សេចក្ដីរាយការណ៍បានឲ្យដឹងថា រដ្ឋាភិបាលថៃកំពុងតែព្យាយាមកែលម្អវិស័យនេសាទរបស់ខ្លួន បន្ទាប់ពីសហគមន៍អឺរ៉ុបបង្ហាញការមិនពេញចិត្តនឹងសកម្មភាពថៃនេះ ដែលនៅតែបន្តមានសកម្មភាពនេសាទគ្មានច្បាប់ទម្លាប់ និងគ្មានរបាយការណ៍ត្រឹមត្រូវ។
កាសែតបាងកក ប៉ុស្តិ៍របស់ថៃ បានរាយការណ៍ថា សហគមន៍អឺរ៉ុប បានជូនដំណឹងទៅក្រសួងកសិកម្ម និងសហករណ៍ថៃកាលពីសប្ដាហ៍មុន ឲ្យខិតខំបន្ថែមទៀត ដើម្បីទប់ស្កាត់សកម្មភាពនេសាទគ្មានច្បាប់ទម្លាប់ បើទោះបីជារដ្ឋាភិបាលបានប្រឹងប្រែងដោះស្រាយបញ្ហានេះ នៅក្នុងរយៈពេល ៣ឆ្នាំចុងក្រោយនេះក៏ដោយ។
បើកាសែតដដែលនេះ ដោយសារតែបញ្ហានេះ សហគមន៍បានផ្ដល់ “កាតលឿង” ទៅដល់ប្រទេសថៃ តាំងពីឆ្នាំ២០១៥មកម៉្លេះ ដែលនេះគឺជាការព្រមាន និងបង្ហាញនូវក្ដីបារម្ភចំពោះការប្រតិបត្តិមិនត្រឹមត្រូវ នៅក្នុងឧស្សាហកម្មនេសាទថៃ។
ក្ដីបារម្ភរបស់សហគមន៍អឺរ៉ុប ផ្ដោតទៅលើការប្រើប្រាស់ពលករខុសច្បាប់ ការប្រើប្រាស់ឧបករណ៍នេសាទខុសច្បាប់ដែលបង្កមហន្តរាយ និងកង្វះប្រព័ន្ធត្រួតពិនិត្យដ៏គួរឲ្យទុកចិត្តទៅលើសកម្មភាពនេសាទ។
កាតលឿងនេះ ត្រូវបានគេចាត់ទុកជាការព្រមានអំពីការបិទការនាំចូលគ្រឿងសមុទ្រពីប្រទេសថៃ ចូលទៅទីផ្សារអឺរ៉ុប ប្រសិនបើថៃមិនចាត់វិធានការលុបបំបាត់សកម្មភាពខុសច្បាប់នានា ដែលសហគមន៍បានលើកឡើងនោះ៕
