ប្រជាពលរដ្ឋរស់នៅក្នុងភូមិសែនសិរីមង្គល ឃុំក្រយា ស្រុកសន្ទុក ខេត្តកំពង់ធំ ទាំងបុរស
ស្រ្តី និងកុមារប្រមាណ១៣០នាក់ បានទទួលការពិនិត្យជំងឺនិងទទួលថ្នាំដោយឥតគិតថ្លៃ ពីក្រុមគ្រូពេទ្យរបស់
អង្គការ លីកាដូ នៅព្រឹកថ្ងៃទី១៧ ខែកុម្ភៈឆ្នាំ២០១៧។
លោក ប៊ឹម មឿន មានអាយុ៧៦ឆ្នាំ ដែលបានមកពិនិត្យសុខភាពមានប្រសាសន៍ថា លោករីករាយណាស់ដែលបានអង្គការមកពិនិត្យជំងឺនិងចែកថ្នាំ ដោយថារាល់ថ្ងៃគាត់មានការលំបាកដោយមានជំងឺលើសសម្ពាធឈាម ពុំមានប្រាក់ក្នុងការទៅពេទ្យ ម្យ៉ាងពេទ្យនៅឆ្ងាយផង។
ប្រជាពលរដ្ឋម្នាក់ទៀតគឺលោក សំ យ៉ុន អាយុ៦៥ឆ្នាំ ដែលបានមកពិនិត្យជំងឺបានឲ្យដឹងថា៖ «ពលរដ្ឋនៅក្នុងភូមិភាគច្រើនមានជីវភាពក្រីក្រ ពុំមានលទ្ធភាពព្យាបាលជំងឺ ហើយអាជ្ញាធរពុំដែលចុះពិនិត្យនិងព្យាបាលជូនប្រជាពលរដ្ឋទេ»។
លោក ញ៉ូង សាមឿន មន្ត្រីសម្របសម្រួល អង្គការ លីកាដូ ប្រចាំខេត្តកំពង់ធំ មានប្រសាសន៍ថា ពលរដ្ឋនៅទីនេះ មានជីវភាពក្រីក្រខ្លាំង ពុំមានលទ្ធភាពទៅរកសេវាសុខភាពដូចពលរដ្ឋដទៃ ហើយម្យ៉ាងជាតំបន់ដាច់ស្រយាល ដែលពួកគាត់ជួបការលំបាកក្នុការទៅទទួលសេវាសុខភាព។
លោកវេជ្ជបណ្ឌិត ញាណ សារិន ដែលបានពិនិត្យជំងឺជូនពលរដ្ឋមានប្រសាសន៍ថា ពលរដ្ឋគ្រប់គ្នាសុទ្ធតែមានមានជំងឺ ហើយខ្លះមានជំងឺរលាកក្រពះ និងជំងឺពោះវៀនគឺភាគច្រើន និងមួយចំនួនទៀត លើសសម្ពាធឈាម ហើយអ្នកជំងឺមួយចំនួនទាមទារឲ្យមានការពិនិត្យព្យាបាលបន្ត៕
ដោយពលរដ្ឋអ្នកសារព័ត៌មានខេត្តកំពង់ធំ លោក ហ៊ុន ឌីម៉ូ