សហរដ្ឋអាមេរិកនិងមហាអំណាចពិភពលោកបាននិយាយថា ពួកគេត្រៀមខ្លួនបំពាក់អាវុធដល់រដ្ឋាភិបាលឯកភាពមួយដែលគាំទ្រដោយអង្គការសហប្រជាជាតិរបស់ប្រទេសលីប៊ី ដើម្បីជួយប្រយុទ្ធប្រឆាំងនឹងក្រុមអ៊ីស្លាមនិយម។
ដោយបានដកស្រង់សម្ដីរបស់លោករដ្ឋការបរទេសអាមេរិក John Kerry ទីភ្នាក់ងារព័ត៌មាន AP បានរាយការណ៍ថាមហាអំណាចនឹងគាំទ្រប្រទេសលីប៊ីដែលកំពុងស្វែងរកការលុបចោលបម្រាមរបស់អង្គការសហប្រជាជាតិលើការនាំចូលអាវុធ។
លោក Kerry បានថ្លែងថា ក្រុមរដ្ឋអ៊ីស្លាមគឺជាការគំរាមកំហែងថ្មីចំពោះប្រទេសលីប៊ីនិងទាមទារឲ្យបញ្ឈប់ក្រុមនេះ។
កាលពីខែមុនរដ្ឋាភិបាលលីប៊ីបានព្រមានថា ក្រុមរដ្ឋអ៊ីស្លាមអាចដណ្ដើមគ្រប់គ្រងទឹកដីភាគច្រើនរបស់ប្រទេសនេះ ប្រសិនបើខ្លួនពុំអាចបញ្ឈប់បានក្នុងពេលឆាប់ៗទេនោះ។
បន្ទាប់ពីជួបពិភាក្សាជាមួយដៃគូអន្តរជាតិ លោក Kerry និយាយថារដ្ឋាភិបាលជាតិលីប៊ីគឺជារបបគ្រប់គ្រងតែមួយគត់ដែលអាចបង្រួមបង្រួមប្រទេសនេះ ហើយក៏ជាមធ្យោបាយតែមួយគត់ដើម្បីធានាថាស្ថាប័នរដ្ឋស្ថិតក្រោមអាជ្ញាធរជាតំណាងប្រជាពលរដ្ឋ។
សំណើលើកលែងការហ៊ុមព័ទ្ធលើការនាំចូលអាវុធដែលធ្វើឡើងដោយប្រទេសលីប៊ីនឹងត្រូវការការអនុម័តពីគណៈកម្មាធិការទណ្ឌកម្មរបស់អង្គការសហប្រជាជាតិមុននឹងសំណើនេះចូលជាធរមាន។
ប៉ុន្តែសំណើផ្លូវការរបស់រដ្ឋាភិបាលលីប៊ីនេះបង្ហាញថា ពួកគេបានទទួលការធានាថាសំណើនោះនឹងត្រូវបានអនុម័តឡើងនាពេលឆាប់ៗ។
លីប៊ីនៅតែជាប្រទេសដែលរដ្ឋបាលពហុភាគីនៅតែខ្វែងគំនិតគ្នាជុំវិញបញ្ហាថានរណាជាអ្នកទទួលខុសត្រូវ។ ក្រុមប្រដាប់អាវុធនៅភាគខាងលិចលីប៊ីដែលល្បីខាងផ្លាស់ប្ដូរជំហររបស់ពួកគេនោះប្រហែលជាគាំទ្ររដ្ឋាភិបាលថ្មី ហើយនៅមិនទាន់មានឯកភាពខាងផ្នែកកងទ័ពច្បាស់លាស់នៅឡើយទេ៕
