មន្ត្រីបក្សប្រឆាំងស្នើគ.ជ.ប បន្ថែមការផ្សព្វផ្សាយព័ត៌មាន ស្តីពីការបោះឆ្នោត ជាសំឡេងផ្ញើសារតាមទូរសព្ទដៃ ខណៈអ្នកឃ្លាំមើលរកឃើញថា ពលរដ្ឋភាគច្រើនមិនទាន់ដឹងថ្ងៃទៅបោះឆ្នោតនៅឡើយ។
កាលពីថ្ងៃទី៥ខែមេសា សម្ព័ន្ធកំណែទម្រង់ការបោះឆ្នោត បានបង្ហាញរបាយការណ៍ស្ទង់មតិមួយថា ពលរដ្ឋជាងពាក់កណ្តាល មិនទាន់ដឹងថ្ងៃបោះឆ្នោតនៅឡើយ។
ក្នុងកិច្ចប្រជុំមួយនៅស្នាក់ការកណ្តាលរបស់គ.ជ.ប នាថ្ងៃទី១៨ខែមេសានេះ តំណាងរាស្ត្រគណបក្សសង្រ្គោះជាតិ មណ្ឌលកំពង់ធំ លោក លិម គិមយ៉ា លើកឡើងថា ដើម្បីឲ្យពលរដ្ឋដឹងកាន់តែច្បាស់ ពីថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខ លោកថា គ.ជ.ប គួរស្នើទៅរដ្ឋាភិបាលឲ្យអន្តរាគមន៍ទៅក្រុមហ៊ុនទូរសព្ទចល័ត ដាក់សារជាសំឡេងបញ្ជាក់ពីថ្ងៃបោះឆ្នោត ដូចដែលរដ្ឋាភិបាលធ្លាប់ស្នើឲ្យដាក់ថា មីក្រូហិរញ្ញវត្ថុទាំងអស់មិនមែនជារបស់រដ្ឋ។
លោកថា៖ «ហេតុដូច្នេះ ដល់ពេលហ្នឹងយើងធ្វើអញ្ចឹងដែរទៅ។ យើងថាថ្ងៃទី៤ខែមិថុនាហ្នឹង ជាថ្ងៃបោះឆ្នោត អញ្ចឹងសូមអញ្ចឹញប្រជាពលរដ្ឋទៅបោះឆ្នោត»។
អគ្គលេខាធិការ គជប លោក ទេព នីថា បានច្រានចោលសំណើរនេះ ដោយថាយន្តការជាច្រើនដែល គ.ជ.ប ផ្សព្វផ្សាយឲ្យពលរដ្ឋដឹងពីដំណើរការបោះឆ្នោតនេះ ដូចជាការផ្សាព្វផ្សាយតាមកញ្ចក់ទូរទស្សន៍ វិទ្យុ ធ្វើស្ពតខ្លីៗ ការបិទប្រកាសជាដើម រួមទាំងចែកប័ណ្ណព័ត៌មានស្តីពីការបោះឆ្នោត ដល់អ្នកដែលបានចុះឈ្មោះរួមហើយផងដែរ។
លោកថា៖ «យើងពុំបានធ្វើទូរសព្ទដូចផ្សាយអំពើមីក្រូហិរញ្ញវត្ថុអីទេ។ យើងផ្សាយទៅតាមលេខទូរសព្ទមួយដែលគាត់អត់អស់លុយ។ នេះជាការឧបត្ថមរបស់ USAID លេខ១២៨៥ យើងចុចអាហ្នឹងទៅ យើងនឹងបានព័ត៌មានដែលយើងចង់ដឹងទាក់ទងនឹងការបោះឆ្នោត»។
នាយកប្រតិបត្តិអង្គការឃ្លាំមើលការបោះឆ្នោតមួយហៅ NICFEC លោក សំ គន្ធាមី លើកឡើងថា សារជាសំឡេងដែលមានស្រាប់ របស់ គជប លោកថា ជាព័ត៌មានទូលំទូលាយពេក ដែលលោកថា ធ្វើពលរដ្ឋពិបាកយល់ ។ លោកជំរុញឲ្យ គ.ជ.ប ពិចារណាទទួលយកសំណើរនេះ ដោយថាដើម្បីបង្កើនការយល់ដឹងកាន់តែច្បាស់ដល់ប្រជាពលរដ្ឋ ឲ្យពួកគេមានពេលច្រើនសម្រាប់ត្រៀមខ្លួនទៅបោះឆ្នោត។
លោកថា៖ «សំណើហ្នឹងល្អ វាជួយដែរដល់អ្នកប្រើប្រព័ន្ធទូរសព្ទ គាត់បានដឹងពីព័ត៌មានបោះឆ្នោត។ ចែកប័ណ្ណព័ត៌មានក៏ម្យាងដែរ ប៉ុន្តែបានអាហ្នឹងមួយទៀតជួយកាន់តែច្រើន»។
បើតាមលោក ទេព នីថា ការចែកប័ណ្ណព័ត៌មាន បានចាប់ផ្តើមពីថ្ងៃទី១៧ខែមេសា ដល់ថ្ងៃទី១៦ខែឧសភា និងមានការឃ្លាំមើលពីមន្ត្រីអង្គការសង្គមស៊ីវិលដែលពាក់ព័ន្ធ។
ប្រធានកិច្ចការបោះឆ្នោត និងនីតិកម្ម របស់គណបក្សសង្គ្រោះជាតិ លោកស្រី ម៉េង សុភារី លើកឡើងថា ការចែកប័ណ្ណព័ត៌មានស្តីពីការបោះឆ្នោត កាលពីម្សិលមិញ លោកស្រីថា អាជ្ញាធរខ្លះបានចែក នៅកន្លែងមានបំពាក់ស្លាកគណបក្សប្រជាជនកម្ពុជា។
មន្ត្រីបក្សប្រឆាំងរូបនោះ ជំរុញឲ្យ គ.ជ.ប ទប់ស្កាត់បញ្ហានេះ ដោយថាដើម្បីបង្ហាញពីតម្លាភាព។
យ៉ាងនេះក្តី លោក ទេព នីថា អះអាងថា ការធ្វើបែបនោះពិតជាកំហុសមួយ លោកថា គ.ជ.ប បានជូនដំណឹងទៅអាជ្ញាធរពាក់ព័ន្ធ ឲ្យទប់ស្កាត់បញ្ហានេះហើយ។
បើតាម គ.ជ.ប គិតត្រឹមថ្ងៃ១១មេសា មានគណបក្ស ចំនួន១២ បានចុះឈ្មោះប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤នេះ ។ ក្នុងនោះមានតែគណបក្សប្រជាជនកម្ពុជា និងគណបក្សសង្គ្រោះជាតិប៉ុណ្ណោះ បានដាក់បេក្ខភាព បានគ្រប់១៦៤៦ឃុំ សង្កាត់ នៅទូទាំងប្រទេស៕