ស្ត្រីវ័យក្មេងបង្កើនការយល់ដឹងពីផលប៉ះពាល់នៃការបាត់បង់ព្រៃឈើ​

ក្រុមយុវជនពិសេសស្ត្រីវ័យក្មេង នឹងរៀបចំដំណើរទស្សនៈកិច្ចសិក្សាមួយទៅកាន់​តំបន់ព្រៃការពារនៅក្នុងស្រុកសំរោង ខេត្តឧត្តរមានជ័យ ដើម្បីស្វែងយល់​និង បង្កើនភាពជាដៃគូជាមួយក្រុមគោលដៅផ្សេងៗ ក្នុងការការពារព្រៃឈើដែលកំពុងរងការកាប់បំផ្លាញ។​

តាមសេចក្តីជូនដំណឹង​របស់សហគ្រិនភាពយុវជនបៃតង បានឲ្យដឹងថា ដំណើរទស្សនៈកិច្ចសិក្សានោះចាប់ផ្តើមពីថ្ងៃទី១០ដល់ថ្ងៃទី១៣ខែមីនាខាងមុខ នឹងមានអ្នកចូលរួម៦០នាក់ ក្នុងនោះស្រ្តី៤០នាក់ ឆ្ពោះទៅកាន់គោលដៅនៅភូមិសំរោង ឃុំសំរោង ស្រុកសំរោងខេត្តឧត្តរមានជ័យ។​

ក្នុងសេចក្តីជូនដំណឹងបានបញ្ជាក់ថា មានគោលដៅ ពង្រឹងការយល់ដឹងអំពីតួនាទីស្ត្រី និង ជំរុញឲ្យមានការចូលរួមពីសំឡេងស្រ្តី ក្នុងសហគមន៍ ដើម្បីថែរក្សាព្រៃឈើ។​

ក្នុងដំណើរទស្សនៈកិច្ចនេះ ក្រុមយុវជននឹងចែករំលែកបទពិសោធន៍ ភាពប្រឈម និង ភាពជោគជ័យរបស់ស្ត្រី ក្នុងការកិច្ចការពារព្រៃឈើ និង បង្កើនការយល់ដឹងតួរនាទី​របស់ខ្លួន​តាមរយៈការរៀបចំជាវេទិកា ពិភាក្សារវាងអាជ្ញាធរ និង ប្រជាសហគមន៍។​

នៅក្នុងសេចក្តីជូនដឹងក្រុមយុវជនក៏បានបង្ហាញការព្រួយបារម្ភពីស្ថានភាពនៃការកាប់បំផ្លាញព្រៃឈើ និង ការសម្លាប់សត្វព្រៃនៅតែបន្តកើតមានឡើង។​

របាយការណ៍អង្គការណាសារបស់អាមេរិកបង្ហាញនៅដើមឆ្នាំ២០១៧នេះថា ចាប់ពីឆ្នាំ២០០១ដល់ឆ្នាំ២០១៤ កម្ពុជាបានបាត់បង់ព្រៃឈើអស់ ១,៤លានហិតា ឬ ស្មើ ១៤,៤%។ ទោះយ៉ាងក្រោយការចេញរបាយការណ៍នេះ មន្ត្រីរដ្ឋាភិបាលបានច្រានចោលដោយបញ្ជាក់ថា របាយការណ៍នេះមិនឆ្លុះបញ្ចាំងការពិតនៅកម្ពុជាទេ។