អគ្គនាយកនៃក្រុមហ៊ុនអចលនទ្រព្យ លោក ស៊ឹង ប៊ុណ្ណា បានប្រាប់តុលាការថាលោកមិនមានបំណងក្នុងការចេញមូលប្បទានបត្រ(សែក)អត់លុយនោះទេ ខណៈលោកត្រូវបានតុលាការនាំមកសួរនាំបន្ថែមពាក់ព័ន្ធនឹងការចោទថាចេញសែកអត់លុយជាង៤០ម៉ឺនដុល្លារ។
កាលពីថ្ងៃទី១០ ខែមិថុនា អគ្គនាយកក្រុមហ៊ុនប៊ុណ្ណារៀលធីគ្រុប ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្នតាមបទចោទមិនបំពេញកាតព្វកិច្ចចំពោះឧបករណ៍អាចជួញដូរបាន តាមមាត្រា២៣១នៃច្បាប់ស្តីពីឧបករណ៍អាចជួញដូរបាននិងប្រតិបត្តិការទូទាត់។
មេធាវីការពារក្តីឲ្យលោក ស៊ឹង ប៊ុណ្ណា លោក ជាវ តុលា មានប្រសាសន៍ប្រាប់វីអូឌីថាតុលាការបានសាកសួរលោក ប៊ុណ្ណា នៅព្រឹកនេះអំពីរឿងដែលលោកត្រូវអយ្យការចោទប្រកាន់នោះតែលោកថា ជាការឆ្លើយតបលោក ប៊ុណ្ណា បានប្រាប់ទៅតុលាការវិញថា លោកមិនមានបំណងក្នុងការចេញសែកអត់ទឹកប្រាក់ទៅកាន់ដើមបណ្តឹងនោះទេ ដោយលោកថាការចេញសែកនេះគឺជាការតម្កល់ទុកដោយមានកិច្ចសន្យាច្បាស់លាស់។
លោកថា៖ “គាត់[ស៊ឹង ប៊ុណ្ណា] ឆ្លើយថាសែកហ្នឹងមិនមែនគាត់ចេញដើម្បីសងប្រាក់គេទេគឺយើងមានកិច្ចសន្យាជាមួយហ្នឹងគ្នាថា ជាការតម្កល់ទុកទេ។ មានន័យថាមិនមែនជាសែកសម្រាប់ធ្វើការទូទាត់ប្រាក់ទេ”។
លោកមេធាវីបានបញ្ជាក់ថា៖ “គឺគាត់[ស៊ឹង ប៊ុណ្ណា]មានកិច្ចសន្យាជាមួយហ្នឹងគ្នាពីអ្នកម្ចាស់បំណុលនិងមានប្រថាប់ត្រាមេធាវីនៅក្នុងហ្នឹងគឺបញ្ជាក់ថាសែកដែលគាត់ចេញនេះគឺគ្រាន់តែជាការតម្កល់ទុកតែប៉ុណ្ណោះ ហើយក្នុងពេលគាត់អត់លុយគឺមានបុគ្គលផ្សេងមួយទៀតមានឈ្មោះនៅក្នុងកិច្ចសន្យាហ្នឹង គាត់ជាអ្នកធានាក្នុងការទូទាត់ប្រាក់សងទៅម្ចាស់បំណុលដោយមិនឲ្យជាប់ពាក់ព័ន្ធនឹងលោក ប៊ុណ្ណា ទេ”។
លោកមេធាវីបានបន្ថែមថានៅពេលនេះខ្លួនកំពុងតែពិនិត្យមើលសំណុំរឿងនិងកំពុងរៀបចំឯកសារដើម្បីសុំឲ្យលោក សឹង ប៊ុណ្ណា បាននៅក្រៅឃុំ ដោយលោកសង្ឃឹមថាតុលាការនឹងពិនិត្យមើលលទ្ធភាពនានាដែលអាចឲ្យកូនក្តីលោកបាននៅក្រៅឃុំបណ្តោះអាសន្នបាន។
វីអូឌីមិនទាន់អាចទាក់ទងលោក កែវ ហ៊ុន ដែលជាម្ចាស់នៃបណ្តឹងនេះដើម្បីបញ្ជាក់បន្ថែមបាននៅឡើយទេ។
លោក សឹង ប៊ុណ្ណា ត្រូវបានសារព័ត៌មានក្នុងស្រុកចុះផ្សាយថាលោកត្រូវបានប្តឹងដោយលោក កែវ ហ៊ុន ដោយសារតែលោកបានចេញសែកអត់លុយចំនួន៤០ម៉ឺនដុល្លារដល់លោក កែវ ហ៊ុន។
បើតុលាការរកឃើញថាលោកមានកំហុស លោកនឹងត្រូវផ្តន្ទាទោសពិន័យជាប្រាក់ចំនួន២លានរៀលដល់៦លានរៀលនិងត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ៕