គណបក្សថ្មីពីរបានរួបរួមគ្នានៅព្រឹកថ្ងៃទី១៨ ខែមករា ឆ្នាំ២០១៧នេះ ដោយថាដើម្បីចូលរួមការបោះឆ្នោតក្រុមប្រឹក្សាឃុំសង្កាត់និងការបោះឆ្នោតជ្រើសតាំងតំណាងរាស្ត្រ។
គណបក្សខ្មែររួបរួមជាតិ តំណាងដោយប្រធាន លោក ញឹក ប៊ុនឆៃ និងគណបក្សយុត្តិធម៌ជាតិខ្មែរ ដែលមាន លោក ហ៊ាង រិទ្ធី ជាប្រធាន បានចុះហត្ថលេខាលើអនុស្សាររណៈស្តីពីការធ្វើកិច្ចសហប្រតិបត្តិការជាសម្ព័ន្ធភាពជាមួយគ្នា នៅសណ្ឋាគារសាន់វេ ក្នុងរាជធានីភ្នំពេញ។
គណបក្សទាំងពីរក៏អំពាវនាវឲ្យប្រជាពលរដ្ឋគាំទ្រខ្លួនផងដែរ។
លោក ញឹក ប៊ុនឆៃ គឹជាអតីតប្រធានគណបក្សហ្វ៊ុនស៊ិនប៉ិច បានចាកចេញពីបក្សនេះបន្ទាប់ពីសម្តេចក្រុមព្រះយាងត្រឡប់ទៅដឹកនាំវិញ។ ចំណែក លោក ហ៊ាង រិទ្ធី គឺជាអតីតអនុប្រធានគណបក្សសំបុកឃ្មុំរបស់លោក ម៉ម សូណង់ដូ។ លោកបានចេញពីគណបក្សនេះដោយសារតែមានរឿងក្តីក្តាំជាមួយលោក ម៉ម សូណង់ដូរ ហូតឡើងដល់តុលាការ។
