រដ្ឋាភិបាលកម្ពុជានិងរុស្ស៊ីនៅថ្ងៃអង្គារនេះបានសម្រេចចុះកិច្ចព្រមព្រៀងលើសន្ធិសញ្ញាស្តីពីបត្យាប័ន ដែលនឹងបើកផ្លូវឲ្យប្រទេសទាំងពីរអាចស្នើសុំការដោះដូរមនុស្ស នៅពេលដែលរដ្ឋាភិបាលប្រទេសនោះចង់បាន។
លោកនាយករដ្ឋមន្រ្តី ហ៊ុន សែន ដែលកំពុងបំពេញទស្សនកិច្ចនៅប្រទេសរុស្ស៊ីនិងនាយករដ្ឋមន្រ្តីរុស្ស៊ីលោក ឌីមេទ្រី មេតវ៉ាដេវ បានធ្វើជាអធិបតីភាពក្នុងការចុះកិច្ចព្រមព្រៀងមួយចំនួន ក្នុងនោះរួមមានសន្ធិសញ្ញាស្តីពីបត្យាប័នផងដែរ។ ឯកសារផ្សេងទៀតរួមមានអនុស្សារណៈនៃការយោគយល់គ្នាស្តីពីកិច្ចសហប្រតិបត្តិការរវាងក្រសួងយុត្តិធម៌និងការិយាល័យអគ្គរដ្ឋអាជ្ញាសហព័ន្ធរុស្ស៊ី អនុស្សារណៈនៃការយោគយល់ស្តីពីការសហប្រតិបត្តិការលើវិស័យទូរគមនាគមន៍និងបច្ចេកវិទ្យាព័ត៌មាន អនុស្សារណៈនៃការយោគយល់ ស្តីពីកិច្ចសហប្រតិបត្តិការ រវាងគណៈកម្មាធិការអូឡាំពិកនៃប្រទេសកម្ពុជានិងរុស្ស៊ី សេចក្តីប្រកាសរួមស្តីពីបញ្ជីសំណើគម្រោងសម្រាប់កិច្ចសហប្រតិបត្តិការលើវិស័យពាណិជ្ជកម្ម សេដ្ឋកិច្ចនិងវិនិយោគរហូតដល់ឆ្នាំ២០២០ អនុស្សារណៈនៃការយោគយល់ស្តីពីការបង្កើតមជ្ឈមណ្ឌលព័ត៌មានថាមពុលនុយក្លែអ៊ែរ អនុស្សារណៈនៃការយោគយល់ស្តីពីការបង្កើតក្រុមការងាររួមកម្ពុជា-រុស្ស៊ីលើកិច្ចប្រតិបត្តិការក្នុងការប្រើប្រាស់ថាមពលបរមាណូ ក្នុងគោលបំណងសន្តិភាពនិងកិច្ចព្រមព្រៀងស្តីពីកិច្ចសហប្រតិបត្តិការរវាងក្រសួងមហាផ្ទៃនៃប្រទេសទាំងពីរ។
លោក ហ៊ុន សែន កំពុងដឹកនាំគណៈប្រតិភូបំពេញទស្សនកិច្ចផ្លូវការនៅសហព័ន្ធរុស្ស៊ី ដើម្បីចូលរួមកិច្ចប្រជុំកំពូលរំលឹកខួបអនុស្សាវរីយ៍២០ឆ្នាំនៃទំនាក់ទំនងអាស៊ាន-រុស្ស៊ី។
គួរបញ្ជាក់ថាការរៀបចំកិច្ចព្រមព្រៀងលើសន្ធិសញ្ញាស្តីពីបត្យាប័ននេះធ្វើឡើងបន្ទាប់ពីសេដ្ឋីជនជាតិរុស្ស៊ីម្នាក់ លោក Sergei Polonskyត្រូវបានចាប់ខ្លួននៅកម្ពុជា។ កាលពីចុងឆ្នាំ២០១៥ កម្ពុជាបានបញ្ជូនសេដ្ឋីជនជាតិរុស្ស៊ីលោកPolonskyនិងបក្សពួក៥នាក់ផ្សេងទៀតទៅប្រទេសខ្លួនវិញ ក្រោយពីអាជ្ញាធររកឃើញថាពួកគេរស់នៅកម្ពុជាមិនស្របច្បាប់។ ការបញ្ជូននេះស្របពេលរដ្ឋអាជ្ញារុស្ស៊ីបានស្នើសុំជាផ្លូវការ ឲ្យកម្ពុជាធ្វើបត្យាប័ន នៅពេលចាប់ខ្លួន លោកPolonskyបាន។
លោក Polonsky ត្រូវតុលាការរុស្ស៊ីចោទប្រកាន់ថាបានបោះបង់ចោលក្រុមហ៊ុនអចលនទ្រព្យដែលកំពុងជាប់បំណុលនៅក្នុងប្រទេសរុស្ស៊ី ហើយបានរត់មកជ្រកកោនលើកោះឯកជនមួយ ក្នុងដែនទឹកកម្ពុជា ។ គួររំឭកថាកាលពីចុងខែធ្នូ ឆ្នាំ២០១២ លោក Polonskyនិងមិត្តភ័ក្ត្រពីរនាក់ទៀត ត្រូវបានអាជ្ញាធរកម្ពុជាចាប់ខ្លួនដោយរងចោទពីបទប្រើហិង្សាដោយចេតនានិងការឃុំឃាំងមនុស្សខុសច្បាប់លើកម្មករខ្មែរ៦នាក់ ដោយប្រើកាំបិតនិងបញ្ជាឲ្យពួកគេលោតចេញពីទូក ក្នុងខេត្តព្រះសីហនុ៕
