អន្តរជាតិ

ចិនរឹបអូសយានមុជទឹកកងទ័ពអាមេរិក នៅសមុទ្រចិនខាងត្បូង

លោក ឌិត សុខធី
| ១៧ ធ្នូ ២០១៦
ម៉ោង ១២:៣៤

មន្ទីរបញ្ចកោណអាមេរិក កាលពីថ្ងៃម្សិលមិញនេះ បាននិយាយថា ចិនបានរឹបអូសយកដោយ “ខុសច្បាប់” នូវយានស៊ើបអង្កេតគ្មានមនុស្សបើករបស់កងទ័ពជើងទឹកអាមេរិក នៅក្នុងដែនទឹកអន្តរជាតិ នៅសមុទ្រចិនខាងត្បូង ដែលជាការវិវត្តន៍ថ្មីជំរុញឲ្យមានភាពតានតឹងកាន់តែខ្លាំងឡើង ជុំវិញវត្តមានចិននៅតំបន់មានជម្លោះ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។

អ្នកនាំពាក្យមន្ទីរបញ្ចកោណអាមេរិក លោក Jeff Davis បាននិយាយថា យានមុជទឹកនោះ ស្ថិតនៅចម្ងាយប្រហែល ៩០គីឡូម៉ែត្រ ភាគខាងនិរតីនៃឆកសមុទ្រស៊ូប៊ិក ស្ថិតក្នុងទឹកដីហ្វីលីពីន កាលពីល្ងាចថ្ងៃព្រហស្បត្តិ៍កន្លងមក ដោយមិនមានឧបទ្ទវហេតុហឹង្សានោះឡើយ។

បើតាមមន្ទីរបញ្ចកោណ យានមុជទឹកទាំងពីរគ្រឿងនោះ តែងតែចុះប្រមូលព័ត៌មានស្ដីពីសីតុណ្ហភាពទឹក កម្រិតជាតិអំបិល និងគុណភាពទឹកសមុទ្រ។

នាវាមុជទឹកចិន Dalang-III បានរឹបអូសយកយានមុជទឹកអាមេរិកនៅចម្ងាយ ៥០០ម៉ែត្រពីនាវា Bowditch របស់អាមេរិក។ ចំណែកយានមុជទឹកមួយគ្រឿងទៀតរបស់អាមេរិក បានត្រឡប់ទៅនាវារបស់ខ្លួនវិញដោយសុវត្ថិភាព។

លោក Davis បន្ថែមថា លោកមិនអាចចាំបានទេនូវករណីបែបនេះបានកើតឡើងនោះ ហើយមន្ទីរបញ្ចកោណ បានចេញសេចក្ដីប្រកាសព័ត៌មានមួយ ដោយអំពាវនាវទៅក្រុងប៉េកាំង ឲ្យប្រគល់យានដែលខ្លួនដណ្ដើមយក “ដោយខុសច្បាប់”នោះ ទៅឲ្យអាមេរិក “ជាបន្ទាន់”៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។