រដ្ឋាភិបាលមីយ៉ាន់ម៉ានិងបង់ក្លាដេសបានព្រមព្រៀងគ្នាក្នុងការបញ្ជូនជនជាតិភាគតិចរ៉ូហ៊ីងយ៉ាឲ្យត្រឡប់ចូលទឹកដីមីយ៉ាន់ម៉ាវិញតាមការកំណត់ជាដំណាក់កាលគឺ១សប្តាហ៍ចំនួន១៥០០នាក់ ហើយត្រូវការរយៈពេលប្រមាណ២ឆ្នាំទើបបញ្ជូនបានអស់។
របាយការណ៍ចុងក្រោយបង្ហាញថា ជនជាតិរ៉ូហ៊ីងយ៉ាដែលរត់គេចចេញពីប្រទេសមីយ៉ាន់ម៉ាទៅកាន់ប្រទេសបង់ក្លាដេសមានចំនួន៧៤០ ០០០នាក់ ចាប់តាំងពីក្រុមយោធាមីយ៉ាន់ម៉ាបើកយុទ្ធនាការបង្ក្រាបលើក្រុមនេះនៅក្នុងរដ្ឋរ៉ាឃីនកាលពីអំឡុងឆ្នាំ២០១៦ និង ២០១៧។ បច្ចុប្បន្នអ្នកទាំងនោះត្រូវបានអង្គការសហប្រជាជាតិ និង អង្គការសប្បុរសធម៌ធំៗរៀបចំជាជុំរុំឲ្យស្នាក់នៅក្នុងប្រទេសបង់ក្លាដេស និង ផ្គត់ផ្គង់អាហារ។
បើទោះជារដ្ឋាភិបាលនៃប្រទេសទាំងពីរបានព្រមព្រៀងគ្នាក្នុងធ្វើមាតុភូមិនិវត្តន៍នៃជនជាតិភាគតិចទាំងនេះក៏ដោយ ក៏អ្នកតាមដានស្ថានភាពនេះនៅតែមានការព្រួយបារម្ភថា ហិង្សាអាចនឹងកើតមានឡើងទៀតដោយសារពួកយោធាមីយ៉ាន់ម៉ា មានការរើសអើងក្រុមជនជាតិភាគតិចនេះ។
ពេលរដ្ឋាភិបាលបង់ក្លាដេសក៏កំពុងតែសហការជាមួយមីយ៉ាន់ម៉ា ក្នុងការរៀបចំបញ្ជូនកុមារដែលមិនមានឪពុកម្តាយ និង កុមារដែលកើតក្នុងស្ថានភាពមានបង្ក្រាបគឺជាកូនដែលកើតពីស្ត្រីដែលរងគ្រោះដោយសារការរំលោភបំពានផ្លូវភេទ៕
