ប្រទេសចិន នៅថ្ងៃនេះ បានជំរុញទៅអាមេរិក កុំអនុញ្ញាតឲ្យតំណាងកោះតៃវ៉ាន់ ចូលរួមក្នុងពិធីឡើងកាន់តំណែងផ្លូវការរបស់លោក ដូណាល់ ត្រាំ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានដកស្រង់សម្ដីអ្នកនាំពាក្យក្រសួងការបរទេសចិន អ្នកស្រី ហ៊ួរ ឈុនយីង ដែលបានថ្លែងដូច្នេះនៅឯសន្និសីទសារព័ត៌មានដ៏ខ្លីមួយ នៅថ្ងៃនេះ។
លោក ត្រាំ បានបំបែកភាពស្ងប់ស្ងាត់អស់ជាច្រើនទសវត្សរ៍របស់មេដឹកនាំអាមេរិក បន្ទាប់ពីបានជជែកគ្នាតាមទូរស័ព្ទជាមួយប្រធានាធិបតីកោះតៃវ៉ាន់ អ្នកស្រី សៃ អ៊ីងវ៉េន ដែលជំរុញឲ្យក្រុងប៉េកាំងផ្ទុះកំហឹង ដោយសារតែក្រុងប៉េកាំងចាត់ទុកកោះតៃវ៉ាន់ជាផ្នែកមួយរបស់ខ្លួន។ លោក ត្រាំ ថែមទាំងបានថ្លែងទៀតថា គោលនយោបាយ “ចិនតែមួយ” អាចយកមកចរចាបាន។
លោក ត្រាំ គ្រោងឡើងកាន់តំណែងជាប្រធានាធិបតីអាមេរិកជាផ្លូវការនៅថ្ងៃសុក្រសប្ដាហ៍នេះ៕