អន្តរជាតិ

ឥណ្ឌូណេស៊ីស្វែងរកដៃគូកូរ៉េខាងត្បូងដើម្បីជំរុញឧស្សាហកម្ម

លោក ឌិត សុខធី
| ១៧ ឧសភា ២០១៦
ម៉ោង ១០:៣០

លោកប្រធានាធិបតីឥណ្ឌូណេស៊ី Joko Widodo និងលោកស្រីប្រធានាធិបតីកូរ៉េខាងត្បូង Park Geun-Hye (រូបភាពពី CNA)

ប្រទេសឥណ្ឌូណេស៊ីចង់បានប្រទេសកូរ៉េខាងត្បូងធ្វើជាដៃគូរបស់ខ្លួនក្នុងការជំរុញឧស្សាហភាវូបនីយកម្មនៅក្នុងប្រទេសដែលមានសេដ្ឋកិច្ចធំជាងគេនៅតំបន់អាស៊ីអាគ្នេយ៍នេះ។

សារព័ត៌មាន Channel News Asia បានរាយការណ៍ថា លោកប្រធានាធិបតីឥណ្ឌូណេស៊ី Joko Widodo ដែលកំពុងបំពេញទស្សនកិច្ចនៅកូរ៉េខាងត្បូងនោះបានថ្លែងថាប្រទេសរបស់លោកមានសក្ដានុពលសម្រាប់ឲ្យកូរ៉េខាងត្បូងវិនិយោគ។

នៅក្រោយជំនួបជាមួយលោកស្រីប្រធានាធិបតី Park Geun-Hye នៅទីក្រុងសេអ៊ូល កាលពីថ្ងៃម្សិលមិញ លោក Widodo បានថ្លែងថា ជាមួយសក្ដានុពលខ្ពស់នៃការវិនិយោគរបស់កូរ៉េខាងត្បូងនៅក្នុងឧស្សាហកម្មផ្សេងៗ ឥណ្ឌូណេស៊ីចង់ឲ្យកូរ៉េខាងត្បូងធ្វើជាដៃគូ ដើម្បីជំរុញឧស្សាហភាវូបនីយកម្មនៅឥណ្ឌូណេស៊ី។

ការវិនិយោគរបស់កូរ៉េខាងត្បូងនៅឥណ្ឌូណេស៊ីបានកើនឡើងពី១.១២ពាន់លានដុល្លារនៅឆ្នាំ២០១៤ដល់ ១.២១ពាន់លានដុល្លារនៅឆ្នាំ២០១៥កន្លងមកនេះ។

មេដឹកនាំនៃប្រទេសទាំងពីរបានធ្វើជាអធិបតីនៃពិធីចុះហត្ថលេខាលើអនុស្សារណៈយោគយល់គ្នាចំនួន៧ ដើម្បីជំរុញកិច្ចសហប្រតិបត្តិការរវាងប្រទេសទាំងពីរលើវិស័យនានា ក្នុងនោះមានការបង្កើតនូវតំបន់សេដ្ឋកិច្ចពិសេសនៅឥណ្ឌូណេស៊ីផងដែរ។

ឥណ្ឌូណេស៊ីក៏បានកូរ៉េខាងត្បូងធ្វើជាដៃគូក្នុងការអភិវឌ្ឍសមត្ថភាពឧស្សាហកម្មដែកថែបរបស់ខ្លួនផងដែរ ដើម្បីកាត់បន្ថយការពឹងផ្អែកលើការនាំចូល។

បើទោះបីជាការវិនិយោគរបស់កូរ៉េខាងត្បូងនៅឥណ្ឌូណេស៊ីមានដំណើរការល្អ ប៉ុន្តែទំហំពាណិជ្ជកម្មទ្វេភាគីរវាងប្រទេសទាំងពីរបានធ្លាក់ចុះពី២២.៤៧ពាន់លានដុល្លារនៅឆ្នាំ២០១៤មកនៅត្រឹម១៦.៧ពាន់លានដុល្លារនៅឆ្នាំ២០១៥៕

ប្រភព៖ Channel News Asia

អន្តរជាតិ

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។