សាលារាជធានីភ្នំពេញបានណែនាំឲ្យម្ចាស់រថយន្តដឹកទំនិញធំៗ ចេញនិងចូលភ្នំពេញ តាមផ្លូវជាតិ៤និងផ្លូវជាតិលេខ៥ ត្រូវវាងនៅចំណុចមួយចំនួន ដោយបញ្ជាក់ថាកំណាត់ផ្លូវខ្លះ ត្រូវពង្វាងដោយសារតែត្រូវជួសជុលនិងពង្រីកបន្ថែម។
សេចក្តីជូនដំណឹងរបស់សាលារាជធានីភ្នំពេញ ចុះថ្ងៃទី១៧ ខែកុម្ភៈ បានឲ្យដឹងថា គិតចាប់ពីថ្ងៃទី១៥ ខែកុម្ភៈ ឆ្នាំ២០១៧ ការពង្រីកកំណត់ផ្លូវជាតិលេខ៤ ចាប់ពីផ្លូវកប់ស្រូវដល់រង្វង់មូលចោមចៅសម្រេចបាន៧០% ហើយពេលនេះ ការដ្ឋានកំពុងជំរុញល្បឿនសាងសង់ តែមានការកកស្ទះចរាចរណ៍។ ចំណែកការពង្រីកផ្លូវជាតិលេខ៥ ចំនួន២ការដ្ឋាន នៅចំណុចស្វាយប៉ាកនិងចំណុចឬស្សីកែវ ក៏កំពុងដំណើរការតែមានការកកស្ទះខ្លាំង។
សាលារាជធានីបានណែនាំឲ្យយានយន្តដឹកទំនិញគ្រប់ប្រភេទនិងដឹកអ្នកដំណើរធំៗ ដែលធ្វើដំណើរចូលរាជធានីភ្នំពេញតាមផ្លូវជាតិលេខ៤ ត្រូវពង្វាងបត់ស្តាប់ត្រង់ចំណុចផ្សារបែកចាន តាមផ្លូវក្រវ៉ាត់ក្រុងទី៤ឬផ្លូវបែកចានប្រទះឡាង រួចពង្វាងទៅផ្លូវព្រៃសឬផ្លូវ៣០ម៉ែត្រ ទួលពង្រ និងអាចបត់ឆ្វេង នៅចំណុចភ្លើងស្តុប ទៅផ្លូវក្រវ៉ាត់ក្រុងទី៣ ឬ ផ្លូវកប់ស្រូវ។
ចំណែកយានយន្តចូលរាជធានីតាមផ្លូវជាតិលេខ៣ ត្រូវពង្វាងបត់ឆ្វេងនៅចំណុចវត្តស្លែង ដោយតាមផ្លូវក្រវ៉ាត់ក្រុងទី៤ ឬ ផ្លូវប្រទះឡាងបែកចាន និង ពង្វាងបត់ស្តាំទៅផ្លូវព្រៃស និងអាចពង្វាងបត់ស្តាំទៅផ្លូវ៣០ម៉ែត្រទួលពង្រ។
ចុងក្រោយយានយន្តដឹកអ្នកដំណើរឬដឹកទំនិញធន់ធំចូលភ្នំពេញតាមផ្លូវជាតិលេខ៥ ត្រូវពង្វាងទៅផ្លូវកប់ស្រូវ និងផ្លូវហាណូយ ចំពោះយានយន្តដែលមានប័ណ្ណអនុញ្ញាត ឲ្យចេញចូល រាជធានីភ្នំពេញ៕
