អង្គការCCIMដំណើរការកម្មវិធីទូរស័ព្ធសម្រាប់​ឲ្យអ្នកសារព័ត៌មានពលរដ្ឋរាយការណ៍ព័ត៌មាន

ដោយ លោក ហ៊ុន សិរីវឌ្ឍន៍​​ | ថ្ងៃពុធ ទី១៧ ខែកុម្ភៈ ឆ្នាំ២០១៦​ ម៉ោង 5:48 PM | ការអប់រំបច្ចេកវិទ្យា | 0 | 6091

មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) នៅថ្ងៃព្រហស្បតិ៍នេះ សម្ពោធកម្មវិធីទូរស័ព្ធថ្មីមួយដែលមានឈ្មោះថា News Wire ដែលកម្មវិធីនេះអនុញ្ញាតឲ្យប្រជាពលរដ្ឋអ្នកសារព័ត៌មានអាចរាយការណ៍ព័ត៌មានដែលខ្លួនបានជួប។

ក្នុងពិធីសម្ពោធកម្មវិធីទូរស័ព្ទថ្មីនេះដែលធ្វើឡើងនៅសណ្ឋាគារកាំបូឌីយ៉ាណាក្នុងរាជធានីភ្នំពេញ អ្នកគ្រប់គ្រងគម្រោង News Wire នៃអង្គការCCIM លោកស្រី ហុក ណារិន បានមានប្រសាសន៍ថា កម្មវិធីទូរស័ព្ទថ្មីនេះនឹងជួយសម្រួលដល់ពលរដ្ឋអ្នកសារព័ត៌មានក្នុងការរាយការណ៍ព័ត៌មាន ឬហេតុការណ៍ដែលពួកគេបានឃើញ។ ទោះយ៉ាងណា លោកស្រីបញ្ជាក់ថា កម្មវិធីទូរស័ព្ធ News Wire នេះ ដំណើរការតែលើប្រព័ន្ធ Android ប៉ុណ្ណោះ ហើយពលរដ្ឋអ្នកសារព័ត៌មានត្រូវចុះឈ្មោះជាមុន ដោយត្រូវទាក់ទងទៅអង្គការCCIM ដើម្បីទទួលគណនេយ្យ សម្រាប់អាចរាយការណ៍ និងមើលព័ត៌មានដែលត្រូវបានរាយការណ៍តាមកម្មវិធីទូរស័ព្ទនេះបាន។

លោកស្រី ហុក ណារិន ឲ្យដឹងដែរថា បច្ចុប្បន្ននេះមានពលរដ្ឋអ្នកសារព័ត៌មានចំនួន៨៥ដែលត្រូវបានបណ្តុះបណ្តាល និងជាសមាជិកនៃ News Wire រួមមានទាំងកម្មកររោងចក្រ និងស្ត្រីធ្វើការផ្នែកសេវាកំសាន្ត។ លោកស្រីបន្តថា អ្នកសារព័ត៌មានអាជីពក៏អាចប្រើប្រាស់កម្មវិធីទូរស័ព្ទក៏អាចប្រើប្រាស់កម្មវិធីនេះផងដែរ ដើម្បីទទួលបានព័ត៌មានដែលពលរដ្ឋរាយការណ៍ តែត្រូវចុះឈ្មោះជាមុនដូចគ្នា។

នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យលោក ប៉ា ងួនទៀង មានប្រសាសន៍ថា កម្មវិធីទូរស័ព្ទ News Wire នេះជាគម្រោងតូចតែមានន័យវែង ដោយលោកសង្ឃឹមថា ទៅថ្ងៃអនាគត វាអាចជាឃ្លាំងឯកសារមួយសម្រាប់អ្នកសារព័ត៌មាន។ លោកក៏បានសង្កត់ធ្ងន់ផងដែរថា បច្ចុប្បន្ននេះមានការគាបសង្កត់មួយចំនួនទៅលើប្រព័ន្ធផ្សព្ធផ្សាយ តែលោកថាបច្ចេកវិទ្យាទាំងអស់នេះអាចធ្វើការរំលងការគាបសង្កត់ទាំងនោះបាន៕

សរសេរមកកាន់ លោក ហ៊ុន សិរីវឌ្ឍន៍ តាមរយៈ sirivadh@vodhotnews.com

ចាប់អារម្មណ៍នឹងព័ត៌មានប្រភេទនេះ? ចុះឈ្មោះដើម្បីទទួលបានព័ត៌មានថ្មីៗ

Fields marked with an * are required