កំណើនសេដ្ឋកិច្ចកម្ពុជា ត្រូវបានធនាគារពិភពលោកព្យាករថា នឹងនៅតែរឹងមាំជាមួយអត្រាកំណើន ៦.៩ភាគរយ ទាំងនៅឆ្នាំនេះ និងឆ្នាំក្រោយ ដោយសារកម្លាំងជំរុញដ៏សំខាន់នៃវិស័យសំណង់ និងកាត់ដេរ។
ក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជា ដែលចេញផ្សាយកាលពីថ្ងៃម្សិលមិញនេះ ធនាគារពិភពលោក បានអះអាងថា ដោយមានកម្លាំងជំរុញពីវិស័យសំណង់ និងវិស័យកាត់ដេរ កំណើនសេដ្ឋកិច្ចកម្ពុជានៅតែមានភាពរឹងមាំ ជាមួយអត្រាកំណើន ៦.៩ភាគរយ នៅឆ្នាំ២០១៧ និងឆ្នាំ២០១៨។
ប៉ុន្តែ ក្នុងរបាយការណ៍ដដែលនេះ ធនាគារពិភពលោកបានព្រមានអំពីសញ្ញាមួយចំនួនបង្ហាញពីភាពយឺតយ៉ាវនៃវិស័យមួយចំនួន ជាពិសេសវិស័យសំណង់ ខណៈដែលវិស័យកាត់ដេរកំពុងប្រឈមមុខនឹងការប្រកួតប្រជែងខ្លាំង ដោយសារតែកំណើនតម្លៃប្រាក់ដុល្លារ កំណើនតម្លៃពលកម្ម និងការប្រកួតប្រជែងរបស់បណ្ដាប្រទេសនៅក្នុងតំបន់ដែលមានប្រាក់ឈ្នួលទាប ដែលធ្វើឲ្យវិស័យកាត់ដេរមានកំណើនត្រឹម ៨.៤ភាគរយប៉ុណ្ណោះនៅឆ្នាំ២០១៦ ធៀបទៅនឹងកំណើន ១២.៣ភាគរយនៅក្នុងឆ្នាំ២០១៥កន្លងមក។
ធនាគារពិភពលោក បានបញ្ជាក់បន្ថែមថា ទោះជាយ៉ាងណា ការធ្លាក់ចុះបន្តិចបន្តួចនៃកំណើនសេដ្ឋកិច្ចកម្ពុជា ដោយសារតែការធ្លាក់ចុះនៃវិស័យកាត់ដេរ ត្រូវបានគេរំពឹងថា នឹងទូទាត់ត្រឡប់មកវិញជាមួយការងើបឡើងវិញនៃវិស័យទេសចរណ៍កម្ពុជា មួយផ្នែកដោយសារតែការបង្កើតជើងហោះហើរត្រង់ថ្មីៗនៅក្នុងតំបន់ និងការផ្ដួចផ្ដើមមួយចំនួន ដើម្បីជំរុញកំណើនភ្ញៀវទេសចរ និងការងើបឡើងវិញដោយសន្សឹមៗនៃវិស័យកសិកម្ម។
អ្នកគ្រប់គ្រងធនាគារពិភពលោកប្រចាំប្រទេសកម្ពុជា អ្នកស្រី អ៊ីនហ្គូណា ដូប្រាចា បានលើកឡើងនៅក្នុងរបាយការណ៍នោះថា ដើម្បីរក្សាកំណើនដ៏រឹងមាំនេះបាន វាជារឿងសំខាន់ដែលត្រូវធានាថា ប្រទេសកម្ពុជាវិនិយោគលើវិស័យហេដ្ឋារចនាសម្ព័ន្ធសាធារណៈក្នុងទិសដៅជំរុញកំណើនសេដ្ឋកិច្ច ក្នុងខណៈពេលដែលប្រទេសនេះកំពុងតែផ្ដោតទៅលើការកសាងជំនាញសម្រាប់កំណើនសេដ្ឋកិច្ចនាពេលអនាគត និងការពង្រឹងការផ្ដល់សេវារបស់វិស័យសាធារណៈ៕