អតីតមេដឹកនាំបក្សប្រឆាំង លោក សម រង្ស៊ី បានថ្លែងហាក់រំឭកឲ្យចាប់អារម្មណ៍ទៅលើចលនាមហាជនងើបបះបោរប្រឆាំងនិងមេដឹកនាំក្រាញអំណាច របស់ប្រទេសមួយចំនួនលើពិភពលោក ខណៈគណបក្សកាន់អំណាច នៅបន្តផាត់បក្សប្រឆាំងចេញពីឆាកនយោបាយនៅឡើយនោះ។
តុលាការកំពូលបានប្រកាសរំលាយគណបក្សសង្គ្រោះជាតិ ដែលមានអ្នកគាំទ្រជិតពាក់កណ្តាលប្រទេស កាលពីចុងឆ្នាំមុន មុនការបោះឆ្នោតជ្រើសតាំងតំណាងរាស្ត្រអាណត្តិថ្មីនេះ ចូលមកដល់ តាមបណ្តឹងរបស់រដ្ឋាភិបាល ។
បើគ្មានអ្វីប្រែប្រួលទេ ការបោះឆ្នោតនឹងធ្វើឡើងនៅថ្ងៃទី២៩ខែកក្កដាឆ្នាំ២០១៨ ពោលនៅសល់តែជាង២ខែទៀតប៉ុណ្ណោះ។
លោក សម រង្ស៊ី កាលពីសប្តាហ៍មុនបានធ្វើដំណើរទៅប្រទេសជប៉ុន និងក្រោយមកត្រឡប់ទៅប្រទេសឥណ្ឌូនេស៊ីទៀត នូវអ្វីដែលលោកហៅថា ដើម្បីស្វែងរកជួបមេដឹកនាំនៃប្រទេសលោកសេរី ឲ្យជួយស្តារប្រជាធិបតេយ្យនៅកម្ពុជាឡើងវិញ។
លោក សម រង្ស៊ី កាលពីម្សិលមិញ និយាយប្រាប់សារព័ត៌មានអនឡាញឥណ្ឌណេស៊ី Temppoថា កម្ពុជានឹងប្រឈមមុខនិងភាពមិនច្បាស់លាស់នៅមុនការបោះឆ្នោតថ្នាក់ជាតិខែកក្កដាខាងមុខ បើគ្មានអតីតបក្សប្រឆាំងចូលរួម។
ភាពមិនច្បាប់លាស់នេះ លោក សម រង្ស៊ី បានលើកជាឧទាហរណ៍ ពីវិបត្តិនៅមជ្ឈិមបូព៌ា មានប្រទេសស៊ីរី និងលីប៊ី ជាដើម ដែលប្រទេសទាំងនោះ ពលរដ្ឋកំពុងងើបបះបោរប្រឆាំងមេដឹកនាំក្រាញអំណាច ដែលលោកសម រង្ស៊ីថាជាមេដឹកនាំផ្តាច់ការ។
លោកថា៖«មូលហេតុនៃការបះបោរនៅមជ្ឈិមបូព៌ា គឺដោយសារតែរដ្ឋាភិបាលផ្ដាច់ការ និងគ្មានលទ្ធិប្រជាធិបតេយ្យពិតប្រាកដនៅប្រទេសស៊ីរី និងលីប៊ី»។
ពលរដ្ឋនៅប្រទេសស៊ីរី និងលីប៊ី បានងើបបះបោរ ប្រឆាំងនឹងមេដឹកនាំក្រាញអំណាចយូរឆ្នាំរបស់ខ្លួន ហើយពេលនេះ ប្រទេសទាំងនោះ កំពុងជួបវិបត្តិ និងហែកហួរដោយជម្លោះផ្ទៃក្នុង។
ប៉ុន្តែលោកនាយករដ្ឋមន្ត្រី ហ៊ុន សែន និងជាមេដឹកនាំបក្សកាន់អំណាចផងនោះ បានសរសេរនៅលើងគេហទំព័រហ្វេសប៊ុក របស់លោក នៅថ្ងៃនេះថា ពលរដ្ឋពេលនេះកំពុងរស់នៅសុខសាន្ត ដោយសារតែកម្ពុជាមានសន្តិភាពពេញលេញរយៈពេលជាង២០ឆ្នាំមកហើយ។លោករំឭកថា« យើងមិនត្រូវឲ្យសន្តិភាពរបូតចេញពីដៃបានឲ្យសោះ ទោះបីដោយតម្លៃណាក៏ដោយ»។
អ្នកនាំពាក្យក្រសួងមហាផ្ទៃលោក ខៀវ សុភ័គ ហៅការលើកឡើងរបស់លោកសម រង្ស៊ី ថាជាការយល់ខុស ដោយលោកអះអាង ពលរដ្ឋកម្ពុជាធ្លាប់ជួបទុក្ខលំបាក ពេលប្រទេសមានសង្គ្រាម មុនប្រទេសស៊ីរី លោកថា ដូចនេះការងើបបះបោរ ពីសំណាក់មហាជន ដែលថាចង់ប្រឆាំងនឹងមេដឹកនាំ ដូចលោក សម រង្ស៊ីគិតនោះគឺគ្មានទេ។
អ្នកនាំពាក្យរូបនេះ អះអាងទៀតថា ពលរដ្ឋកម្ពុជាពេលនេះ លែងខ្វល់និងរឿងអ្នកណាជាប់គុក អ្នកណារត់ចោលស្រុក គណបក្សណាត្រូវរំលាយទៀតហើយ ដោយថាពួកគេពេលនេះ គិតពីបញ្ហាជីវភាព និងដើរលំហែរនៅថ្ងៃបុណ្យជាតិច្រើនជាង។
លោកថា៖«ព្រោះ សម រង្ស៊ី នេះមិនបានធ្វើអ្វីដល់ជាតិមាតុភូមិរបស់គេទេ ក្នុងរយៈពេល២៥ឆ្នាំកន្លងមកនេះ តាំងពី សម រង្ស៊ី មានវត្តមានក្នុងស្រុក ។
គេកត់សម្គាល់ឃើញតែមួយទេ បុគ្គលហ្នឹងក្រៅពីធ្វើឲ្យខ្មែរបែកបាក់ គឺអុចអាលឲ្យស្អប់គ្នាទៅវិញទៅមក ក្នុងសង្គម។ហើយសមទ្ធផល ដែល សម រង្ស៊ី ដឹកនាំគេធ្វើ គឺមានមួយ យើងឃើញហើយ គឺចេតិយមួយ នៅខាងត្បូងព្រះបរមរាជវាំងនឹង [ស្តូបរំឭកវិញ្ញាណខន្ធអ្នកស្លាប់ដោយគ្រាប់បែកឆ្នាំ១៩៩៧]
ទោះជាយ៉ាងណារបត់នយោបាយនៅកម្ពុជា ដែលឈានទៅចាប់ឃុំខ្លួនអតីតមេដឹកនាំបក្សប្រឆាំងលោក កឹម សុខា រំលាយគណបក្សសង្គ្រោះជាតិ បិទប្រព័ន្ធផ្សព្វផ្សាយឯករាជ្យ និងគំរាមអ្នកឃ្លាំមើលសិទ្ធិមនុស្សជាដើមនោះ ជំរុញឲ្យក្រុមប្រទេសលោកសេរី ថ្កោលទោស និងគំរាមដាក់ទណ្ឌកម្មសេដ្ឋកិច្ច បើរដ្ឋាភិបាលមិនស្តារប្រជាធិបតេយ្យឡើងវិញ ។