តំណាងកម្ពុជាប្រចាំនៅអង្គការសហប្រជាជាតិ បានលើកឡើងថា សេចក្ដីថ្លែងការណ៍នានាប្រឆាំងនឹងកម្ពុជា ដែលលើកឡើងក្នុងកិច្ចប្រជុំលើកទី៣៧ នៃក្រុមប្រឹក្សាសិទ្ធិមនុស្សនៅទីក្រុងហ្សឺណែវ ជាការជ្រៀតជ្រែកចូលកិច្ចការផ្ទៃក្នុង និងបង្កប់ចរឹតនយោបាយ ដោយថា មិនអាចទទួលយកបាន។
ក្នុងសេចក្ដីថ្លែងការណ៍កាលពីថ្ងៃទី១៤ ខែមីនា តំណាងអចិន្ត្រៃយ៍កម្ពុជាប្រចាំនៅអង្គការសហប្រជាជាតិ លោក ណី សំអុល បានឆ្លើយតបទៅនឹងសេចក្ដីថ្លែងការណ៍ថ្កោលទោសកម្ពុជាពីសំណាក់ប្រទេសនានា រួមទាំងសហភាពអឺរ៉ុបផងដែរ នៅក្នុងកិច្ចប្រជុំលើកទី៣៧ នៃក្រុមប្រឹក្សាសិទ្ធិមនុស្សអង្គការសហប្រជាជាតិកាលពីថ្ងៃទី១៤ ខែមីនាកន្លងមកថ្មីៗនេះ។
តំណាងរដ្ឋាភិបាលកម្ពុជារូបនេះ បានលើកឡើងថា ប្រទេសមួយចំនួន ខិតខំរកគ្រប់មធ្យោបាយ និងវិធីសាស្ត្រដោយឥតអៀនខ្មាស់ ដើម្បីជ្រៀតជ្រែកចូលក្នុងកិច្ចការផ្ទៃក្នុងកម្ពុជា ខណៈដែលប្រទេសនេះត្រៀមរៀបចំការបោះឆ្នោតនាខែកក្កដាខាងមុខនេះ។
តំណាងរដ្ឋាភិបាលរូបនោះ បន្ថែមថា ពួកគេព្យាយាមរំលោភបទបញ្ញត្តិ ក្រមច្បាប់ គោលការណ៍ និងការអនុវត្តន៍នៃអង្គការសិទ្ធិមនុស្សដ៏ឧត្តុងឧត្តម ដោយគ្មានញញើតកោតក្រែង ក្នុងចេតនាសាបព្រួសអំពើស្អប់ខ្ពើម និងបណ្តុះនូវគោលនយោបាយប្រទូស្តរាយប្រឆាំងនឹងរដ្ឋាភិបាលកម្ពុជា ក្នុងគោលដៅផ្លាស់ប្តូររបប បច្ចុប្បន្ន តាមរយៈអ្វីដែលគេហៅថា បដិវត្តន៍ពណ៌។
ក្នុងសេចក្តីថ្លែងការណ៍តំណាងរដ្ឋាភិបាលកម្ពុជាបានប្រកាសប្រឆាំងយ៉ាងដាច់អហង្ការ ចំពោះសេចក្តីថ្លែងការណ៍ទាំងទ្បាយ ដែលត្រូវបានធ្វើទ្បើងដោយបង្កប់ទៅដោយចរិតនយោបាយនៅពីក្រោយ ដោយព្រងើយកន្តើយចំពោះសមត្ថកិច្ចរបស់រដ្ឋអធិបតេយ្យ នៅក្នុងការថែរក្សាការពារច្បាប់ និងសណ្តាប់ធ្នាប់ដើម្បីជាប្រយោជន៍ នៃសន្តិភាព ស្ថិរភាព និងការអភិវឌ្ឍន៍សម្រាប់ប្រជាពលរដ្ឋរបស់ខ្លួន។
កាលពីថ្ងៃទី ១៤ ខែ មីនា ក្នុងសេចក្ដីថ្លែងការណ៍មួយផ្ញើទៅក្រុមប្រឹក្សាសិទ្ធិមនុស្សអង្គការសហប្រជាជាតិ សហភាពអឺរ៉ុប បានបង្ហាញក្ដីបារម្ភជាថ្មី អំពីបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ដូចជា ការបង្ក្រាបគណបក្សសង្គ្រោះជាតិ អង្គការសង្គមស៊ីវិល និងបណ្ដាញសារព័ត៌មាន។
ក្នុងសេចក្ដីថ្លែងការណ៍នោះ សហភាពអឺរ៉ុបរំឭកជាថ្មី ឲ្យរដ្ឋាភិបាលកម្ពុជាធានាដំណើរការប្រជាធិបតេយ្យសេរីពហុបក្ស ដូចមានចែងក្នុងរដ្ឋធម្មនុញ្ញ និងថា ការបោះឆ្នោត មិនអាចទទួលយកបានទេ បើគណបក្សប្រឆាំងដ៏ធំមួយនេះ ត្រូវបានគេផាត់ចេញពីការបោះឆ្នោតនោះ៕