ទីភ្នាក់ងារព័ត៌មាន AFP បានរាយការណ៍ថា នាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ បានបង្ហាញគម្រោងនៃការចាកចេញរបស់អង់គ្លេសពីសហគមន៍អឺរ៉ុប នៅថ្ងៃនេះ ដែល AFP ចាត់ទុកថា នេះជាលើកដំបូងហើយដែលចក្រភពអង់គ្លេសប្រកាសថា នឹងចាកចេញពីសហគមន៍អឺរ៉ុប ដើម្បីគ្រប់គ្រងលើបញ្ហាអន្តោប្រវេសន៍។
នៅក្នុងសុន្ទរកថាមួយ អ្នកស្រី ម៉េយ៍ ក៏បានព្រមានផងដែរទៅលើសហភាពអឺរ៉ុប ចំពោះការដាក់លក្ខខណ្ឌតឹងរឹង ទៅលើការចាកចេញរបស់អង់គ្លេស បន្ទាប់ពីចាកចេញពីប្លុកមួយនេះ ក្រោយពីរួបរួមអស់រយៈពេលជាង ៤០ឆ្នាំកន្លងមកនោះ។
អ្នកស្រីក៏បានបង្ហាញឲ្យដឹងផងដែរថា ចក្រភពអង់គ្លេសនឹងត្រូវចុះកិច្ចព្រមព្រៀងពន្ធគយថ្មីមួយជាមួយសហភាពអឺរ៉ុប ដើម្បីឲ្យខ្លួនអាចដំណើរការកិច្ចព្រមព្រៀងពាណិជ្ជកម្មផ្ទាល់ខ្លួនជាមួយបណ្ដាប្រទេសដទៃទៀតនៅពិភពលោក។
ក្រុមមេដឹកនាំអឺរ៉ុបបានបញ្ជាក់ថា សមាជិកក្នុងសហគមន៍អឺរ៉ុប នឹងត្រូវទទួលយកការធ្វើដំណើរដោយសេរី ដែលនោះគឺជាបញ្ហាដ៏សំខាន់នៅអង់គ្លេស បន្ទាប់ពីប្រទេសនេះបោះឆ្នោតប្រជាមតិកាលពីខែមិថុនាឆ្នាំមុន ដើម្បីក្លាយទៅជាប្រទេសដំបូងគេដែលចាកចេញពីប្លុកមួយនេះ៕