អ្នកមានជម្លោះដីធ្លី ប្រមាណ៥០នាក់នាព្រឹកថ្ងៃសុក្រនេះ បានប្រមូលផ្ដុំគ្នានៅខាងមុខតុលាការនៅខេត្ដសៀមរាបតវ៉ាជាថ្មីទៀត ដោយទាមទារឲ្យស្ថាប័នេះដោះលែងតំណាងពួកគាត់ ដោយអះអាងថាការឃុំខ្លូននេះ ជារឿងអយុត្ដិធម៌។
តំណាងសហគមន៍ដីធ្លីមួយរូបនៅភូមិត្បែងលិច ឃុំត្បែងស្រុកបន្ទាយស្រី គឺលោក ចាន់ រិទ្ធ ត្រូវបានតុលាការឃុំខ្លួនកាលពីថ្ងៃទី២០ ខែមករា ឆ្នាំ២០១៧នេះ ដោយចោទប្រកាន់ពីបទឆបោកទឹកប្រាក់ជិត៣ម៉ឺនដុល្លា ពីឈ្មួញទិញដីឈ្មោះ យឹម សារីន។
ប៉ុន្ដែក្រុមអ្នកតវ៉ា មកពីសហគមន៍ស្រុកស្វាយលើនិងស្រុកបន្ទាយស្រីប្រាប់វីអូឌី ស្រដៀងគ្នា នៅខាងមុខតុលាការថា តំណាងសហគមន៍ដីធ្លីលោក ចាន់ រិទ្ធ មិនបានប្រព្រឹត្ដដូចការចោទប្រកាន់នោះទេ ដោយថា តំណាងរូបនោះ មានដីធ្លីលក់ឲ្យឈ្មួញដីពិតប្រាកដ ប៉ុន្ដែលោក យឹម សារីន ដែលជាឈ្មួញទិញនោះមិនបានទៅមើលដីឲ្យបានច្បាស់លាស់។
ពួកគាត់បញ្ជាក់ថា ដីធ្លីដែលលោក ចាន់ រិទ្ធ លក់ឲ្យឈ្មួញរូបនោះជាដីពលរដ្ឋន៍មានលិខិបញ្ជាក់ត្រឹមត្រូវ ហើយពួកគាត់យល់ព្រមឲ្យលោក ចាន់ រិទ្ធ ធ្វើជាតំណាង និងទទួលលុយពីក្រុមឈ្មួញទិញដី។ ពួកគាត់បន្ថែមថា ការចាប់ឃុំខ្លួតំណាងរូបនោះ ពួកគាត់ចង់បំបែកសហគមន៍ដីធ្លីមិនឲ្យធ្វើការតវ៉ារកដំណោះស្រាយ។
ពួគេទាមទារឲ្យតុលាការដោះលែងឲ្យស៊ើបអង្កេតឲ្យច្បាស់មុនធ្វើការចោទប្រកាន់តំណាងពួកគាត់។ ពួកគាត់បន្ដថា៖ «ដោះលែងចាន់រិទ្ធហៅឈ្មួញ ដីបើសិនចាន់រិទ្ធ អត់មានដីឲ្យចំនួន៥ហិកតានោះ ពួកខ្ញុំនឹងឲ្យចាប់ចាន់រិទ្ធដាក់គុកវិញបើគាត់មានដីឲ្យត្រូវតែដោះលែងថ្ងៃនេះ»។
អ្នកភូមិ មកពីស្រុកបន្ទាយស្រី និងជាកូនប្រុសលោក ចាន់ រិទ្ធ គឺលោក ចាន់ រតនៈ បានឲ្យដឹងថាឈ្មួញទិញដីឈ្មោះ យឹម សារីន និងបក្សពួកបានញុះញង់ឲ្យប្រជាសហគមន៍លក់ដីរដ្ឋដោយខុសច្បាប់ ប៉ុន្ដែបែជាតុលាការចោទប្រកាន់ឪពុករបស់លោកទាំងអយុត្ដិធម៌ទៅវិញ។ ជាមួយគ្នានោះដែរ លោកថា ឪពុករបស់លោកបានប្ដឹងលោក យឹម សារីន ពីការប៉ុនប៉ងមនុស្សឃាត ដោយចេតនា ប៉ុន្ដែតុលាការនេះមិនផ្ដល់យុត្ដិធម៌នោះទេ។
