អភិបាលខេត្តព្រះសីហនុ ឲ្យដឹងថា ស្ថានភាពទឹកភ្លៀងដែលជន់លិចនៅខេត្តនេះ បានស្រកចុះវិញហើយ ប៉ុន្តែលោកអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់។
កាលពីម្សិលមិញនៅខេត្តព្រះសីហនុ មានឃុំចំនួន១២ ត្រូវបានទឹកជន់លិច ដោយសារជំនន់ទឹកភ្លៀង។
អភិបាលខេត្តព្រះសីហនុ លោក យន្ត មីន ប្រាប់វីអូឌីនៅព្រឹកនេះថា ជំនន់ទឹកភ្លៀងដែលជន់លិចនៅតំបន់មួយចំនួនកាលម្សិលមិញ បានស្រកចុះវិញ ដោយមិនមានគ្រោះថ្នាក់ដល់ជីវិតមនុស្ស ឬ ខូចខាតផ្ទះនោះទេ ប៉ុន្តែមានខូចខាតផ្លូវខ្លះ ហើយអាជ្ញាធរកំពុងចុះពិនិត្យមើលបញ្ហានេះ។
កាលពីថ្ងៃទី១៧ខែសីហាឆ្នាំ២០១៧ ក្រសួងធនធានទឹកនិងឧតុនិយមអំពាវនាវដល់ប្រជាពលរដ្ឋឲ្យមានការប្រុងប្រយ័ត្ន ជាពិសេសអ្នកនេសាទ ឬ អ្នកធ្វើដំណើរតាមផ្លូវសមុទ្រ ឲ្យមានការត្រៀមខ្លួន ដើម្បីជៀសវាងគ្រោះថ្នាក់ ខណៈប្រទេសកម្ពុជានឹងទទួលរងឥទ្ធិពលសម្ពាធទាប បណ្តាលឲ្យរាជធានីភ្នំពេញ និងបណ្តាខេត្តមួយចំនួនទៀតមានភ្លៀងធ្លាក់ខ្លាំងនិងបង្គួរ រួមទាំងផ្គររន្ទះ៕