ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ កាលពីថ្ងៃម្សិលមិញណេះ បានជំរុញទៅប៉ូលិសឲ្យសម្លាប់ជនសង្ស័យគ្រឿងញៀនរាប់សិបនាក់នៅរៀងរាល់ថ្ងៃ ខណៈដែលលោកបានកោតសរសើរដល់មន្ត្រីប៉ូលិស ដែលបានបាញ់សម្លាប់មនុស្ស ៣២នាក់ នៅសប្ដាហ៍នេះ នៅក្នុងប្រតិបត្តិការបង្ក្រាបគ្រឿងញៀនដ៏តក់ស្លុតមួយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
សម្ដីលោក ឌូទើតេ បានកើតឡើង ខណៈដែលលោកទទួលស្គាល់បញ្ហាធំៗនៅក្នុងសង្គ្រាមគ្រឿងញៀនរបស់លោក ដែលបានសម្លាប់មនុស្សរាប់ពាន់នាក់រួចមកហើយ ដោយលោកថា លោកអាចនឹងមិនទទួលបានជោគជ័យឆាប់រហ័សដូចដែលលោកបានសន្យានោះឡើយ។
នៅក្នុងប្រតិបត្តិការបង្ក្រាបគ្រឿងញៀនដ៏បង្ហូរឈាមមួយ ប៉ូលិសបានរាយការណ៍អំពីការសម្លាប់មនុស្ស ៣២នាក់ នៅក្នុងប្រតិបត្តិការឆ្មក់ចូលបង្ក្រាបជនសង្ស័យជួញដូរគ្រឿងញៀនកាលពីថ្ងៃចន្ទកន្លងមកនេះ នៅក្នុងខេត្តប៊ូឡាខាន ស្ថិតនៅជាប់នឹងទីក្រុងម៉ានីល៕
