ប្រជាពលរដ្ឋចំនួន៨សហគមន៍ នៅតាមបណ្តោយផ្លូវដែក បានប្រមូលផ្តុំនិងយកញត្តិដាក់សាលារាជធានីភ្នំពេញជាថ្មីទៀត ដោយថាទាមទារឲ្យមន្ត្រីស្ថាប័ននេះ ពន្យល់ឲ្យច្បាស់ពីគម្រោងអភិវឌ្ឍផ្លូវដែកនៅតំបន់នោះ ខណៈពួកគេព្រួយបារម្ភពីការបណ្តេញចេញដោយបង្ខំដូចសហគមន៍ដទៃ។
សហគមន៍ទំាងនោះរួមមាន សហគមន៍អភិវឌ្ឍថ្មី សហគមន៍រួមចិត្តតែមួយ សហគមន៍ភូមិ២ សហគមន៍ភូមិ១៧ សហគមន៍ភូមិ២១ សហគមន៍ភូមិ២៣ សហគមន៍ភូមិ១០៤ សហគមន៍ភូមិ១០៥ ស្ថិតនៅខណ្ឌដូនពេញ និងខណ្ឌទួលគោក រាជធានីភ្នំពេញ។
ប្រជាសហគន៍ភូមិ១៧ លោក នូ សារិន បានថ្លែងប្រាប់អ្នកយកព័ត៌មានបន្ទាប់ពីចូលដាក់ញត្តិជាថ្មីនៅសាលារាជធានីភ្នំពេញថា អ្នកនាំពាក្យសាលារាជធានីភ្នំពេញលោក មាន ចាន់យ៉ាដា បានប្រាប់ប្រជាពលរដ្ឋនៅ បណ្តោយផ្លូវដែកថា កុំឲ្យបារម្ភពីគម្រោងអភិវឌ្ឍនៅតំបន់នោះ ដោយថានៅពេលសាលារាជធានីចុះ ធ្វើការអភិវឌ្ឍ នោះសាលាក្រុងនឹងបើកវេទិកាសាធារណៈដើម្បីសុំយោបល់ពីអ្នករងផលប៉ះពាល់។
យ៉ាងណាក៏ដោយ លោក សារិន បញ្ជាក់ថា លោកមិនជំទាស់នឹងគម្រោងអភិវឌ្ឍនៅតាមបណ្តោយផ្លូវដែកនោះទេ ប៉ុន្តែលោកចង់ឲ្យអភិបាលក្រុងលោក ឃួង ស្រេង ដែលទើបឡើងកាន់តំណែងពន្យល់និងបង្ហាញឲ្យច្បាស់ ពីគម្រោងអភិវឌ្ឍនៅតាមបណ្តោយផ្លូវដែក ដោយថាពួកគេព្រួយបារម្ភពីផលប៉ះពាល់លំឋាន ក្រោមគម្រោងអភិវឌ្ឍនៅតំបន់នោះ។
លោកនិយាយថា «ចង់ជួបឯកឧត្តម ឃួង ស្រេង ដែលលោកឡើងមកថ្មីនេះ ចង់ដឹងថាញត្តិដែលខ្ញុំដាក់ គាត់ដោះស្រាយដល់កម្រិតប៉ុន្មាន ហើយការចុះវាស់សព្វថ្ងៃនេះ ថាតើគេវាស់យ៉ាងម៉េច ហើយចង់ដឹងការងារអភិវឌ្ឍថា តើគេយកប៉ុន្មានម៉ែត្រឲ្យច្បាស់លាស់ វាងាយស្រួលប្រជាពលរដ្ឋធ្វើការតស៊ូមតិ ពីព្រោះកាលពីជំនាន់មុន ដែលឯកឧត្តមលោកមុន[ប៉ា សុជាតិវង្ស]លោកនៅថា ពី៣០ម៉ែត្រ ទៅ២៥ម៉ែត្រ និង១០ម៉ែត្រកន្លះ បើសិនត្រឹម១០ម៉ែត្រ ឬ១០ម៉ែត្រកន្លះ ផ្ទះណាខ្លះត្រូវអស់ទំាងស្រុងតែម្តង»។
ប្រជាសហគមន៍ភូមិ២៣ អ្នកស្រី មាស ស្រីមុំ មានប្រសាសន៍ថា គាត់មិនមានជំនឿលើការសន្យារបស់សាលារាជធានីភ្នំពេញនោះទេ ដោយថា ស្ថាប័ននេះតែងតែពន្យារពេលមិនចង់បង្ហាញប្លង់ឲ្យប្រជាពលរដ្ឋដឹងជាសាធារណៈនោះទេ។ អ្នកស្រីព្រមានថា បើសាលារាជធានីមិនបង្ហាញព័ត៌មានឲ្យច្បាស់ទេ នោះពួកគេនឹងនាំគ្នាទ្រង់ទ្រាយធំមកស្ថាប័ននេះជាថ្មីទៀតនៅដើមខែក្រោយនេះ។
