សេចក្ដីរាយការណ៍បានឲ្យដឹងថា មនុស្សដល់ទៅ ៣២៣នាក់ ត្រូវបានសម្លាប់ ហើយជាង ៣១០០នាក់ទៀត បានរងរបួសក្នុងគ្រោះថ្នាក់ចរាចរណ៍ជាង ៣ពាន់ករណី នៅទូទាំងប្រទេសថៃ អំឡុងពេលបុណ្យចូលឆ្នាំថ្មីរយៈពេល ៧ថ្ងៃ ដោយបន្តកើនឡើងថែមទៀត បើធៀបទៅនឹងរយៈពេលដូចគ្នាក្នុងឆ្នាំកន្លងមក។
សារព័ត៌មានបាងកក ប៉ុស្តិ៍របស់ថៃ បានចុះផ្សាយនៅថ្ងៃនេះថា គ្រោះថ្នាក់ចរាចរណ៍ដល់ទៅ ៣០០១ករណី បានកើតឡើងនៅទូទាំងប្រទេសចាប់ពីថ្ងៃទី១១ ដល់ថ្ងៃទី១៥ ខែមេសានេះ ដោយបានសម្លាប់មនុស្សដល់ទៅ ៣២៣នាក់ និងបណ្ដាលឲ្យរងរបួសដល់ទៅ ៣១៤០នាក់។
ចំនួនគ្រោះថ្នាក់ចរាចរណ៍ដ៏ច្រើនបែបនេះ ត្រូវបានសមត្ថកិច្ចថៃបន្ទោសទៅលើការបើកបរក្រោមឥទ្ធិពលនៃគ្រឿងស្រវឹង ដែលតម្រួតថៃបានត្រួតពិនិត្យទៅឃើញមានរហូតដល់ ៦៥៤១ករណីរួចទៅហើយនៅត្រឹមរយៈពេល ៥នោះ។
ការបើកបរក្រោមឥទ្ធិពលស្រវឹង នៅតែបន្តជាបញ្ហាធំបំផុតដែលកើតមានអំឡុងពេលប្រារព្ធពិធីបុណ្យចូលឆ្នាំថ្មីនៅក្នុងប្រទេសថៃ ហើយក៏ជាមូលហេតុធំនៃកំណើនគ្រោះថ្នាក់ចរាចរណ៍ផងដែរ៕