រដ្ឋមន្ដ្រីការបរទេសឡាវនឹងមកទស្សនកិច្ចនៅកម្ពុជានាចុងខែមករានេះ ដោយលើកយកបញ្ហាព្រំដែនប្រទេសទាំងពីរមកពិភាក្សា។
នៅក្នុងសេចក្ដីប្រកាសព័ត៌មានរបស់ក្រសួងការបរទេសកម្ពុជា ចេញផ្សាយនៅថ្ងៃពុធ ទី១៨ មករានេះបញ្ជាក់ថា លោក សាលើមសៃ គុំម៉ាស៊ីត រដ្ឋមន្ដ្រីការបរទេសឡាវ គ្រោងនឹងមកបំពេញទស្សនកិច្ចផ្លូវការនៅក្នុងប្រទេសកម្ពុជា តបតាមការអញ្ជើញរបស់លោក ប្រាក់ សុខុន រដ្ឋមន្ដ្រីការបរទេសកម្ពុជា ។
ក្រសួងការបរទេសកម្ពុជាឲ្យដឹងថា ដំណើរទស្សនកិច្ចមានរយៈពេល៤ថ្ងៃ ចាប់ពីថ្ងៃទី២២ រហូតដល់ថ្ងៃទី២៥ ខែមករា ឆ្នាំ២០១៧ ខាងមុខ។
បើតាមសេចក្ដីប្រកាសព័ត៌មាន រដ្ឋមន្ដ្រីការបរទេសឡាវ លោក សាលើមសៃ គុំម៉ាស៊ី នឹងចូលរួមកិច្ចប្រជុំនៃគណៈកម្មាការចម្រុះព្រំដែនកម្ពុជា-ឡាវ ជាមួយលោក វ៉ា គីមហុង ទេសរដ្ឋមន្ដ្រីទទួលបន្ទុកកិច្ចការព្រំដែន។ បន្ថែមលើសពីនេះ លោក សាលើមសៃ គុំម៉ាស៊ី ក៏នឹងជួបសំដែងការគួរសមជាមួយលោកនាយករដ្ឋមន្ដ្រី ហ៊ុន សែន និងព្រះមហាក្សត្រកម្ពុជាផងដែរ៕
