ប្រជាសហគមន៍ផ្លូវដែកបានយកញត្តិដាក់នៅសាលារាជធានីភ្នំពេញជាថ្មីទៀតនៅថ្ងៃនេះ ដើម្បីជំរុញទៅអភិបាលស្ថាប័ននេះ ជួយពន្លឿនការបង្ហាញគម្រោងអភិវឌ្ឍន៍បណ្តោយផ្លូវដែក ជូនពួកគេឲ្យបានឆាប់។
អ្នកស្រី ហ៊ន់ ពៅ តំណាងសហគមន៍ភូមិ២៣ បានរៀបរាប់ប្រាប់ VOD បន្ទាប់ពីយកញត្តិដាក់នៅ សាលារាជធានីភ្នំពេញថា ដើមចមដែលនាំឲ្យពួកគេយកញត្តិដាក់ទៅសាលារាជធានីភ្នំពេញជាថ្មីទៀត ដោយសារកាលពីថ្ងៃទី១១ឧសភា មន្ត្រីសាលារាជធានីបានប្រកាសប្រាប់ប្រជាហគមន៍ផ្លូវដែកនៅក្នុងវត្តនាគវន្តថា ស្ថាប័ននេះកំពុងពិចារណាលើគម្រោងអភិវឌ្ឍន៍ក្បែរផ្លូវដែកចំនួនបីជម្រើស។
គម្រោងទី១គឺយក៣០ម៉ែត្រ(ពោលអភិវឌ្ឍន៍ពីអ័ក្សផ្លូវម្ខាង១៥ម៉ែត្រ) ទីពីរ ២០ទៅ១៥ម៉ែត្រ និងជម្រើសទីបី ១០ម៉ែត្រកន្លះ ខណៈប្រជាសហគមន៍ស្នើសុំឲ្យអភិវឌ្ឍន៍ចន្លោះពី៧ម៉ែត្រទៅ៨ម៉ែត្រកន្លះ។
ករណីនេះអ្នកស្រី ពៅ ស្នើទៅអភិបាលសាលារាជធានីភ្នំពេញលោក ប៉ា សុជាតិវង្ស ពន្លឿនបង្ហាញប្លង់គោលជូនប្រជាសហគមន៍ឲ្យបានច្បាស់ ដោយថាបច្ចុប្បន្ននេះ។ ពួកគេមានការព្រួបារម្ភយ៉ាងខ្លាំងពីគម្រោងអភិវឌ្ឍន៍ខាងលើនេះ ដោយថាអាចធ្វើឲ្យប៉ះពាល់ប្រជាពលរដ្ឋរាប់រយគ្រួសារនៅតំបន់នោះ។
អ្នកស្រីនិយាយថា «គាត់នៅតែនិយាយដដែលៗកំពុងតែសិក្សា ហើយកំពុងតែសិក្សានៅតែដដែល៣០ម៉ែត្រ ២០ ១៥ម៉ែត្រ ១០ម៉ែត្រកន្លះ នៅដដែលៗ សម្រាប់ពួកខ្ញុំដែលរងផលប៉ះពាល់ដែលគម្រោងផ្លូវនេះ បើ១០ម៉ែត្រអស់បាត់ហើយ ផ្ទះខ្ញុំ មានការព្រួយបារម្ភខ្លំាងបានពួកខ្ញុំដាក់លិខិតស្នើសុំថាគាត់បង្ហាញប្លង់ថា គាត់អភិវឌ្ឍន៍ផ្លុវបេតុងយ៉ាងម៉េច ប៉ុន្មានម៉ែត្រ ដើម្បីចរាចរណ៍មិនចង់ឲ្យកកស្ទះ ហើយកុំឲ្យប៉ះពាល់ដល់ប្រជាពលរដ្ឋ»។
លោក នូ សារិន តំណាងសហគមន៍១៧ បានបញ្ជាក់ថា លោកមិនមានជំនឿលើមន្ត្រីសាលារាជធានីភ្នំពេញដោះស្រាយបញ្ហានេះតាមការស្នើសុំរបស់ប្រជាសហគមន៍នោះទេ ដោយថាពួកគេយកញត្តិដាក់នៅស្ថាប័ននេះច្រើនដងមកហើយ ប៉ុន្តែមន្ត្រីទំាងនោះ ហាក់ពន្យាពេលមិនចង់ដោះស្រាយបញ្ហានេះជូនពួកគេនោះទេ។
