រដ្ឋមន្ត្រីការពារជាតិជប៉ុន អ្នកស្រី តូម៉ូមី អុីណាដា បានថ្លែងកាលពីថ្ងៃម្សិលមិញថា ជប៉ុននឹងបង្កើនសកម្មភាពរបស់ខ្លួននៅតំបន់មានជម្លោះនៅសមុទ្រចិនខាងត្បូង តាមរយៈការល្បាតរួមគ្នា
ជាមួយសហរដ្ឋអាមេរិក និងសមយុទ្ធទ្វេភាគី និងពហុភាគីជាមួយកងទ័ពជើងទឹកនៅក្នុងតំបន់នេះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
Reuters បានដកស្រង់សម្ដីអ្នកស្រី អ៊ីណាដា ដែលបានថ្លែងនៅឯមជ្ឈមណ្ឌលសម្រាប់ការសិក្សាយុទ្ធសាស្ត្រអន្តរជាតិថា ការបង្កើនការចូលរួមរបស់ជប៉ុននៅក្នុងតំបន់នោះ នឹងមានការកសាងសមត្ថភាពបណ្ដាជាប់ឆ្នេរសមុទ្រ ជាទីដែលជប៉ុន និងអាមេរិកព្រួយបារម្ភចំពោះការអះអាងជាម្ចាស់ពីសំណាក់ប្រទេសចិន។
បើតាម Reuters ជប៉ុនក៏កំពុងមានជម្លោះផ្ទាល់ខ្លួនជាមួយចិនផងដែរ ជុំវិញដែនដីនៅសមុទ្រចិនខាងកើត។ អ្នកស្រី អ៊ីណាដា ថ្លែងថា ប្រសិនបើពិភពលោកមើលស្រាលចំពោះការប៉ុនប៉ងផ្លាស់ប្ដូរច្បាប់ ហើយអនុញ្ញាតឲ្យមានការរំលោភច្បាប់ ផលវិបាកអាចមានទំហំធំជាសកល។
អ្នកស្រីថ្លែងថា៖ “ក្នុងបរិបថនេះ ខ្ញុំគាំទ្រយ៉ាងខ្លាំងក្លាចំពោះប្រតិបត្តិការសេរីភាពនាវាចរណ៍របស់កងទ័ពជើងទឹកអាមេរិក ដែលបានធ្វើដំណើរវែងឆ្ងាយឆ្ពោះទៅរកការរក្សាសណ្ដាប់ធ្នាប់ដែនទឹកអន្តរជាតិផ្អែកតាមច្បាប់”៕