គណបក្សប្រឆាំងប្រកាសថា នៅតែរក្សារចនាសម្ព័ន្ធដឹកនាំ ឆ្ពោះទៅរកការផ្លាស់ប្តូរជាវិជ្ជមាន តាមរយៈការបោះឆ្នោត បើទោះបីជាតុលាការកំពូលប្រកាសរំលាយក៏ដោយ ដោយថាចៅក្រមកាន់សំណុំរឿងនេះ ជាមន្ត្រីជាន់ខ្ពស់ របស់បក្សកាន់អំណាចនាំឲ្យការសម្រេចក្តីមិនយុត្តិធម៌។
កាលពីថ្ងៃព្រហស្បតិ៍ម្សិលមិញ ចៅក្រម៩រូបនៃតុលាការកំពូល បានប្រកាសសាលដីកា រំលាយគណបក្សសង្គ្រោះជាតិ តាមបណ្តឹងរបស់ក្រសួងមហាផ្ទៃ។ ចៅក្រមទាំងនោះ មាន លោក ឌិត មុន្ទី និងលោក ជីវ កេង ផងដែរ។
គណបក្សសង្គ្រោះជាតិ បានចេញសេចក្តីថ្លែងការណ៍ ចុះថ្ងៃទី១៦ខែវិច្ឆិកា ចាត់ទុក សាលដីកា របស់តុលាការកំពូលនោះថា មានចរិតនយោបាយ ធ្វើឡើងតាមបំណងរបស់គណបក្សកាន់អំណាច។
បក្សប្រឆាំងលើកឡើងទៀតថា ខ្លួនមិនអាចទទួលយកបាននូវសាលដីកានោះទេ ដោយថា ប្រធានតុលាការកំពូល និងជាប្រធានក្រុមប្រឹក្សាជំនុំជម្រះ លោក ឌិត មន្ទី ជាសមាជិកគណៈអចិន្ត្រៃយ៍គណបក្សប្រជាជនកម្ពុជា។
ចំណែកលោក ជីវ កេង ជាសមាជិកក្រុមប្រឹក្សាជំនុំជម្រះក្តីនេះដែរថា ជាគណៈពង្រឹងមូលដ្ឋាននៅខេត្តតាកែវ របស់បក្សប្រជាជន។
គណបក្សសង្គ្រោះជាតិ ប្រកាសក្នុងសេចក្តីថ្លែងការណ៍នោះថា ខ្លួននឹងប្តេជ្ញា ការពាររចនាសម្ព័ន្ធដឹកនាំនយោបាយ របស់ខ្លួនទាំងនៅថ្នាក់ជាតិ និងថ្នាក់ក្រោមជាតិ ក្នុងដំណើរឆ្ពោះទៅរកការផ្លាស់ប្តូរជាវិជ្ជមាន តាមរយៈការបោះឆ្នោត ដោយសេរី ត្រឹមត្រូវ និងយុត្តិធម៌។
កាលពីម្សិលមិញសាខាគណបក្សសង្គ្រោះជាតិនៅរដ្ឋ Massachusetts នៃសហរដ្ឋអាមេរិក ក៏បានចេញសេចក្តីថ្លែងការណ៍ថ្កោលទោសចំពោះការសម្រេចរបស់តុលាការកំពូលលើករណីនេះថា ជាការបំផ្លាញគោលការណ៍ប្រជាធិបតេយ្យសេរីពហុបក្ស។
VOD មិនទាន់អាចសុំប្រតិកម្មពីលោក ឌិត មន្ទី និងលោក ជីវ កេង បាននៅឡើយទេ ខណៈដែលអ្នកនាំពាក្យតុលាការកំពូលលោក នៅ មុនីជោត មិនលើកទូរសព្ទ។
តាមមាត្រា១២៨ថ្មីនៃរដ្ឋធម្មនុញ្ញដែលនិយាយពីអំណាចរបស់តុលាការបានចែងថា អំណាចតុលាការជាអំណាចឯករាជ្យ។ អំណាចតុលាការធានារក្សាអនាគត និងការពារសិទ្ធិសេរីភាពរបស់ប្រជាពលរដ្ឋ។
ប៉ុន្តែលោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជាផងនោះ បានចេញសារនយោបាយគាំទ្រសាលដីការបស់តុលាការកំពូល និងអំពាវនាវឲ្យពលរដ្ឋបន្តរក្សាភាពស្ងាត់ស្ងៀម ដោយអះអាងថា ដើម្បីចូលរួមរក្សាសន្តិភាព និងស្ថិរភាពសង្គម។
លោកថា៖ «ជាមួយគ្នានេះរាជរដ្ឋាភិបាលនៅតែបន្តការប្តេជ្ញាចិត្តនូវក្នុងដំណើរការការពារលទ្ធិប្រជាធិបតេយ្យសេរីពហុបក្ស និងនីតិរដ្ឋស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។ ហើយការបោះឆ្នោតនៅពេលខាងមុន នឹងប្រព្រឹត្តទៅក្រោមការរៀបចំ និងចាត់ចែង របស់គណៈកម្មាធិការជាតិរៀបចំការបោះឆ្នោត ដែលជាស្ថាប័នឯករាជ្យក្នុងនោះមានការបោះឆ្នោតជ្រើសតាំងសមាជិកព្រឹទ្ធសភានៅថ្ងៃទី២៥ខែកុម្ភៈឆ្នាំ២០១៨ ហើយការបោះឆ្នោតជ្រើសតាំងតំណាងរាស្ត្រនិងត្រូវរៀបចំនៅថ្ងៃទី២៩ខែកក្កដាឆ្នាំ២០១៨»។
អ្នកវិភាគធ្លាប់បង្ហាញការព្រួយបារម្ភថា ការរំលាយគណបក្សសង្គ្រោះជាតិ នឹងជំរុញស្ថានការណ៍នយោបាយឲ្យដល់ចំណុចផុយស្រួយនៃការបែកបាក់ជាតិ ដោយថា គណបក្សប្រឆាំងមានអ្នកគាំទ្រ ប្រហាក់ប្រហែលនឹងគណបក្សកាន់អំណាចដែរ។
ទោះជាយ៉ាងណាសេចក្តីថ្លែងការណ៍របស់បក្សប្រឆាំង បានអំពាវនាវឲ្យគ្រប់គណបក្សនយោបាយបញ្ចប់នូវការលាភពណ៌គ្នា ឈានទៅរកការផ្សះផ្សាជាតិ បង្រួបបង្រួមជាតិ និងអំពាវនាវឲ្យសហគមន៍អន្តរជាតិចាត់វិធានការបន្ទាន់ ដោយថាដើម្បីសង្គ្រោះប្រជាធិបតេយ្យនៅកម្ពុជា៕