លោកបន្ថែមថា៖ «ស៊មគ្រលំគ្នា ធ្វើម៉េចដើម្បីឲ្យ លោក ចាន់ រិទ្ធ ជាប់គុកដើម្បីឲ្យពួកគាត់ ចាត់ចែងរឿងដីធ្លី នៅជើងភ្នំឲ្យដោះស្រាយ ស្រួលខ្ញុំសុំដាក់ពាក្យប្ដឹង ទៅលើបុគ្គល យឹម សារីន អាយុ៣៧ឆ្នាំ ដែលមានទីលំនៅនៅសាលាកំរើកនិងគូរកន ពីបទប៉ុនប៉ងមនុស្សឃាតដោយចេតនានៅឃុំត្បែងស្រុកបន្ទាយស្រី»។
ករណីនេះលោក យឹម សារីន មានប្រសាសន៍ថា លោកចង់ឲ្យតំណាងសហគមន៍រូបនោះ ឬអ្នកណាម្នាក់បង្ហាញដីនិងធ្វើប្លង់កម្មសិទ្ធឲ្យបានច្បាស់លាស់ ដែលលោកថា ដីដែលធ្លាប់ព្រមព្រៀងគ្នាទិញលក់ មិនមែនដីសហគមន៍។
ជាមួយគ្នានោះ ដែរលោកបដិសេធមិនជាប់ពាក់ព័ន្ធ នឹងការបាញ់ប្រហារទៅលើផ្ទះលោក ចាន់ រិទ្ធ នោះដែរ ដែលថា គ្មានប្រយោជន៍អ្វីដល់លោកទេ។
លោកបន្ដថា៖ «ខ្ញុំចង់ជួបចាន់រិទ្ធនៅថ្ងៃណាមួយបើសិនជាអាច តាមរយៈបងនិងអង្គការចង់ជួបដោះស្រាយជាមួយគាត់ថាគាត់យកលុយខ្ញុំនេះទិញដីនៅកន្លែងណាហើយដីដែលគាត់យកលក់ឲ្យខ្ញុំមានឬអត់បើគាត់មានឲ្យបងប្អូនគាត់ទៅបង្ហាញធ្វើការផ្ទេរសិទ្ធិមកខ្ញុំអត់ចង់ឲ្យបងសួរខាងណោះឆ្លើយចឹងទៅសួរខ្ញុំឆ្លើយចឹងទៅ»។
វីអូឌី មិនទាន់អាចទាក់ទង ព្រះរាជអាជ្ញា អមសាលាដំបូងខេត្ដសៀមរាបលោក កើត វណ្ណារ៉េត បានទេនៅរសៀលថ្ងៃសុក្រនេះ ដោយលោកមិនលើកទូរសព្ទ។
ទោះជាយ៉ាងនេះក្ដី អ្នកឃ្លាំមើលការរំលោភសិទ្ធិមនុស្ស នៃអង្គការលីកាដូខេត្ដសៀមរាបលោក ចៅ ល័ក្ខវណ្ណា មានប្រសាសន៍ថា រឿងដែលពលរដ្ឋថា មានដីសម្រាប់ប្រគល់ឲ្យ យឹម សារីន នោះលោកគ្មានសិទ្ធិស៊ើបអង្កេតនោះទេ ប៉ុន្ដែលោកថា ភាគីទាំងពីរគួរមានដំណោះស្រាយ សមសមស្របតាមនិតិវិធី ដោយលោកថាកន្លងមក ពួកគេធ្លាប់មានទំនាក់ទំនងល្អជាមួយគ្នា៕
