ប្រព័ន្ធផ្សព្វផ្សាយរបស់សហរដ្ឋអាមេរិកបានចុះផ្សាយថា លោកប្រធានាធិបតី ដូណល ត្រាំ ធ្លាប់បានស្នើឲ្យនាយកFBIលោក James Comey ទម្លាក់ចោលការស៊ើបអង្កេតលើ អតីតទីប្រឹក្សាសន្តិសុខជាតិលោក Flynn ដែលរងការចោទថា មន្ត្រីជាន់ខ្ពស់រូបនេះមានរឿងលាក់បាំងជាមួយរុស្ស៊ី។
តាមកំណត់ហេតុរបស់អតីតប្រធានFBIលោក Comey បានឲ្យដឹងថា ក្នុងជំនួបមួយនៅក្នុងសេតវិមានកាលពីខែកុម្ភះ លោកត្រាំ បានស្នើឲ្យរូបលោកទម្លាក់ចោលការស៊ើបលើលោក Michael Flynn។ ប៉ុន្តែលោក លោក Comey មិនបានយល់ព្រមតាមការស្នើឡើងរបស់លោកប្រធានាធិបតីនោះទេ។ នេះបើតាមការចុះផ្សាយរបស់សារព័ត៌មានBBC។
ទោះយ៉ាងណាសេតវិមានបានប្រកាសច្រានចោលព័ត៌មាននោះ ថា ជាការចោទប្រកាន់ជាការមិនពិតទេ។ សេតវិមានបញ្ជាក់ថា ប្រធានាធិបតីត្រាំ មិនដែលបានស្នើឲ្យលោក Comey ឬ អ្នកណាមួយបញ្ចប់ការស៊ើបអង្កេតនានា រួមទាំងការស៊ើបអង្កេតលើលោក ឧត្តមសេនីយ៍ Flynn នោះទេ។
លោក Jame Comey បានដឹកនាំយ៉ាងសកម្មក្នុងការស៊ើបអង្កេតករណីដែលរងការចោទថា រុស្ស៊ីបានចួលក្នុងប្រព័ន្ធបច្ចេកវិទ្យារបស់អាមេរិក ហើយកែប្រែទិន្នន័យបោះឆ្នោតឲ្យលោកត្រាំទទួលបានជ័យជម្នះ។
លោក Jame Comey ត្រូវបានលោកត្រាំ បណ្តេញចេញពីតំណែងនៅក្នុងដើមខែឧសភានេះ ដោយចោទថា ធ្វើការងារមិនបានល្អ ប៉ុន្តែខាងគណបក្សប្រជាធិបតេយ្យចោទថា លោកត្រាំ ធ្វើបែបនេះ ដោយសារខឹងលោក Comey ស៊ើបអង្កេតរវាងទំនាក់ទំនងរបស់លោកជាមួយរុស្ស៊ី ជុំវិញលទ្ធផលបោះឆ្នោតចុងឆ្នាំ២០១៦៕