ស្នងការនគរបាលខេត្តព្រះសីហនុបានឲ្យដឹងថា ចូលឆ្នាំប្រពៃណីខ្មែរនៅឆ្នាំ២០១៧នេះ មានចំនួនភ្ញៀវទេសចរណ៍ទៅកំសាន្តនៅខេត្តជាប់មាត់សមុទ្រមួយនេះបានជាង១៤ម៉ឺននាក់ ដែលចំនួននេះកើនឡើងបានជាង១០% បើប្រៀបធៀបទៅនឹងឆ្នាំ២០១៦។
របាយការណ៍បូកសរុប សភាពការណ៍សន្តិសុខសណ្តាប់ធ្នាប់ របស់ស្នងការដ្ឋាននគរបាលខេត្ត ព្រះសីហនុបានឲ្យដឹងថា ក្នុងឱកាសបុណ្យចូលឆ្នាំថ្មីប្រពៃណី ជាតិខ្មែររយៈពេល៣ថ្ងៃ ពីថ្ងៃទី១៤ ដល់១៦ ខែមេសា ឆ្នាំ ២០១៧ មានភ្ញៀវទេសចរណ៍ចំរុះជាតិសាសន៍មកកំសាន្ត នៅខេត្តព្រះសីហនុ ប្រមាណ១៤៣ ៥៩៧នាក់ មានការកើន ឡើង១០,៤%។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
របាយការណ៍ឲ្យដឹងទៀតថា ភ្ញៀវបានទៅលេងកោះសំខាន់ៗដូចជា កោះរ៉ុង និង កោះសន្លឹមជាដើម។ របាយដដែលក៏បានឲ្យដឹងថា រយៈពេលបីថ្ងៃនៃបុណ្យចូលឆ្នាំបញ្ហាសន្តិសុខ សណ្តាប់ធ្នាប់មានភាពល្អប្រសើរ៕