របាយការណ៍ពីក្រសួងទេសចរណ៍ បានឲ្យដឹងថា ចំនួនភ្ញៀវទេសចរបរទេសដែលបានធ្វើដំណើរមកដល់ប្រទេសកម្ពុជាតាមជើងហោះហើរ បានកើនឡើង ៥.៤ភាគរយ នៅក្នុងរយៈពេល ៥ខែដំបូង នៃឆ្នាំ២០១៦ ខណៈដែលភ្ញៀវទេសចរធ្វើដំណើរមកដល់ប្រទេសកម្ពុជាតាមផ្លូវគោក បានធ្លាក់ចុះ ១.២ភាគរយ។
តួលេខរបាយការណ៍ក្រសួងទេសចរណ៍ បានឲ្យដឹងថា ចំនួនភ្ញៀវទេសចរអន្តរជាតិមកដល់ប្រទេសកម្ពុជានៅចន្លោះខែមករា ដល់ខែឧសភាកន្លងមក បានកើនឡើងពី ១ ៩៨៣ ៧២៣នាក់ នៅឆ្នាំ២០១៥ ទៅដល់ ២០៣០ ៧៦២នាក់ នៅឆ្នាំ២០១៦នេះ ពោលគឺបានកើនឡើង ២.៤ភាគរយ។
តួលេខដដែលបានបង្ហាញថា ចំនួនភ្ញៀវទេសចរអន្តរជាតិ ដែលបានធ្វើដំណើរមកដល់ប្រទេសកម្ពុជាតាមព្រលានយន្តហោះអន្តរជាតិភ្នំពេញ និងព្រលានយន្តហោះអន្តរជាតិសៀមរាប បានកើនឡើង ១ ០៧៥ ៩៤៥នាក់នៅក្នុងរយៈពេល ៥ខែកាលពីឆ្នាំមុន ទៅដល់ ១ ១៣៣ ៩៤០នាក់ នៅក្នុងរយៈពេលដូចគ្នានៃឆ្នាំ២០១៦នេះ។
ជាមួយគ្នានោះដែរ ចំនួនភ្ញៀវទេសចរធ្វើដំណើរមកដល់ប្រទេសកម្ពុជាតាមរយៈផ្លូវគោក បានធ្លាក់ចុះ ១.២ភាគរយ ពោលគឺបានធ្លាក់ចុះពីជាង ៩០ម៉ឺននាក់ មកនៅត្រឹមជាង ៨៩ម៉ឺននាក់ នៅក្នុងរយៈពេល ៥ខែដំបូងនៃឆ្នាំ។
យោងតាមតួលេខនេះ ភ្ញៀវទេសចរវៀតណាម នៅតែបន្តនាំមុខគេនៅលើតារាងនៃភ្ញៀវទេសចរអន្តរជាតិមកដល់ប្រទេសកម្ពុជា និងតាមពីក្រោយដោយភ្ញៀវទេសចរចិន កូរ៉េខាងត្បូង និងថៃ៕