លោកនាយករដ្ឋមន្ត្រី ហ៊ុន សែន បានឲ្យដឹងថា ប្រទេសចិនបានផ្ដល់ជំនួយឥតសំណង ១,២០០លានយន់ ឬស្មើនឹង ១៧៤លានដុល្លារ និងកម្ចីសម្រាប់គម្រោងសាងសង់ខ្សែបញ្ជូនអគ្គិសនីតង់ស្យុងខ្ពស់ ដែលលោកមិនបានប្រកាសឲ្យដឹង។
លោក ហ៊ុន សែន បានចាកចេញពីប្រទេសកម្ពុជាទៅបំពេញទស្សនកិច្ចនៅប្រទេសចិន កាលពីថ្ងៃទី១៣ ខែឧសភា ដើម្បីចូលរួមវេទិកាខ្សែក្រវ៉ាត់ និងផ្លូវសម្រាប់កិច្ចសហប្រតិបត្តិការអន្តរជាតិ ដែលត្រូវបានរៀបចំឡើងនៅទីក្រុងប៉េកាំង។
ក្នុងទំព័រហ្វេសប៊ុកផ្លូវការរបស់លោកកាលល្ងាចថ្ងៃម្សិលមិញនេះ លោកនាយករដ្ឋមន្ត្រី ហ៊ុន សែន បានរៀបរាប់ថា រូបលោក និងសមភាគីចិន លោកនាយករដ្ឋមន្ត្រី លី ឃឹជាំង បានធ្វើជាសាក្សីនៃពិធីចុះហត្ថលេខាលើកិច្ចព្រមព្រៀងចំនួន ៦ រវាងប្រទេសទាំងពីរ។
លោក ហ៊ុន សែន បានរៀបរាប់បន្ថែមថា ក្នុងចំណោមកិច្ចព្រមព្រៀងទាំងនោះ កម្ពុជា និងចិនបានឯកភាពលើកិច្ចព្រមព្រៀងស្ដីពីកិច្ចសហប្រតិបត្តិការសេដ្ឋកិច្ច និងបច្ចេកទេស ស្ដីពីការផ្ដល់ហិរញ្ញប្បទានឥតសំណងចំនួន ១,២០០លានយន់ ឬស្មើនឹង ១៧៤លានដុល្លារ សម្រាប់ឆ្នាំ២០១៧នេះ។
ជាងនេះទៅទៀត លោក ហ៊ុន សែន ឲ្យដឹងបន្ថែមថា ប្រទេសទាំងពីរក៏បានព្រមព្រៀងគ្នាលើឥណទានសម្បទានជាប្រាក់ដុល្លារ សម្រាប់គម្រោងសាងសង់ខ្សែបញ្ជូនអគ្គិសនីតង់ស្យុងខ្ពស់ ២៣០គីឡូវ៉ុល នៅភាគខាងកើតប្រទេសកម្ពុជា ប៉ុន្តែ លោកមិនបានបញ្ជាក់ឲ្យដឹងពីទំហំកម្ចីឥណទាននេះនោះឡើយ។
ទំនាក់កម្ពុជា-ចិន ត្រូវបានគេមើលឃើញមានភាពជិតស្និទគ្នាកាន់តែខ្លាំងនៅក្នុងរយៈពេលជាង ១ទសវត្សរន៍ចុងក្រោយនេះ តាមរយៈការផ្ដល់ជំនួយ កម្ចីហិរញវត្ថុ និងកំណើនទំហំពាណិជ្ជកម្មរវាងប្រទេសទាំងពីរ។
បើតាមលោកនាយករដ្ឋមន្ត្រី ហ៊ុន សែន ទំហំពាណិជ្ជកម្មទ្វេភាគីកម្ពុជា-ចិន នៅក្នុងរយៈពេល ១០ឆ្នាំចុងក្រោយនេះ បានកើនជាមធ្យម ២៦ភាគរយ ដោយបានកើនឡើងដល់ ៤.៨ពាន់លានដុល្លារ នៅក្នុងឆ្នាំ២០១៦។
ប្រទេសកម្ពុជាបាននាំទំនិញទៅកាន់ប្រទេសចិនក្នុងទំហំទឹកប្រាក់ ៨៣០លានដុល្លារ កាលពីឆ្នាំ២០១៦កន្លងមក ខណៈដែលប្រទេសចិនវិញ បានចូលទំនិញមកក្នុងប្រទេសកម្ពុជា មានតម្លៃដល់ទៅ ៣.៩ពាន់លានដុល្លាររ។
ទំហំវិនិយោគរបស់ចិនចូលក្នុងប្រទេសកម្ពុជា ដែលផ្ដោតទៅលើវិស័យកម្មន្តសាល សំណង់ វាយនភ័ណ និងអគ្គិសនីនោះ បានឡើងទៅដល់ ៥.១ពាន់លានដុល្លារ ដែលធ្វើឲ្យចិននៅតែឈរនៅលំដាប់លេខ ១ ក្នុងនាមជាដៃគូវិនិយោគធំបំផុតនៅក្នុងប្រទេសកម្ពុជា កាលពីឆ្នាំ២០១៦កន្លងមក។
របាយការណ៍បំណុលសាធារណៈរបស់កម្ពុជា ដែលចេញដោយក្រសួងសេដ្ឋកិច្ច និងហិរញ្ញវត្ថុ កាលពីខែមីនាកន្លងមក បានបង្ហាញថា ចិនក៏ជាភាគីផ្ដល់កម្ចីធំសម្រាប់ប្រទេសកម្ពុជាផងដែរ ដោយបានផ្ដល់កម្ចីសម្បទានដល់ទៅជាង ៣,៥៩៩លានដុល្លារ ឬស្មើនឹង ៤៣.៣២ភាគរយនៃបំណុលក្រៅប្រទេសសរុបរបស់កម្ពុជាជាង ៨៣០០លានដុល្លារ គិតត្រឹមឆ្នាំ២០១៦កន្លងមក។
លោកនាយករដ្ឋមន្ត្រី ហ៊ុន សែន កាលពីខែកុម្ភៈកន្លងមកនេះ បានឲ្យដឹងថា គិតត្រឹមដើមឆ្នាំ២០១៧នេះ ចិនបានផ្ដល់ជំនួយឥតសំណង និងកម្ចីសម្បទានដល់ទៅ ៤២០០លានដុល្លារ សម្រាប់អភិវឌ្ឍវិស័យហេដ្ឋារចនាសម្ព័ន្ធ កសិកម្ម សុខាភិបាល អប់រំ និងសន្តិសុខសង្គមជាដើម៕
