អង្គភាពប្រឆាំងអំពើពុករលួយបានឃាត់ខ្លួនមន្ត្រីម្នាក់ផ្នែករដ្ឋបាលព្រៃឈើឆ្លូងខេត្តក្រចេះ បន្ទាប់ពីឃ្លីបវីដេអូមួយត្រូវបានគេបង្ហោះនៅតាមបណ្ដាញទំនាក់ទំនងសង្គមហ្វេសប៊ុក ស្ដីពីសកម្មភាពមន្ត្រីខាងលើបើករថយន្តទៅជំរិតទារលុយពីពលរដ្ឋរកស៊ីដឹកជន្លង់ម្រេចនាពេលថ្មីៗនេះ។
ព្រះរាជអាជ្ញារងតុលាការខេត្តក្រចេះ លោក ជា សុភ័ក្រ ប្រាប់ VOD នៅល្ងាចនេះថា លោក ឃួន ជីវិន មន្ត្រីខណ្ឌរដ្ឋបាលព្រៃឈើក្រចេះ ត្រូវបានចោទប្រកាន់ពីរករណី តាមមាត្រា៣៥នៃច្បាប់ប្រឆាំងអំពើពុករលួយ និងមាត្រា១០១នៃច្បាប់ព្រៃឈើ។
ក្នុងវីដេអូឃ្លីបដែលបង្ហោះតាមហ្វេសប៊ុក បង្ហាញថាលោក ឃួន ជីវិន បានទារប្រាក់ចំនួន១០ដុល្លារពីអ្នកដឹកឈើមួយឡាន ដោយលោកសំអាងថាអ្នករកស៊ីដឹកជន្លង់ម្រេចទាំងអស់នោះ មិនប្រាប់លោកឲ្យដឹងមុន៕