មេដឹកនាំអូស្ត្រាលី បានបង្ហាញក្ដីបារម្ភទៅកាន់មេដឹកនាំកម្ពុជា ជុំវិញការធ្លាក់ចុះនៃលទ្ធិប្រជាធិបតេយ្យ និងបញ្ហាសិទ្ធិមនុស្សនៅក្នុងប្រទេសកម្ពុជា។ នេះបើតាមការចុះផ្សាយរបស់សារព័ត៌មានអូស្ត្រាលី។
សារព័ត៌មាន 9NEWS បានចុះផ្សាយថា នាយករដ្ឋមន្ត្រីអូស្ត្រាលី លោក Malcolm Turnbull បានជួបពិភាក្សាទ្វេភាគីជាមួយនាយករដ្ឋមន្ត្រីកម្ពុជា លោក ហ៊ុន សែន កាលពីរសៀលថ្ងៃម្សិលមិញនេះ នៅក្រៅកិច្ចប្រជុំកំពូលអាស៊ាន-អូស្ត្រាលី។
លោក Turnbull ត្រូវបានដកស្រង់សម្ដីដែលបានថ្លែងប្រាប់អ្នកសារព័ត៌មានថា អូស្ត្រាលីបានមានទំនាក់ទំនងដ៏ច្បាស់លាស់ជាមួយបណ្ដាប្រទេសអាស៊ាន។
បើតាម 9NEWS នៅក្នុងជំនួបដាច់ដោយឡែកជាមួយមេដឹកនាំកម្ពុជា មេដឹកនាំអូស្ត្រាលីរូបនេះ បានលើកឡើងពីសារៈសំខាន់នៃលទ្ធិប្រជាធិបតេយ្យ សិទ្ធិមនុស្ស និងការបោះឆ្នោតនាពេលខាងមុខនេះ។
ក្រៅពីជជែកពីបញ្ហានៅកម្ពុជា មេដឹកនាំប្រទេសទាំងពីរក៏បានជជែកអំពីទំនាក់ទំនងសេដ្ឋកិច្ច ការថែរក្សាសន្តិភាព និងការគំរាមកំហែងពីសំណាក់កម្មវិធីនុយក្លេអ៊ែររបស់កូរ៉េខាងជើង។
ខណៈដែលមេដឹកនាំកម្ពុជាកំពុងស្ថិតក្នុងដំណើរចូលរួមប្រជុំនៅទីក្រុងស៊ីដនីនោះ ក្រុមពលរដ្ឋខ្មែររាប់រយនាក់ដែលរស់នៅអូស្ត្រាលីនោះ បានប្រមូលផ្ដុំគ្នាតវ៉ានៅតំបន់ Hyde Park ស្ថិតក្នុងទីក្រុងស៊ីដនី កាលពីរសៀលថ្ងៃម្សិលមិញនេះ ប្រឆាំងនឹងវត្តមានរបស់លោក ហ៊ុន សែន។
នៅមុនធ្វើដំណើរទៅចូលរួមប្រជុំនៅប្រទេសអូស្ត្រាលី លោក ហ៊ុន សែន បានគំរាមតាមវាយក្រុមបាតុករដល់ផ្ទះរបស់ពួកគេ ប្រសិនបើក្រុមបាតុករដុតរូបតំណាងរូបលោកនោះ។
បើតាម 9NEWS ក្រុមបាតុករទាំងនោះ បានចោទលោក ហ៊ុន សែន ថា «ជនរំលោភសិទ្ធិមនុស្ស» ហើយទាមទារឲ្យបញ្ឈប់ការបង្ក្រាបដោយហិង្សាទៅលើក្រុមអ្នកនយោបាយប្រឆាំង។
ចំណែកក្រុមបាតុករខ្លះទៀត បានជំរុញទៅមេដឹកនាំអូស្ត្រាលី លោក Turnbull កុំឲ្យទាក់ទងជាមួយលោក ហ៊ុន សែន ដែលក្រុមបាតុករហៅថា «បិសាច»៕