ទីប្រឹក្សាគណបក្សប្រឆំាងបានចោទ ប្រទេស ចិននិងវៀតណាមថា ជាអ្នកនៅពីក្រោយឧក្រិដ្ឋកម្មប្រល័យពូជសាសន៍ខ្មែរសម្លាប់ខ្មែរជិត២លាននាក់ នៅចន្លោះឆ្នាំ១៩៧៥ ដល់១៩៧៩។
ក្នុងពិធីបង្សុកូលឧទ្ទិសកុសលជូនដល់វិញ្ញាណក្ខន្ធអ្នកដែលបានបាត់បង់ជីវិតក្នុងសម័យខ្មែរក្រហមនៅសារមន្ទីរឧក្រិដ្ឋកម្មប្រល័យពូជសាសន៍ជើងឯក រាជធានីភ្នំពេញ នៅព្រឹកថ្ងៃទី១៧មេសានេះ ទីប្រឹក្សាជាន់ខ្ពស់គណបក្សសង្គ្រោះជាតិលោក គង់ គំា បានថ្លែងថា ដើមចម ដែលនាំឲ្យប្រជាជនខ្មែរកាប់ស្លាប់ខ្មែរឲ្យស្លាប់ជិត២លាននាក់ នៅសម័យខ្មែរក្រហម ដោយសារប្រទេសចិន និងវៀតណាម ជាអ្នកនៅពីក្រោមសង្គ្រាមនោះ។
លោកថា៖ «កុំថាសង្គ្រាមរវាងខ្មែរនឹងខ្មែរ របស់ដែលគេហៅថាបញ្ហាកម្ពុជាជានិច្ចរហូតមក គឺជាវៀតណាមនិងចិនទេ គេហៅថាសង្គ្រាមឥណ្ឌូចិនទី៣ ឥណ្ឌូចិនទី១ បារំាង–វៀតណាម ឥណ្ឌូចិនទី២ វៀតណាម–អាមេរិកកំាង ឥណ្ឌូចិនទី៣ វៀតណាម–ចិន»។
សាស្រ្តាចារ្យផ្នែកប្រវត្តិសាស្រ្តលោក វង្ស សុធារ៉ា យល់ថា សង្គ្រាមខ្មែរសម្លាប់ខ្មែរនៅក្នុងសម័យខ្មែរក្រហមកើតឡើង ដោយសារតែកម្ពុជាជាកូនអ៊ុករបស់ប្រទេសមហាអំណាច ដែលគេប្រើសម្រាប់ប្រយោជន៍ប្រទេសរបស់ពួកគេ។
លោក វង្ស សុធារ៉ា បន្តថា ដើម្បីកុំឲ្យកម្ពុជាដើរថយទៅរបបអតីតកាលទៀត កម្ពុជាគួរតែបង្កើតទំនាក់ទំនងអន្តរជាតិពហុភាគី ជាជាបង្កើតទំនាក់ទំនងទ្វេភាគី។
លោកថា៖ «ចំណុចល្អ ដែលយើងត្រូវប្រើគោលនយោបាយ ពហុទំនាក់ទំនងអន្តរជាតិជាមួយបរទេស បើសិនជាយើងប្រើទំនាក់ទំនងទ្វេភាគីបន្តទៅទៀត នៅពេលដែលប្រទេសមហាអំណាច ដែលផ្តល់ជំនួយដល់យើងគេឈប់ជួយ យើងដួលទៀត ដូចកាលពីមុនយើងពឹងទៅលើរ៉ូស្ស៊ី ឬពឹងទៅលើយួន ដល់ពេលយួនផ្ទួលទៅចប់ យើងត្រូវងាកទៅរកការចចារមួយដើម្បីបញ្ចប់សង្គ្រាម ហើយកាលពីជំនាន់ លន់ នល់ ពឹងតែអាមេរិកមួយ ដ៏ពេលអាមេរិកឈប់ជួយ លន់ នល់ ត្រូវដួលរលំបន្តទៅទៀត ដ៏ពេលខ្មែរក្រហម អាង [ពឹង] តែទៅលើចិនមួយ ដល់ពេលចិនឈប់ជួយ យួនផ្តួលរលំទៅ»។
របបសាធារណរដ្ឋខ្មែររបស់លោកសេនាប្រមុខ លន់ នល់ បានដួលរលំកាលពីថ្ងៃទី១៧ខែមេសាឆ្នាំ១៩៧៥ ដែលពេលនោះ រាជធានីភ្នំពេញបានក្លាយទៅជាទីក្រុងគ្មានមនុស្សរស់នៅ ដោយប្រជាជនត្រូវបានក្រុមខ្មែរក្រហមជម្លៀសចេញពីទីក្រុង។
ក្រុមខ្មែរក្រហមចាត់ទុកអ្នក១៧មេសា គឺជាពួកចក្រព័ទ្ធ និងជាខ្មាំងសត្រូវរបស់បដិវត្តន៍។ របបកម្ពុជាប្រជាធិបតេយ្យ ឬ ខ្មែរដឹកនាំប្រទេស បានសម្លាប់ប្រជាជនខ្លួនឯងជិត២លាននាក់ ដោយការបង្អត់អាហារ ការធ្វើពលកម្មដោយបាក់កម្លាំង និងការធ្វើទារុណកម្មនិងប្រហារជីវិតជាដើម៕