លោកបញ្ជាក់ថា «ខ្ញុំអត់ទាន់មានទេ មូលហេតុអ្វីបានថាខ្ញុំអត់ទាន់មាន ពីព្រោះថាយើងមកមួយដងណាគម្រោងមិនទាន់សិក្សាចប់ សំខាន់បើយើងចង់ឲ្យមានគោលការណ៍ជាក់លាក់ណាមួយជាមួយប្រជាពលរដ្ឋយើងត្រូវតែយកតែមួយជម្រើសគត់ មិនត្រូវការយកដល់បីជម្រើសទេ ដល់បីជម្រើសប្រជាពលរដ្ឋ មិនដឹងគិតថាទៅកន្លែងណាទេ ជ្រួលច្របល់ទំាងអស់គ្នា តែបើថា១០ម៉ែត្រកន្លះ ពិតជា១០ម៉ែត្រកន្លះ ហើយចេញមកលើកប៉ាណូទៅ ប្រាប់ទៅផ្លូវខ្ញុំអភិវឌ្ឍន៍១០ម៉ែត្រកន្លះ ហើយប្រជាពលរដ្ឋនិងសូមជួបនៅពេលក្រោយចចាតម្លៃបាត់លំនៅឋានរបស់ខ្លួន»។
លោក សារិន បានឲ្យដឹងទៀតថា បើសាលារាជធានីភ្នំពេញមិនផ្តល់ព័ត៌មានជាក់លាក់ពីគម្រោងអភិវឌ្ឍន៍ទេ លោកថានឹងដឹកនាំប្រជាសហគមន៍មកតាមដានញត្តិនៅស្ថាប័នខាងលើនេះ នៅថ្ងៃទី១៥មិថុនាខាង មុខ វេលាម៉ោង៩ព្រឹក។
លោក កែវ កុសល មន្ត្រីការិយាល័យរបៀបនិងឯកសារនៃទីចាត់ការរដ្ឋបាលសាលារាជធានីភ្នំពេញដែលទទួលយកញត្តិពីប្រជាសហគមន៍ផ្លូវដែក មិនបកស្រាយច្រើនទេ ដោយលោកថា លោកនឹងយកញត្តិនេះបញ្ជូនទៅថ្នាក់លើ ដោះស្រាយតាមនីតិវិធី។
លោកប្រាប់ថា «ដាក់ថ្នាក់លើ ដាក់ទៅឥលូវហើយបង តែគាត់ចាត់ការយ៉ាងម៉េចតាមនីតិវិធីរបស់គាត់ ខ្ញុំអត់ដឹង ខ្ញុំបានត្រឹមតែបញ្ជូនលិខិតចូល»។
ប្រធានក្រុមការងារពិសេសសិទ្ធិលំនៅឋានលោក សៀ ភារម្យ យល់ថា បើមន្ត្រីរដ្ឋាភិបាលមិនធ្វើការដោះស្រាយបញ្ហានេះឲ្យមានតម្លភាព អាចនិងធ្វើឲ្យប៉ះពាល់ដល់បក្សកំពុងគ្រប់គ្រងអំណាច ខណៈការបោះឆ្នោតឃុំ សង្កាត់ខិតជិតមកដល់។
លោកយល់ថា «បើសិនជារឿងហ្នឹង វាអូសបន្លាយយូ ហើយបោះឆ្នោតឃុំ សង្កាត់ ជិតមកដល់ដែរ ហើយបោះឆ្នោតជាតិក៏ជិតមកដល់ដែរ បើសិនជាការយឺតយ៉ាវនេះ វានឹងអាចជះផលអវិជ្ជមានផងដែរ ចំពោះគណបក្សកាន់អំណាច ពីព្រោះប្រជាពលរដ្ឋឥឡូវគាត់មានប្រព័ន្ធព័ត៌មាន បណ្តាញសង្គមច្រើន ធ្វើឲ្យព័ត៌មានហ្នឹងបង្ហាញពីភាពយឺតយ៉ាង ឬក៏កង្វះសមត្ថិភាព ឬក៏ការឆ្លើយតបរបស់អាជ្ញាធរដែនដី ទៅតាមការចង់បានរបស់ប្រជាពលរដ្ឋ»។
កន្លងទៅការអភិវឌ្ឍនៅក្នុងរាជធានីភ្នំពេញមានការបណ្ដេញពលរដ្ឋចេញពីលំនៅស្ថានមានដូចជា បឹងកក់ បុរីកីឡា ដីក្រហម សំបុកចាប ដោយបើកផ្លូវឲ្យក្រុមហ៊ុនចូលអភិវឌ្ឍ ហើយមកដល់ពេលនេះអ្នកខ្លះមិនទាន់បានសំណងនៅឡើយ៕
