ក្រសួងធនធានទឹកនិងឧតុនិយមអំពាវនាវដល់ប្រជាពលរដ្ឋឲ្យមានការប្រុងប្រយ័ត្ន ខណៈប្រទេសកម្ពុជានឹងទទួលរងឥទ្ធិពលសម្ពាធទាប បណ្តាលឲ្យរាជធានីភ្នំពេញ និងបណ្តាខេត្តមួយចំនួនទៀតមានភ្លៀងធ្លាក់ខ្លាំងនិងបង្គួរ រួមទាំងផ្គររន្ទះ។
បើតាមសេចក្តីប្រកាសរបស់ក្រសួងធនធានទឹកកាលពីម្សិលមិញឲ្យដឹងថា ជ្រលងសម្ពាធទាបមួយបានកើតឡើងនៅសមុទ្រចិនខាងត្បូង និងបន្តមានឥទ្ធិពលមកប្រទេសកម្ពុជា បណ្តាលឲ្យរាជធានី និង បណ្តាខេត្តស្ទើរទាំងអស់មានភ្លៀងធ្លាក់ខ្លាំង និង មធ្យម ចាប់ពីថ្ងៃទី១៧ ដល់ថ្ងៃទី២០ ខែសីហា។
ខេត្តភាគច្រើននៅតំបន់ទំនាបកណ្តាលនិងខ្ពង់រាបមានការប្រឈមទៅនឹងភ្លៀងធំ ហើយតំបន់មាត់សមុទ្រអាចមានរលកធំនិងព្យុះផង។
ដោយហេតុនេះ ក្រសួងអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្នចំពោះជំនន់ទឹកភ្លៀង ជាពិសេសអ្នកនេសាទ ឬ អ្នកធ្វើដំណើរតាមផ្លូវសមុទ្រ ឲ្យមានការត្រៀមខ្លួន ដើម្បីជៀសវាងគ្រោះថ្នាក់៕
