មន្ដ្រីការពារសិទ្ធិមនុស្សអាដហុកខេត្ដព្រះវិហារឲ្យដឹងថា អាជ្ញាធរខេត្ដនេះព្រមានចាត់វិធានការតាមផ្លូវច្បាប់លើស្ថាប័នសិទ្ធិមនុស្សករណីបើកវគ្គបណ្ដុះបណ្ដាលអប់រំច្បាប់ដល់សហគមន៍ ដោយអះអាងថាគ្មានច្បាប់អនុញ្ញាត។
សមាគមអាដហុកបានបើកវគ្គបណ្ដុះបណ្ដាលច្បាប់ស្ដីពីសិទ្ធិមនុស្សដល់សហគមន៍រយៈពេលពីរថ្ងៃចាប់ពីថ្ងៃទី១៦ដល់ថ្ងៃទី១៧ខែមិថុនាឆ្នាំ២០១៦នេះ នៅភូមិម្លូរព្រៃ ឃុំប្រើសក្អក ស្រុកឆែប ខេត្ដព្រះវិហារ ដែលមានពលរដ្ឋចំនួនចូលរួម៤២នាក់។
អ្នកសម្របសម្រួលសមាគមការពារសិទ្ធិមនុស្សអាដហុកខេត្ដព្រះវិហរលោក ឡោ ចាន់ ប្រាប់VODថានៅព្រឹកថ្ងៃសុក្រនេះ អភិបាលរងស្រុកឆែបលោក សុខ មុន្នីរិទ្ធ បានបញ្ជាឲ្យសមត្ថកិច្ចផ្អាកវគ្គបណ្ដុះបណ្ដាលនោះក្រោមហេតុផលថាគ្មានច្បាប់អនុញ្ញាតពីអាជ្ញាធរខេត្ដព្រះវិហារ ប៉ុន្ដែលោក ឡោ ចាន់ អះអាងថាលោកបានជូនដំណឹង៥ថ្ងៃមុនមកហើយ។ លោកបន្ដថា អភិបាលរងស្រុករូបនោះព្រមានប្រើកម្លាំងសមត្ថកិច្ចចាត់វិធានការលើរូបលោកបើសិននៅបន្ដបើកវគ្គអប់រំដល់ប្រជាសហគមន៍នៅតំបន់នោះ។ ទោះជាយ៉ាងណាលោកបញ្ជាក់ថា លោកនៅតែបន្ដបើវគ្គនេះបើទោះបីមានការគំរាមកំហែងក្ដី។
លោក ឡោ ចាន់ បានចាត់ទុកការព្រមានរបស់អភិបាលរងស្រុករូបនោះថាជាការគំរាមកំហែងបំបិទសិទ្ធិសេរីភាពនិងបំបាក់ស្មារតី ដែលលោកថាការបណ្តុះបណ្តាលនោះមានច្បាប់អនុញ្ញាតរយៈពេល១ឆ្នាំម្ដងពីនាយករដ្ឋបាលសាលាខេត្ដព្រះវិហារ។
VOD មិនអាចទាក់ទងអភិបាលរងស្រុកឆែប លោក សុខ មុន្នីរិទ្ធ ដើម្បីឆ្លើយតបពីការចោទប្រកាន់នេះបានទេ ខណៈនាយករដ្ឋសាលាខេត្ដព្រះវិហារលោក អ៊ុង វុទ្ធី បិទទូរស័ព្ទបន្ទាប់ពីប្រាប់ស្ថាប័ន។
ទោះជាយ៉ាងណាមន្ដ្រីផ្នែកតស៊ូមតិនៃអង្គការពន្លកខែ្មរខេត្ដព្រះវិហារលោក ប៉ឹក សោភណ្ឌ មានប្រសាសន៍ថា ការបើកវេទិកាសាធារណៈឬវគ្គបណ្ដុះបណ្ដាលអប់រំច្បាប់ លោកថាមិនចំាបាច់មានច្បាប់អនុញ្ញាតិនោះទេ ដោយគ្រាន់តែជូនដំណឹងដល់អាជ្ញាធរប៉ុណ្ណោះ។ លោកថាការគំរាមកំហែងលើមន្ដ្រីសិទ្ធិមនុស្សនេះផ្ទុយពីច្បាប់រដ្ឋធម្មនុញ្ញរបស់ជាតិ ដែលលោកថាធ្វើឲ្យពលរដ្ឋខ្វះការយល់ដឹង។
រដ្ឋធម្មនុញ្ញមាត្រា៤១ចែងថា ប្រជាពលរដ្ឋខ្មែរគ្រប់រូបមានសិទ្ធិសេរីភាពខាងបញ្ចេញមតិ ទទួលព័ត៌មាន និងផ្ដល់ព័ត៌មាន។ ប៉ុន្តែមាត្រាដដែលនេះចែងថា ជនណាក៏ដោយមិនអាចឆ្លៀតប្រើសិទ្ធិនេះរំលោភនាំឲ្យប៉ះពាល់ដល់កិតិ្ដយសដល់អ្នកដទៃ ទំនៀមទម្លាប់ល្អរបស់សង្គម សណ្ដាប់ធ្នាប់សាធារណៈ និងសន្ដិសុខជាតិបានឡើយ៕