អ្នកស្រីព្រមានថា «បើសិនជាសាលារាជធានីលោក មិនគិតគូដល់ពួកខ្ញុំ ពួកខ្ញុំនឹងត្រឡប់មកវិញនៅថ្ងៃទី៧ ខែ៨ ខ្ញុំនឹងត្រឡប់មកជាទ្រង់ទ្រាយធំ ដើម្បីនូវអ្វីដែលពួកខ្ញុំត្រូវការ»។
VOD បានទាក់ទងទៅអ្នកនាំពាក្យសាលារាជធានីភ្នំពេញ លោក មាន ចាន់យ៉ាដា ដែរ ប៉ុន្តែលោកបង្វែរសំនួរឲ្យទៅសួរអ្នកនាំពាក្យសាលារាជធានីភ្នំពេញ លោក ម៉េត មាសភក្តី វិញ។ លោក មាសភក្តី បានប្រាប់ទៅពលរដ្ឋថា សាលារាជធានីមិនទាន់មានគម្រោងអភិវឌ្ឍនៅតំបន់នោះទេ ដោយថាបើអភិវឌ្ឍ ស្ថាប័នរដ្ឋនឹងជូនដំណឹងទៅពលរដ្ឋ ដើម្បីសុំយោបល់ផងដែរ។
លោកនិយាយថា «ផ្លូវរថភ្លើងវាវែង តែយើងបានជម្រាបគាត់រួចហើយ យើងធ្វើតែពីផ្លូវរថភ្លើងដែលចេញពីទំបន់៧០ ឡើងទៅគីឡូម៉ែត្រលេខ៦ ខាងឬស្សីកែវ មួយកំណាត់ចុះមកតំបន់បឹងកក់វិញ តំបន់ទួលគកវិញ គឺមិនមានធ្វើអ្វីទេ ហើយក៏បានជម្រាបគាត់ឲ្យបានស្ងប់ចិត្តការងារហ្នឹងដែរ តែគ្រាន់តែមានបងប្អូនយើងខ្លះគាត់នៅតែបារម្ភ ដោយសារថា ពាក្យថាផ្លូវរថភ្លើង យើងថាធ្វើមួយកំណាត់ គាត់ថាចេះតែខ្លះថា ធ្វើមួយកំណាត់ចុះមកក្រោមទៀត ហើយត្រូវបានជម្រាបគាត់អស់ហើយ ថាយើងអត់មានធ្វើអីទេ ពាក់ព័ន្ធមួយកំណាត់ចុះមកតំបន់បឹងកក់»។
ប្រធានក្រុមការងារពិសេសសិទ្ធិលំនៅឋានលោក សៀ ភារម្យ មានប្រសាសន៍ថា បើធ្វើការអភិវឌ្ឍនៅតំបន់ផ្លូវដែកឲ្យមានសុក្រិតភាពដល់ពលរដ្ឋដែលរងផលប៉ះពាល់ទេ នឹងធ្វើឲ្យសន្លឹកឆ្នោតនៅឆ្នាំ២០១៨របស់បក្សកាន់អំណាចថយចុះ។
លោកមានប្រសាសន៍ថា «ការបោះឆ្នោតឆ្នាំ២០១៨តំណាងរាស្ត្រ ជិតមកដល់ហើយ ខែ៧ នៅសល់មួយឆ្នាំទៀត បើសិនជាសាលារាជធានីភ្នំពេញ ធ្វើការមិនប្រយ័ត្នប្រយ៉ែងទេ វាអាចប៉ះពាល់ទៅដល់សំឡេងឆ្នោតរបស់គណបក្សប្រជាជនដែលកំពុងកាន់អំណាចផងដែរ»។
ប្រជាសហគមន៍ទំាងនោះបានអះអាងប្រហាក់ប្រហែលគ្នាថា ពួកគេដាក់ញត្តិទៅសាលារាជធានីភ្នំពេញច្រើនដងហើយ ដោយថាតំាងពីអតីតអភិបាលរាជធានីភ្នំពេញលោក ប៉ា សុជាតិវង្ស ឲ្យពន្លឿនបង្ហាញប្លង់មេ ក្រោមគម្រោងអភិវឌ្ឍផ្លូវដែកនោះ ប៉ុន្តែស្ថាប័ននេះចេះតែពន្យារពេលមិនបង្ហាញព័ត៌មានជាក់លាក់ រហូតដល់អភិបាលថ្មីលោក ឃួង ស្រេង ចូលកាន់តំណែង។
ករណីនេះ ជាដើមចមនាំឲ្យពលរដ្ឋមានការព្រួយបារម្ភពីគម្រោងអភិវឌ្ឍរបស់សាលារាជធានីភ្នំពេញ នៅតាមបណ្តោយផ្លូវដែកនោះ ដោយពួកគេថា កន្លងទៅការអភិវឌ្ឍនៅក្នុងរាជធានីភ្នំពេញមានការបណ្ដេញពលរដ្ឋចេញពីលំនៅស្ថានមានដូចជា បឹងកក់ បុរីកីឡា ដីក្រហម សំបុកចាប ដោយបើកផ្លូវឲ្យក្រុមហ៊ុនចូលអភិវឌ្ឍ ហើយមកដល់ពេលនេះអ្នកខ្លះមិនទាន់បានសំណងនៅឡើយ៕
