សមត្ថកិច្ចបានឲ្យដឹងថា បុរស៣នាក់ត្រូវបានឃាត់ខ្លួន កាលពីម្សិលមិញ ដោយថាពាក់ព័ន្ធទៅនឹងការរៀបចំរដ្ឋាភិបាលស្រមោលរបស់ លោក សម សេរី ដើម្បីត្រៀមផ្តួលរំលំរដ្ឋាភិបាលនៃគណបក្សប្រជាជនកម្ពុជា។
ស្នងការរងនគរបាលរាជធានីភ្នំពេញលោក ស៊ឹម វុទ្ធី ប្រាប់វីអូឌីនៅថ្ងៃទី១៧ខែឧសភា នេះថា សមត្ថកិច្ចបានឃាត់ខ្លួនសមាជិករណសិរ្សរំដោះជាតិខ្មែរ ដែលតាំងខ្លួនជារដ្ឋាភិបាលនិរទេស ចំនួន៣នាក់ ក្នុងនោះមានឈ្មោះ ធុយ វី តាំងខ្លួនជារដ្ឋមន្រ្តីកសិកម្ម ឈ្មោះ ឃុន សាវៈខែត ជាប្រធានអង្គការឧត្តមស្នងការអន្តរសាស្ត្រ និងឈ្មោះ លឹម សុភា ជាជំនួយការ។
លោកបន្ថែមថា អ្នកទាំងបីនាក់នោះត្រូវបានឃាត់ខ្លួន បន្ទាប់ពីពួកគេ បានធ្វើសន្និសិទកាសែតមួយកាលពីព្រឹកថ្ងៃទី១៦ ឧសភា នៅក្នុងសង្កាត់ព្រែប្រា ខណ្ឌច្បារអំពៅ ដោយស្នើឲ្យដោះលែងសមាជិកខ្លួន១០នាក់ ដែលត្រូវបានតុលាការឃុំ។ លោកបន្ថែមថា នៅពេលនេះ សមត្ថកិច្ចកំពុងសាកសួរបន្ថែម នឹងរៀបចំឯកសារ បញ្ជូនពួកគេទៅកាន់តុលាការ។
លោកថា៖ «នេះសំខាន់លើតុលាការទេ យើងគ្រាន់តែចាប់បញ្ជូនទៅតុលាការ ការវិនិច្ឆ័យយ៉ាងម៉េចៗ នៅតុលាការ ប៉ុន្តែគ្រាន់តែឯកសារយើងមានហើយ។ និយាយឲ្យចំរដ្ឋាភិបាលនិរទេស គឺមានដីការបស់តុលាការមួយរួចទៅហើយ ដែលចាប់ខ្លួន សម សេរី ហ្នឹង អញ្ចឹងវា ស្ថិតតែនៅក្នុងការតាមដានរបស់អំណាចតុលាការនៅឡើយទេ»។
កាលពីថ្ងៃទី៧ខែធ្នូឆ្នាំ២០១៦ សាលាដំបូងរាជធានីភ្នំពេញ បានសម្រេចផ្តន្ទាទោសមេដឹកនាំរណសិរ្សរំដោះជាតិខ្មែរនិងគូកនចំនួន១១នាក់ ឲ្យជាប់ពន្ធនាគារពី៥ឆ្នាំទៅ៩ឆ្នាំ ក្រោមបទចោទ រួមគំនិតក្បត់ និងសមគំនិត ប៉ុនប៉ងផ្ដួលរំលំរដ្ឋាភិបាលលោក ហ៊ុន សែន។ ក្នុងចំណោមអ្នកទាំង១១នាក់នោះ មានប្រធានរណសិរ្សរំដោះជាតិខ្មែរ លោក សម សេរី ដែលកំពុងនិរទេសខ្លួននៅប្រទេសដាណឺម៉ាក់ ត្រូវតុលាការបានកាត់ទោសឲ្យជាប់ពន្ធនាគារ៩ឆ្នាំ ពីបទសមគំនិត។
កាលពីពេលកន្លងទៅ ប្រធានចលនារណសិរ្សរំដោះជាតិខ្មែរ លោក សម សេរី បានរៀបចំសេចក្តីព្រាងរដ្ឋធម្មនុញ្ញរបស់ខ្លួន ដោយមាន៥ជំពូកនិង៥២មាត្រា ដោយគ្រោងនឹងបង្កើតរដ្ឋាភិបាលខ្មែរនិរទេសមួយ។ ក្រោយមកលោក សម សេរី បានប្រកាសនៅលើហ្វេសប៊ុករបស់ខ្លួន ដោយអំពាវនាវឱ្យប្រជាជនខ្មែរ នៅក្រៅប្រទេសទាំងអស់ ចូលរួមជាមួយរដ្ឋាភិបាលនិរទេសមួយនេះ។
ករណីនេះ ត្រូវបានរដ្ឋាភិបាលកម្ពុជា ចោទប្រកាន់ថា រួមគំនិតក្បត់ផ្តួលរំលំរដ្ឋាភិបាលស្របច្បាប់ ហើយត្រូវបានសមត្ថកិច្ចកម្ពុជាប្រកាសចាប់ខ្លួនរហូតដល់បច្ចុប្បន្ននេះ។
ចំណែកសមាជិករបស់ក្រុមនេះ១០នាក់ទៀត ត្រូវបានអាជ្ញាធរកម្ពុជា ចាប់ខ្លួនកាលពីថ្ងៃទី២៣ខែតុលាឆ្នាំ២០១៤ អំឡុងពេលពួកគេចូលរួមធ្វើបាតុកម្មនៅមុខស្ថានទូតវៀតណាម ដោយមានការដុតទង់ជាតិវៀតណាម ការបាចខិតប័ណ្ណ ដែលអាជ្ញាធរចោទកម្ពុជាចោទថា ក្នុងគោលបំណងអំពាវនាវឲ្យមានការផ្តួលរំលំរដ្ឋាភិបាលរបស់លោក ហ៊ុន សែន៕
