ប្រមុខការទូតកម្ពុជា អះអាងថា រដ្ឋាភិបាលទួរគីគោរពអធិបតេយ្យភាពកម្ពុជា ជុំវិញវិធានការថ្មីៗរបស់រដ្ឋាភិបាលទៅលើបក្សប្រឆាំង ប្រព័ន្ធផ្សព្វផ្សាយ និងអង្គការសង្គមស៊ីវិលមួយចំនួន។
រដ្ឋមន្ត្រីការបរទេស លោក ប្រាក់ សុខុន បានលើកឡើងនៅក្នុងសេចក្ដីប្រកាសព័ត៌មានកាលពីថ្ងៃម្សិលមិញថា ប្រទេសទួរគីបានគោរពអធិបតេយ្យភាពកម្ពុជា ហើយចាត់ទុកវិធានការនានារបស់រដ្ឋាភិបាលថា ជាបញ្ហាផ្ទៃក្នុងរបស់កម្ពុជា ដែលត្រូវបានធ្វើឡើងដើម្បីការពារឯករាជ្យ អធិបតេយ្យភាព សន្តិភាព ស្ថេរភាព និងកការពង្រឹងនីតិរដ្ឋ។
ប្រមុខការទូតកម្ពុជារូបនេះ បានអះអាងបែបនេះ បន្ទាប់ពីជំនួបជាមួយឯកអគ្គរដ្ឋទូតទួរគីប្រចាំកម្ពុជា លោក Ilhan Kemal Tug ដែលផុតអាណត្តិទៅហើយនោះ កាលពីថ្ងៃម្សិលមិញនេះ។
លោក ប្រាក់ សុខុន បានអះអាងអំពីជំហររបស់រដ្ឋាភិបាលទួរគីបែបនេះ បន្ទាប់ពីរដ្ឋាភិបាលកម្ពុជា រងការរិះគន់ជាបន្តបន្ទាប់ពីសហគមន៍អន្តរជាតិនាំមុខដោយសហភាពអឺរ៉ុប និងអាមេរិក ជុំវិញការរំលាយគណបក្សសង្គ្រោះជាតិ ការចាប់ខ្លួនមេដឹកនាំបក្សនេះ លោក កឹម សុខា ការបិទអង្គការសង្គមស៊ីវិល និងប្រព័ន្ធផ្សព្វផ្សាយមួយចំនួន កាលពីឆ្នាំមុន។
ទំនាក់ទំនងកម្ពុជា-ទួរគី បានធ្លាក់ទៅក្នុងស្ថានភាពប្រឈមនឹងគ្នាកាលពីឆ្នាំ២០១៦ បន្ទាប់ពីរដ្ឋាភិបាលទួរគីបានទាមទារទៅរដ្ឋាភិបាលកម្ពុជា ឲ្យបិទសាលាហ្សាម៉ាន់ ដែលទួរគីចោទថា មានទំនាក់ទំនងនឹងចលនារបស់បុព្វជិតទួរគីរស់នៅអាមេរិក លោក Fethullah Gulen ដែលត្រូវបានប្រធានាធិបតីទួរគី លោក តាយីប អឺដូហ្គែន ចោទថា ជាមេខ្លោងរៀបចំរដ្ឋប្រហារបង្ហូរឈាមមិនបានកាលពីខែកក្កដា ឆ្នាំ២០១៦៕
