របាយការណ៍របស់ទីផ្សារកៅស៊ូពិភពលោកបានឲ្យដឹងថា កម្ពុជានាំចេញកៅស៊ូទៅទីផ្សារអន្ដរជាតិ កើនឡើងជាង៣០ភាគរយរយៈពេល៩ខែដើមឆ្នាំនេះ ស្របពេលដែលក្រសួងកសិកម្មរបស់កម្ពុជាថា តម្លៃកៅស៊ូកើនឡើងជាងឆ្នាំមុន។
បើតាមការចុះផ្សាយរបស់ទីផ្សារកៅស៊ូពិភពលោក (Global Rubber Markets) ឲ្យដឹងថា ចាប់ពីខែមករាដល់ ខែកញ្ញាឆ្នាំ២០១៧ កម្ពុជាប្រមូលផលពីដំណាំកៅស៊ូបានជិត ១១ម៉ឺន៦ពាន់តោន (១១៥, ៨៤៣តោន) ហើយនាំចេញបានជិត ១១ម៉ឺន៥ពាន់តោន (១១៤, ៩៩១តោន) និងរកចំណូលបាន ១៩២លានដុល្លារអាមេរិក។ របាយការណ៍បញ្ជាក់ថា ការនាំចេញនេះកើតឡើង៣០ភាគរយ។
ចំណែកតម្លៃកៅស៊ូ ក្រសួងកសិកម្ម រុក្ខាប្រមាញ់ និងនេសាទ ឲ្យដឹងថា សម្រាប់ឆ្នាំ២០១៧ តម្លៃកៅស៊ូជាមធ្យម ១តោនថ្លៃ១៦០០ដុល្លារ (១ ៦៧២ដុល្លារ)តម្លៃនេះកើនឡើងបើប្រៀបធៀបឆ្នាំ២០១៦ ដែលតម្លៃក្នុង១តោនតែ ១០៩៤ ដុល្លារ។
បើតាមរបាយការណ៍ឲ្យដឹងទៀតថា បណ្ដាប្រទេស ដែលកម្ពុជា នាំចេញកៅស៊ូ ទៅលក់រួមមាន វៀតណាម សិង្ហបុរី ម៉ាឡេស៊ី ជាពិសេសប្រទេសចិន ដែលជាទីផ្សារដ៏ធំរបស់កម្ពុជា។
អគ្គនាយកនៃអគ្គនាយកដ្ឋានកៅស៊ូ របស់ក្រសួងកសិកម្ម លោក ប៉ុល សុផា ពន្យល់ថា មានកត្តាមួយចំនួន ជំរុញឲ្យការនាំចេញកៅស៊ូ មានការកើនឡើងខ្ពស់ ដោយថា មកពីការពង្រីកផ្ទៃដីដាំដុះ និងការប្រមូលផលកៅស៊ូដ៏ច្រើននៅឆ្នាំនេះ។
លោកថា កន្លងទៅការនាំចេញកៅស៊ូ ជួបបញ្ហាបម្រែបម្រួលនៃតម្លៃលើទីផ្សារ និងមួយទៀត លោកថា ដោយសារកម្ពុជា ត្រូវពឹងផ្អែកខ្លាំងលើទីផ្សារអន្ដរជាតិ។ លោកបន្ថែមថា រដ្ឋាភិបាល កំពុងពង្រឹងផលិតកម្ម និងការប្រើប្រាស់ក្នុងស្រុក និងថា បើប្រៀបធៀបនឹងប្រទេសក្បែរខាង កម្ពុជាមិនទាន់អាចប្រកួតប្រជែងជាមួយគេបានទេ។
លោកថា៖ «ហើយមកដល់សព្វថ្ងៃនេះ យើងមានផ្ទៃដី៤៣ម៉ឺនហិកតាហើយ អញ្ចឹងវាកើនឡើងបន្ដិចបន្ដួចទៀតទេ ផ្ទៃដីដែលអាចដាំបាន អញ្ចឹងយើងអត់អាចថា ប្រកួតប្រជែងជាមួយប្រទេសជិតខាងបានទេ ព្រោះប្រទេសថៃ វាមាន៣លានហិកតាជាង ហើយវៀតណាម ក៏មាន១លានជាងហិកតា ដូច្នេះយើងមិនអាចប្រកួតប្រជែងជាមួយគេទេ គឺយើងគ្រាន់តែពង្រឹងនៃការប្រើប្រាស់ក្នុងស្រុករបស់យើង ដើម្បីបង្កើនតម្លៃបន្ថែម និងបង្កើនការងារ»។
សហប្រធានក្រុមការងារផ្នែកកសិកម្ម និងកសិឧស្សាហកម្មឯកជន លោក ម៉ុង ឫទ្ធី មានប្រសាសន៍ថា កំណើននៃការនាំចេញនេះ គឺដោយសារតែតម្លៃកៅស៊ូកើនឡើង ទើបម្ចាស់ដំណាំកៅស៊ូខំប្រមូលផល។
លោកថា ដើម្បីរក្សាកំណើនការនាំចេញកៅស៊ូនេះ គឺមានតែបន្ដពង្រឹងផលិតកម្មក្នុងស្រុក ដើម្បីយកទៅលក់លើទីផ្សារអន្ដរជាតិ។
លោកថា៖ «ប្រសិនណាតម្លៃកៅស៊ូ តម្លៃក្រោមមួយពាន់ (ដុល្លារ) មិនអាចមានកំណើនបាន ដោយសារតែកសិកម្មឈប់ប្រមូលផល វាខាត។ អត់មានអ្នកណា អាចបញ្ជាបានទេ អានេះជាទីផ្សារអន្ដរជាតិ វាឡើង វាចុះធម្មតាអញ្ចឹង ខ្ញុំសង្ឃឹមថា វាអត់ក្រោម១ពាន់ សង្ឃឹមលើសពី៨០ភាគរយ ថា មិនក្រោម១ពាន់។ ហើយឯការរក្សាកំណើន គឺអ្នកប្រកបអាជីវកម្មផ្នែកខាងកៅស៊ូ គឺថា ប្រឹងប្រែងណាស់ ដើម្បីឲ្យកំណើនការលក់ឲ្យកាន់តែច្រើនឡើង»។
បើតាមរបាយការណ៍ដដែល នៅកម្ពុជា ទំហំដីប្រមាណជាង៤៣ម៉ឺនហិកតា (៤៣២ ០៩៦ហិកតា) ប្រើប្រាស់សម្រាប់ដាំដំណាំកៅស៊ូ ហើយផ្ទៃដីចំនួនជាង ១៦ម៉ឺនហិកតា ឬស្មើនឹង ៣៧,៧៧ភាគរយ បានប្រមូលផលរួចរាល់ឆ្នាំ៕