្រប់ពេល។
សេចក្តីថ្លែងការណ៍ របស់បណ្តាញព្រះសង្ឃឯករាជ្យនេះ បានធ្វើឡើងក្រោយពីអតីតប្រធានគណបក្សសង្គ្រោះជាតិ លោកសម រង្ស៊ី នៅប៉ុន្មានថ្ងៃមុននេះ បានប្រកាសបង្កើតចលនាសង្គ្រោះជាតិ ដែលលោកថាចលនានេះ នឹងជំរុញឲ្យដោះលែងលោក កឹម សុខា និងថាជំរុញឲ្យគណបក្សសង្គ្រោះជាតិបានចូលរួមបោះឆ្នោតឡើងវិញ។
ប៉ុន្តែបញ្ជីឈ្មោះក្រុមការងារ ដែលលោក សម រង្ស៊ី គ្រោងបង្កើតនោះ គ្មានឈ្មោះមន្ត្រីស្និទ្ធនឹងលោក កឹម សុខា ទេ ករណីនេះបង្កឲ្យអតីតំណាងរាស្ត្របក្សប្រឆាំងមួយចំនួនរិះគន់ពីការប្រកាសរបស់លោក សម រង្ស៊ី៕
