អ្នកឃ្លាំមើលនិងអត្ថាធិប្បាយបញ្ហាសង្គម លោក គឹម សុខ និងអ្នកគាំទ្ររាប់រយនាក់ផ្សេងទៀត បានទៅដល់សាលាដំបូងរាជធានីភ្នំពេញនៅម៉ោង១១ព្រឹកថ្ងៃសុក្រ ដើម្បីបំភ្លឺតាមការកោះហៅរបស់អយ្យការតាមបណ្តឹងរបស់លោកនាយករដ្ឋមន្ត្រី ហ៊ុន សែន។
លោក គឹម សុខ ព្រះសង្ឃ និងប្រជាពលដ្ឋចេញពីវត្តចាស់នៅត្រើយម្ខាងនៃទន្លេ ហើយបានធ្វើដំណើរដោយថ្មើរជើងកាត់ស្ពានជ្រោយចង្វារ បន្តតាមផ្លូវព្រះមុនីរ៉េត និងបត់តាមផ្លូវសហព័ន្ធរុស្ស៊ី កាត់មុខទីស្តីការគណៈរដ្ឋមន្ត្រី ដល់ចំណុចក្តាន់ពីរទើបបត់ឆ្ពោះទៅសាលាដំបូង។ ដំបូងឡើយមានតែលោក គឹម សុខ និងព្រះសង្ឃ៤ទៅ៥អង្គ ក្រោយមកប្រជាពលរដ្ឋចូលរួមកាន់តែច្រើនពីរាប់រយទៅខ្ទង់ពាន់នាក់។
តាមគម្រោងក្នុងដីកាតម្រូវឲ្យលោក គឹម សុខ ទៅដល់បន្ទប់សាកសួរនៅម៉ោង៩ព្រឹក ប៉ុន្តែលោក គឹម សុខ បានទៅដល់នៅម៉ោង១១ព្រឹក។ គេនៅមិនទាន់ដឹងថា ការទៅបំភ្លឺយឺតនេះ តុលាការមានចំណាត់ការយ៉ាងណាចំពោះលោក គឹម សុខ នៅឡើយទេ៕