រដ្ឋមន្រ្តីការបរទេសកម្ពុជា លោក ប្រាក់ សុខុន អំពាវនាវឲ្យមានការអនុវត្តពេញលេញនិងប្រកបដោយប្រសិទ្ធភាពចំពោះសេចក្តីថ្លែងការណ៍នៃគោលការណ៍ណែនាំ(DOC)នៃភាគីដែលពាក់ព័ន្ធនឹងសមុទ្រចិនខាងត្បូង ហើយឲ្យមានការពិគ្រោះយោបល់ទៅលើក្រមប្រតិបត្តិ(COC)។
ក្នុងកិច្ចប្រជុំពិសេសរដ្ឋមន្រ្តីការបរទេសអាស៊ាន-ចិនដែលបានរៀបចំឡើងនៅថ្ងៃទី១៤ ខែមិថុនា ឆ្នាំ២០១៦ នៅទីក្រុងគុណមីង ប្រទេសចិន លោក ប្រាក់ សុខុន ទេសរដ្ឋមន្រ្តី រដ្ឋមន្រ្តីការបរទេស និងកិច្ចសហប្រតិបត្តិការអន្តរជាតិកម្ពុជា បានលើកឡើងថាខ្លឹមសារដែលមានចែងនៅក្នុងសេចក្តីថ្លែងការណ៍របស់ភាគីសមុទ្រចិនខាងត្បូង(DOC)មិនទាន់ត្រូវបានអនុវត្តន៍ឲ្យបានពេញលេញដោយប្រទេសដែលជាភាគីពាក់ព័ន្ធ។ លោកបានអំពាវនាវថាឲ្យមានការអនុវត្តឲ្យបានពេញលេញនិងទាំងស្រុងចំពោះខ្លឹមសារនៃសេចក្តីថ្លែងការណ៍ស្តីពីក្រមប្រតិបត្តិនោះ។
កាលពីកម្ពុជាធ្វើម្ចាស់នៃកិច្ចប្រជុំអាស៊ានឆ្នាំ២០១២ កម្ពុជាមិនអាចជំរុញឲ្យភាគីជម្លោះនៃដែនសមុទ្រចិនខាងត្បូង ដែលមានមហាយក្សចិន វៀតណាម និងហ្វីលីពីន ជាភាគីជម្លោះអាចរកដំណោះស្រាយបានទេ ដោយមានការរិះគន់ថាកម្ពុជាលំអៀងទៅរកចិន។ ប៉ុន្តែលោក ហ៊ុន សែន បានបដិសេធការលើកឡើងនេះ៕
