ប្រធានាធិបតីអាមេរិក លោក ដូណាល់ ត្រាំ បានប្រកាសនៅថ្ងៃនេះថា កំណែទម្រង់ និងការពង្រីកប្រព័ន្ធធានាសុខមាលភាពអាមេរិក ដែលផ្ដួចផ្ដើមដោយអតីតប្រធានាធិបតី លោក បារ៉ាក់ អូបាម៉ា នោះ ត្រូវបានផ្អាកដំណើរការហើយ បន្ទាប់ពីលោក ត្រាំ កាត់ផ្ដាច់កញ្ចប់ថវិកាធានារ៉ាប់រងសុខមាលភាពទៅឲ្យក្រុមហ៊ុនធានារ៉ាប់រងឯកជនវិញនោះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មានអន្តរជាតិ។
លោក ត្រាំ បានប្រាប់អ្នកសារព័ត៌មានថា អូបាម៉ាឃែរ «Obamacare» ត្រូវបានបញ្ចប់ហើយ។ វាបានស្លាប់បាត់ហើយ។ វារលាយទៅហើយ។
លោក ត្រាំ បានថ្លែងថា គ្មានទៀតទេប្រព័ន្ធអូបាម៉ាឃែរ ហើយលោកថា គំនិតបែបនេះ មិនអាចដំណើរការបានទេ។
ចាប់តាំងពីឡើងកាន់តំណែងជាប្រធានាធិបតីអាមេរិកកាលពីខែមករាមក លោក ត្រាំ បានព្យាយាមបញ្ចប់ច្បាប់ថែទាំសុខមាលភាពរបស់លោក អូបាម៉ា ដោយបានកាត់ផ្ដាច់ការគាំទ្រផ្នែកថវិកាមួយចំនួនពីរដ្ឋាភិបាល និងបានដាក់សម្ពាធទៅសភាឲ្យលុបចោលវា។
បើទោះបីជាសភាអាមេរិកមិនឯកភាពក៏ដោយ លោក ត្រាំ បានបញ្ជាឲ្យបញ្ចប់កម្មវិធីកាត់បន្ថយការចំណាយរបស់រដ្ឋ ដោយបានបង្វិលឲ្យបង់ប្រាក់ទៅក្រុមហ៊ុនធានារ៉ាប់រង ដែលត្រូវបានគេបង្កើតឡើងសម្រាប់ជួយដល់ពលរដ្ឋអាមេរិករាប់លាននាក់ ដែលមានចំណូលទាប ឲ្យទទួលបានធានារ៉ាប់រងសមរម្យ។
យោងតាមការវិភាគដោយសភាអាមេរិក បានឲ្យដឹងថា កម្មវិធី Obamacare នឹងត្រូវការចំណាយប្រាក់ ៧ពាន់លានដុល្លារនៅឆ្នាំនេះ ហើយនៅឆ្នាំក្រោយ ការចំណាយត្រូវបានប៉ាន់ប្រមាណថា មានចំនួនប្រហែល ១០ពាន់លានដុល្លារ៕