អគ្គនាយកពន្ធដារនៃក្រសួងសេដ្ឋកិច្ច បានជម្រុញឲ្យម្ចាស់រថយន្តទាំងអស់ ឲ្យទៅបង់ពន្ធផ្លូវឆ្នាំ២០១៧ ឲ្យបានរួចរាល់ ដើម្បីជៀសវាងការឃាត់រថយន្តតាមដងផ្លូវធ្វើឲ្យស្ទះចរាចរណ៍ និងខាតបង់ពេលវេលា។
អគ្គនាយកដ្ឋានពន្ធដារ បានក្រើនរំឭកបែបនេះនៅក្នុងសេចក្ដីប្រកាសព័ត៌មានមួយកាលពីថ្ងៃម្សិលមិញនេះ បន្ទាប់ពីស្ថាប័ននេះបានអនុវត្តការត្រួតពិនិត្យការបង់ពន្ធរបស់យានយន្តគ្រប់ប្រភេទ។
ក្នុងសេចក្ដីប្រកាសព័ត៌មានដដែលនោះ អគ្គនាយកពន្ធដារ ជំរុញទៅក្រុមហ៊ុន សាធារណជន និងម្ចាស់រថយន្ត ឲ្យរួសរាន់ទៅបង់ពន្ធលើយានជំនិះគ្រប់ប្រភេទសម្រាប់ឆ្នាំ២០១៧ ឲ្យបានគ្រប់គ្នានៅតាមសាខាពន្ធដារខេត្ត និងខណ្ឌ ឬនៅតាមសាខាធនាគារកាណាឌីយ៉ា សាខាធនាគាអេស៊ីលីដា សាខាធនាគារវឌ្ឍនៈ ឬធនាគារកម្ពុជាសាធារណៈ ដើម្បីជៀសវាងការឃាត់រថយន្តតាមដងផ្លូវ ដោយកម្លាំងសមត្ថកិច្ច ឬមន្ត្រីពន្ធដារដែលនាំឲ្យកកស្ទះចរាចរណ៍ និងខាតបង់ពេលវេលា។
ក្នុងសេចក្ដីថ្លែងការណ៍នោះក៏បានលើកឡើងដែរថា គិតត្រឹមថ្ងៃទី១៥ ខែមីនា កម្លាំងសមត្ថកិច្ច និង អគ្គនាយកពន្ធដាររបានផាកពិន័យនៅនឹងកន្លែងគោលដៅត្រួតពិនិត្យ បានរកឃើញថា ក្នុងក្របខ័ណ្ឌទូទាំងប្រទេស មានរថយន្តចំនួន ៥ ៨២៣គ្រឿង មិនបានបង់ពន្ធទាន់ពេលវេលា ហើយរថយន្តទាំងនោះត្រូវបានតម្រូវឲ្យបង់ប្រាក់ និងប្រាក់ពិន័យមានចំនួន ៤ ៩១៥លានរៀន៕
