កូរ៉េខាងជើង បានព្រមានដល់បណ្ដាប្រទេសនានានៅថ្ងៃនេះ កុំឲ្យចូលរួមជាមួយសកម្មភាពយោធារបស់អាមេរិកប្រឆាំងនឹងខ្លួន ដើម្បីបញ្ចៀសការវាយប្រហារសងសឹក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានឲ្យដឹងថា កូរ៉េខាងជើង បានព្រមានបែបនេះនៅឯអង្គការសហប្រជាជាតិ នៅក្នុងសេចក្ដីថ្លែងការណ៍មួយរបស់ខ្លួន។
សេចក្ដីរាយការណ៍របស់ Reuters បានឲ្យដឹងថា ការចេញសេចក្ដីថ្លែងការណ៍ព្រមានបែបនេះ ត្រូវបានធ្វើឡើងដោយអគ្គរដ្ឋទូតរងកូរ៉េខាងជើងប្រចាំនៅអង្គការសហប្រជាជាតិ អំឡុងកិច្ចពិភាក្សាអំពីបញ្ហាអាវុធនុយក្លេអ៊ែរកូរ៉េខាងជើង ដែលរៀបចំធ្វើឡើងដោយគណៈកម្មាធិការមហាសន្និបាតអង្គការសហប្រជាជាតិ។ ប៉ុន្តែ អំឡុងពេលថ្លែងសុន្ទរកថានោះ អគ្គរដ្ឋទូតរង លោក គីម រីយ៉ុង ពុំបានអានផ្នែកមួយនេះខ្លាំងៗនោះទេ។
សុន្ទរកថានោះ បានរៀបរាប់ថា ដរាបណាប្រទេសមួយមិនចូលរួមក្នុងសកម្មភាពយោធាអាមេរិកប្រឆាំងនឹងកូរ៉េខាងជើងនោះ ក្រុងព្យុងយ៉ាងមិនមានចេតនាប្រើប្រាស់ ឬគំរាមប្រើប្រាស់អាវុធនុយក្លេអ៊ែរប្រឆាំងនឹងប្រទេសដទៃនោះឡើយ។
ភាពតានតឹងរវាងអាមេរិក និងកូរ៉េខាងជើង បានបន្តកើនឡើង ក្រោយពីការបាញ់ និងធ្វើតេស្តសាកល្បងគ្រាប់មីស៊ីល និងអាវុធនុយក្លេអ៊ែរពីសំណាក់ក្រុងព្យុងយ៉ា ព្រមទាំងការផ្លោងពាក្យសម្ដីដាក់គ្នាទៅវិញទៅមករវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន។
ចំណែកឯក្រុមប្រឹក្សាសន្តិសុខអង្គការសហប្រជាជាតិ បានបង្កើនការដាក់ទណ្ឌកម្មជាឯកឆន្ទទៅលើកូរ៉េខាងជើង ជុំវិញកម្មវិធីនុយក្លេអ៊ែរ និងគ្រាប់មីស៊ីលរបស់ប្រទេសនេះ ចាប់តាំងពីឆ្នាំ២០០៦មក៕